تابيعي گاز تۇتىنۋعا ەندى ايماقتىڭ شەتكەرى اۋماعىنىڭ ءبىرى – ۇيعىر اۋدانى تۇرعىندارى دا قول جەتكىزدى. جاقىندا شونجى اۋىلىندا اۋداندى كوگىلدىر وتىنمەن قامتاماسىز ەتەتىن گاز تاراتۋ قوندىرعىسىنىڭ اشىلۋى ءوتتى. شاراعا قاتىسقان وبلىس اكىمى اماندىق باتالوۆ ەلىمىزدىڭ گازداندىرۋعا قاتىستى ەلباسى جۇكتەگەن مىندەتتىڭ ورىندالىپ جاتقانىن ايتتى.
- جەتىسۋ وڭىرىندە, ونىڭ ىشىندە تالدىقورعان ايماعىندا تابيعي گاز تۇتىنۋ بۇرىن-سوڭدى بولماعان جاعداي. ءبىز مەملەكەتتىڭ قولداۋى ارقاسىندا قازىر وبلىستاعى ءار ءۇيدىڭ كوگىلدىر وتىنعا قوسىلۋىنا جۇمىس ىستەپ جاتىرمىز. الىس اۋدانداردان العاشقى بولىپ قارادالى ءوڭىرى گاز جەلىسىنە قوسىلدى. ەندىگى باعىت كەگەن مەن رايىمبەك اۋداندارى. وسى ماقساتتان اينىماي, تالدىقورعانعا جەتكەن گاز جەلىسىن اقسۋ, سارقان, الاكول اۋداندارىنا دەيىن تارتۋدى جالعاستىرامىز. بۇعان مۇمكىندىك بار, - دەدى ايماق باسشىسى.
شونجى اۋىلىنداعى «شارىن» گاز تاراتۋ ستانساسىنىڭ قۇرىلىسى ءالى تولىق اياقتالعان جوق. العاشقى كەزەڭدى ىسكە قوسۋ بارىسىندا-اق اۋىلداعى 42 ابونەمەنت كوگىلدىر وتىنعا ءبىر كۇندە قوسىلعان, 150 ءۇيدىڭ ءوتىنىشى كەزەكتە تۇر. بۇل وڭىردەگى كوگىلدىر وتىنعا دەگەن سۇرانىستىڭ جوعارى ەكەنىن كورسەتەدى. جالپى, ءبىر عانا شونجى اۋىلى بويىنشا 5 ابونەمەنت گاز جەلىسىنە قوسىلۋعا دايىن وتىر ەكەن.
الماتى وبلىسى
