شىلدەنىڭ 4-6 كۇندەرى ەلوردالىق الاڭداردا ح «استانا سامالى» ۇرمەلى اسپاپتار وركەسترلەرى فەستيۆالى باستالادى. 6 شىلدە كۇنى تاڭەرتەڭ شاراعا قاتىساتىن وركەسترلەردىڭ شەرۋى وتەدى. سودان كەيىن قالالىق الاڭدا قالا تۇرعىندارى مەن قوناقتارىنىڭ نازارىنا پلاتس-كونتسەرت ۇسىنىلادى.
ءان سۇيەر قاۋىم 5-6 شىلدەدە كاراوكەدەن «ءبارى دە ءان شىرقايدى!» چەمپيوناتىنا قاتىسادى. بالالار مەن ەرەسەكتەر ءان ايتۋدان جارىسادى. حالىقتىق كاراوكە ەسىل وزەنىنىڭ جاعاسىنداعى امفيتەاتردا وتەدى.
ۇلى قازاق اقىندارىمەن, جاس جازۋشىلاردىڭ شىعارماشىلىعىمەن ەتەنە تانىسقىسى كەلەتىن جاندار ءۇشىن ەلوردادا «نۇر-سۇلتان – ەلىمىزدىڭ باس قالاسى, جاستار – بولاشاقتىڭ باستاماسى!» اتتى كىتاپ پەن پوەزيا كەشى ۇيىمداستىرىلادى. 5 شىلدەدە اباي ەسكەرتكىشىنىڭ جانىندا اباي وقۋلارى, مانەرلەپ وقۋشىلار بايقاۋى, كىتاپ كورمەسى ءوتىپ, تەاترلاندىرىلعان قويىلىمدار كورسەتىلەدى.
وسى كۇنى قالالىق الاڭدا «International Street dance Session in Astana» حالىقارالىق كوشە ءبيى فەستيۆالى ۇيىمداستىرىلادى. جينالعان قاۋىم بي بيلەۋدەن توپتىق جارىستار مەن جەكپە-جەكتەر تاماشالايدى.
مۇنىمەن قوسا, ەكسپو اۋماعىنداعى جازعى ساحنادا The Spirit of Eurasia 2019 حالىقارالىق زاماناۋي ەتنيكالىق مۋزىكا فەستيۆالى وتەدى. مۇندا ارتيستەر ونەر كورسەتىپ قانا قويماي, شەبەرلەردىڭ ەتنيكالىق قالاشىعى مەن جارمەڭكە اشىلادى.
6 شىلدەدە پرومىشلەننىي, ينتەرناتسيونالنىي, جەلەزنودوروجنىي, پريگورودنىي, ۇركەر, كوكتال-1 تۇرعىن الاپتارىندا بۇكىل وتباسىعا ارنالعان «دۋماندى سارىارقا» مەرەكەلىك باعدارلاماسى كوپشىلىك نازارىنا ۇسىنىلادى. شارا اياسىندا ەسترادا جۇلدىزدارى ونەر كورسەتىپ, مۋلتفيلم كەيىپكەرلەرىنىڭ كيىمىن كيگەن انيماتورلار كىشكەنتاي ەلوردالىقتارعا كوتەرىڭكى كوڭىل كۇي سىيلايدى.
مەرەكەلىك باعدارلامادا سپورت سۇيەر قاۋىمعا ارنالعان شارالار دا قاراستىرىلعان.
ولاردىڭ قاتارىندا «بولاشاق اڭىز تۇلعالار» اتتى كاسىپقوي بوكس كەشى دە بار. 6 شىلدەدە «بارىس ارەنا» مۇز ايدىنى سارايىندا كەشتىڭ باستى جەكپە-جەگىن بۇعان دەيىن جەڭىلىس تاپپاعان قازاقستاندىق بىلعارى قولعاپ شەبەرى جاڭقوش تۇراروۆ وتكىزەدى.
ەلوردا كۇنىنە ارنالعان سالتاناتتى شارالار لەگىن ۇلتتىق دومبىرا كۇنىنە ارنالعان كونتسەرت اياقتايدى. شارا 7 شىلدەدە «قازاق ەلى» مونۋمەنتىنىڭ الدىنداعى الاڭدا ساعات 12.00 وتەدى. سونداي-اق, وسى كۇنى كەشكە ساعات 17:00-دە امفيتەاتردا ونەر سۇيەر قاۋىم «ناعىز قازاق دومبىرا» اتتى كونتسەرتتى تاماشالايدى.
مەرەكەنىڭ سوڭعى كۇندەرى 7-8 شىلدەدە امفيتەاتر ساحناسىندا تاي ارتيستەرى «تاي تۇندەرى» اتتى كونتسەرتتىك باعدارلاماسىن ۇسىنادى. بۇل شارا تايلاند كورولدىگىنىڭ قازاقستانداعى ەلشىلىگىنىڭ ەلوردا كۇنىنە تارتقان سىيى بولماق. سونداي-اق, كونتسەرت نۇر-سۇلتان مەن بانگكوك قالالارىنىڭ باۋىرلاستىق قارىم-قاتىناسىنىڭ 15 جىلدىعىنا ورايلاستىرىلعان. قالا كۇنىنە ارنالعان مەرەكەلىك شارالار تۋرالى تولىق اقپارات www.astanaday.kz رەسمي سايتىندا جاريالانعان.
