فيلمدە اققان جۇلدىزداي جارق ەتىپ, از عانا عۇمىر كەشكەن سپورتشىنىڭ ءومىرى مەن سپورتتاعى جەتىستىگى سۋرەتتەلەدى. تۋىندىنىڭ سيۋجەتتىك جەلىسىندە بەكزات ساتتارحانوۆ ءومىرىنىڭ ءۇش كەزەڭى قامتىلادى. 90-جىلداردىڭ باسىنداعى قيىن-قىستاۋ كەزەڭگە تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى, نامىسقوي ءبىتىمى ءاربىر ساتتە سىنالىپ وتىرادى. تۋىندىنىڭ رەجيسسەرى – مۇرات بيدوسوۆ, ال باستى ءرولدى سامات ازىمقۇلوۆ سومدادى. ءفيلمنىڭ سالتاناتتى تۇساۋكەسەرىنە اقپارات جانە قوعامدىق دامۋ ءمينيسترى داۋرەن اباەۆ, مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ, «حابار» اگەنتتىگى» اق باسقارما ءتوراعاسىنىڭ ءبىرىنشى ورىنباسارى رينات كەرتاەۆ قاتىستى.
– بۇل – جيىرما جىل عانا ءومىر ءسۇرىپ, قازاقتىڭ ابىرويىن, قازاق بوكسىنىڭ مارتەبەسىن اسقاقتاتقان داڭقتى بوكشىمىزعا ارنالعان تۋىندى. پورترەتتىك ءفيلمدى كورەرمەن كوپ كۇتتى. ءبىز ونى بىلەمىز. الايدا وسى تاقىرىپقا اسىعىس, دايىندىقسىز كەلۋ دۇرىس بولمايتىن ەدى. بۇل بەكزاتتىڭ رۋحى الدىنداعى, حالىق الدىنداعى ۇلكەن جاۋاپكەرشىلىك بولاتىن. اقپارات جانە قوعامدىق دامۋ مينيسترلىگى قولدادى, «حابار» اگەنتتىگى جاۋاپتى جۇمىستى ويداعىداي اتقارىپ شىقتى. ۇلت ماقتانىشى – بەكزات ساتتارحانوۆتىڭ ەسىمى, بەينەسى ەلدىڭ جۇرەگىندە ماڭگى ساقتالادى, – دەدى اقپارات جانە قوعامدىق دامۋ ءمينيسترى داۋرەن اباەۆ.
كورسەتىلىمگە بوكسشىنىڭ اتا-اناسى تۇركىستاننان ارنايى كەلىپ قاتىستى. چەمپيوننىڭ اناسى سىرلىكۇل ادىربەكقىزى جۋرناليستەرگە بالاسى تۋرالى فيلم تۇسىرىلگەنىنە قۋانىشتى ەكەنىن جەتكىزدى. «بۇگىن – مەنىڭ تۋعان كۇنىم. ءفيلمنىڭ تۇساۋكەسەرى تۋرا وسى كۇنگە سايكەس كەلىپتى. بۇل – قۋانىشتى جاعداي. كينو ءساتتى ءتۇسىرىلدى دەپ ويلايمىن. فيلمگە باعانى حالىق بەرەدى. وسى كينونى تۇسىرگەن ازاماتتارعا العىس ايتامىن» دەيدى قۋانىشىن جاسىرا الماعان انا. ۇيىمداستىرۋشىلاردىڭ ايتۋىنشا, فيلم وسى جىلدىڭ قازان ايىندا ەل تۇرعىندارىنىڭ نازارىنا ۇسىنىلادى. ال التى سەريادان تۇراتىن تولىق نۇسقاسى تاۋەلسىزدىك كۇنى قارساڭىندا «حابار» اگەنتتىگىنىڭ ەفيرىنەن كورسەتىلەدى.
شارشى الاڭدا كوك بايراعىمىزدى جەلبىرەتىپ, مەرەيىمىزدى اسىرعان بەكزاتتىڭ جەڭىسپەن ورالعان بەتتە «قۇداي قالاسا, حالقىما ءالى ەكى وليمپيادا التىنىن سىيلايمىن. كۋبالىقتار عانا ەمەس, قازاقتار دا ءۇش دۇركىن وليمپيادا چەمپيونى بولا الادى. تەك سونى دالەلدەۋ عانا قاجەت. مەن ول ءۇشىن بارىمدى سالامىن!» دەگەن جىگەرلى سوزدەرى جادىمىزدا. از عۇمىرىندا ارتىنا وشپەس ءىز قالدىرعان ازاماتتى حالقى ءالى كۇنگە دەيىن ارداقتايدى. كەشەگى «بەكزات» فيلمىنە كەلگەن كوپشىلىك ىقىلاسى وسىعان دالەل.
