تۇتىلدى دەگەن وسى
بەيسەنبى, 23 مامىر 2013 2:48
شەگىرتكەنىڭ ايتاتىنى بار عوي, «ءبىر قاشتىم – قۇتىلدىم, ەكى قاشتىم – قۇتىلدىم, ال ءۇشىنشىسىندە تۇتىلدىم» دەپ. ءدال قازىر سونداي «نە جازدىم, قۇدايدىڭ» كۇيىن ءبىزدىڭ شەتەلدەردە ساۋعا سۇراپ جۇرگەن قاشقىنىمىز مۇحتار ءابىلازوۆ تە كەشىپ جاتىر.
بەيسەنبى, 23 مامىر 2013 2:48
شەگىرتكەنىڭ ايتاتىنى بار عوي, «ءبىر قاشتىم – قۇتىلدىم, ەكى قاشتىم – قۇتىلدىم, ال ءۇشىنشىسىندە تۇتىلدىم» دەپ. ءدال قازىر سونداي «نە جازدىم, قۇدايدىڭ» كۇيىن ءبىزدىڭ شەتەلدەردە ساۋعا سۇراپ جۇرگەن قاشقىنىمىز مۇحتار ءابىلازوۆ تە كەشىپ جاتىر.
انگليانىڭ جوعارعى سوتى بتا-بانكتىڭ بۇرىنعى باسشىسى مۇحتار ءابىلازوۆتىڭ مەنشىگىنە جاتاتىن ۇلىبريتانيا جەرىندەگى ءۇش «ليۋكس» كلاستى جىلجىمايتىن م ۇلىكتەر نىسانىن KPMG كومپانياسىنىڭ باسقارۋشىسىنا ساتۋ ۋاكىلدىگىن بەرگەن تۇپكىلىكتى بۇيرىق شىعاردى. اتالمىش شەشىم «بتا-بانك» اكتسيونەرلىك قوعامىنىڭ ءابىلازوۆتىڭ بانك ديرەكتورلار كەڭەسىنىڭ توراعاسى بولىپ تۇرعان جىلدارىندا بانكتەن زاڭسىز جولمەن الىپ كەتكەن اكتيۆتەرىن قايتارۋ ماقساتىندا ۇسىنعان زاڭدى ءوندىرىس شەڭبەرىندە شىعارىلىپ وتىر.
بتا-بانكتىڭ ءباسپاسوز قىزمەتى, سونىمەن بىرگە, لوندون جوعارعى سوتى بۇدان بۇرىن بانكتىڭ پايداسىنا 3,7 ملرد. دوللارعا جۋىق جالپى قارجىنى قايتارىپ بەرۋ جونىندەگى باسقا دا بىرقاتار ماڭىزدى شەشىمدەردىڭ جالعاسى بولىپ تابىلاتىنىن اتاپ كورسەتتى. تاراتىلعان ءباسپاسوز پاراقشاسىنا سايكەس, ەندى سوت لوندوننىڭ Carlton House دەپ اتالاتىن سولتۇستىك بولىگىندە ورنالاسقان بيشوپ اۆەنيۋدەگى كەڭ سارايدى (وسوبنياك) ساتۋعا رۇقسات ەتتى. وسوبنياك قابىلداۋ بولمەسىنەن, كىتاپحانادان, 9 جاتىن بولمەسىنەن, سونىڭ اۋماعىنداعى باسسەين مەن 12 ادامعا ارنالعان تۇرىك مونشاسىنان تۇرادى. ساۋداعا سونداي-اق ۆيندزور قالاسى اۋماعىندا ورنالاسقان Oaklands Park دەپ اتالاتىن وڭىردەگى 40 گەكتاردان استام جەر تەلىمى دە شىعارىلادى. بۇل ۋچاسكەنىڭ اۋقىمىندا 8 ءۇي, پيتومنيك, تەننيس كورتى, كولدەر, ورمان القابى مەن تىكۇشاق قوناتىن الاڭقاي بار. بۇدان باسقا, لوندوننىڭ سەنت-دجونس-ۆۋد اۋدانىندا Alberts Court اتىمەن تانىمال بولعان كۇزەتكە الىنعان پاتەر ساتىلاتىن بولادى.
وسى جەردە ساۋدا-ساتتىق جۇمىستارىن اتقاراتىن كومپانيانى دا تانىستىرىپ وتكەننىڭ ارتىقشىلىعى بولماس. ونىمەن شۇعىلدانۋ مىندەتتەلگەن KPMG – الەمدەگى وسىنداي كاسىبي قىزمەتتەگى اسا ءىرى جۇيەلەردىڭ ءبىرى. ول اۋديتتىك جۇيەدەگى Deloitte, Ernst & Young جانە PwC كومپانيالارىمەن بىرگە ۇلكەن تورتتىكتى قۇرايدى. ونىڭ حالىقارالىق شتاب-پاتەرى امستەلۆەن (نيدەرلاندى) قالاسىندا ورنالاسقان. ال فيليالى ءبىزدىڭ ەلىمىزدە, الماتى قالاسىندا دا بار.
«سوتتىڭ بۇل بۇيرىعىن ءابىلازوۆتىڭ ديرەكتورلار كەڭەسى توراعاسى لاۋازىمىندا جۇرگەن كەزەڭىندە ءسىڭىرىپ كەتكەن بانكتىڭ بىرنەشە ميلليارد دوللارعا باعالاناتىن اكتيۆتەرىن الداعى ۋاقىتتا قايتارۋ جولىنداعى تاعى ءبىر ماڭىزدى قادامداردىڭ ءبىرى دەپ ەسەپتەيمىز. ەندى ءبىز سوت شەشىمىمەن شىعارىلعان اكتيۆتەردى ساتا الامىز. سوتتىڭ شەشىمىن بۇدان ارى دا بانكتىڭ بۇكىل الەمگە تاراپ كەتكەن اكتيۆتەرىن قايتارۋ ءۇشىن پايدالانۋدى جالعاستىرا بەرەمىز», – دەپ ءباسپاسوز قىزمەتى بتا-نىڭ باسقارما مۇشەسى, باسقارۋشى ديرەكتورى پاۆەل پروسيانكيننىڭ سوزىنەن دايەكتەمە كەلتىردى.
لوندوننىڭ جوعارعى سوتى ەڭ الدىمەن 2012 جىلعى اقپان ايىندا مۇحتار ءابىلازوۆتى سوت وكىمىن قۇرمەتتەمەگەنى ءۇشىن 22 ايعا باس بوستاندىعىنان ايىرعان بولاتىن. سول شىعارىلعان قاۋلىعا سايكەس, بيزنەسمەن بيلىك ورگاندارىنا بەرىلىپ, ءوزىنىڭ اكتيۆتەرى جونىندەگى اقپاردى تولىق جەتكىزۋى ءتيىس ەدى. ولاي بولماعان جاعدايدا ونىڭ بتا-بانك بەرىپ وتىرعان جالپى سوماسى 6 ملرد. دوللاردان استام اقشا تۇراتىن 8 تالاپ-ارىز بويىنشا ءوزىن ءوزى قورعاۋ قۇقىعىنان ايىرىلىپ قالاتىنى دا ەسكەرتىلدى.
الايدا, ءابىلازوۆ بۇل قاۋلى مەن ەسكەرتپەگە پىسقىرىپ تا قاراعان جوق. شاماسى, مۇنىڭ ءبارىن ول ءجاي قوقان-لوقى ساناپ, ءبارى وزىنەن ءوزى ورنىنا كەلە سالادى دەپ ويلاسا كەرەك. نەمەسە نە دەسە ايتقانى كەلىپ تۇرعان ءوزىنىڭ باياعى ءبىر شالقاقتاپ قازاقستاندا جۇرگەن كەزەڭىن ەسىنە العان بولۋى دا مۇمكىن. ءسويتتى دە, بريتانيانىڭ جوعارعى سوت ورگانىنىڭ شەشىمىنە تۇكىرىپ كەتە باردى. ونىڭ ەڭ ۇلكەن قاتەلىگى دە وسى بولدى. سول قاتەلىك مۇحتاردى سوتتان قاشۋعا ءماجبۇر ەتتى. بىراق بۇلايشا ۇزاق قاشا الماسىن سەزگەسىن, ول لوندوننىڭ جوعارعى سوتىنا قايتا شاعىم بەرۋدىڭ دە جولىن تاپتى. البەتتە, سوت 2012 جىلعى قاراشادا ونىڭ اپەللياتسياسىن قاناعاتتاندىرۋدان ءۇزىلدى-كەسىلدى باس تارتتى. سوسىن مۇحتار ۇلىبريتانيا جوعارعى سوتىنا قاراي شاعىم جولدادى. شاماسى, بيزنەسمەن وسى سوتقا قاتتى ءۇمىت ارتسا كەرەك, ونىڭ اپەللياتسيالىق ينستانتسياداعى شەشىمدى وزگەرتۋدەن باس تارتقانىن ەستىگەندە جىندانىپ كەتە جازدادى…
وسىدان باستاپ البيوننىڭ اۋماعىنان الاسۇرا قاشقان بتا-بانكتىڭ بۇرىنعى باسشىسىنىڭ سايدا – سانى, قۇمدا ءىزى بولماي كەتتى. سودان بەرى ونىڭ قايدا جەر باسىپ جۇرگەنىن ەشكىم بىلمەيدى. ال ءبىزدىڭ بانك ءباسپاسوز قىزمەتىنىڭ مالىمەتى بويىنشا, ءابىلازوۆ لوندوننىڭ جوعارعى سوتى 2012 جىلعى اقپاندا ءوزىن قاماۋعا الۋ تۋرالى قاۋلى قابىلداعانعا دەيىن-اق بريتانيا ارالىن تاستاپ شىققانعا ۇقسايدى. سونداي-اق, سوتقا تاپسىرىلعان ماتەريالداردا ءابىلازوۆتىڭ بۇرىن سوت تالاپ ەتكەندە كورسەتۋدەن باس تارتقان قۇجاتتارىن الىپ, ەۋروپا ەلدەرىنىڭ بىرىنە بارىپ تۇراقتاۋى ىقتيمال ەكەنى دە ايتىلىپتى.
وسى رەتتە بتا-بانكتىڭ مۇحتار ابىلازوۆپەن ەسەپ ايىرىسۋدى 2009 جىلى-اق باستاپ كەتكەنىن ايتا كەتۋىمىز كەرەك. سول كەزدە وعان بانكتىڭ ميلليارد دوللار قاراجاتىن الىپ كەتتى دەگەن تالاپ-ارىز بەرىلگەن ەدى. ال 2011 جىلعى مامىر ايىندا لوندون سوتى بانكتىڭ ابىلازوۆكە قويىپ وتىرعان تالاپتارىن زاڭدى دەپ تاپتى.
قازاقستاندا بانكتى ناتسيوناليزاتسيالاۋ ءجۇرىپ بولعاسىن, ياعني ول «سامۇرىق-قازىنا» ەگەمەن قورى ارقىلى مەملەكەت قاراماعىنا قايتا وتكەننەن كەيىن كوپ ۇزاماي, 2009 جىلى ءابىلازوۆتىڭ ۇستىنەن قىلمىستىق ءىس قوزعالدى. وعان قاتىستى تاعى ءبىر قىلمىستىق ءىس رەسەيدە دە قوزعالدى. بۇل كەزدە ۇلىبريتانيادا ساياسي باسپانا الىپ ۇلگەرگەن قاشقىن ءوزىنىڭ تاراپىنا قويىلىپ جاتقان بۇل ايىپتاۋلاردىڭ ساياسي استارى بار دەپ بايبالام سالدى. ال قازىرگە دەيىنگى ۋاقىت مۇندا ەشقانداي دا ساياساتتىڭ ءيسى جوق ەكەنىن كورسەتىپ بەردى.
رۋسلان يگىلىك.
