«جايىقمۇنايدىڭ» جازاسى – 1,8 ملرد. تەڭگە!
بەيسەنبى, 25 ءساۋىر 2013 2:35
باتىس قازاقستان وبلىسىنىڭ ەكولوگتارى «جايىقمۇنايگاز» جاۋاپكەرشىلىگى شەكتەۋلى سەرىكتەستىگىنەن 1,8 ملرد. تەڭگە كولەمىندە ايىپپۇل ءوندىرىپ الۋعا نيەتتە. قورشاعان ورتانى قورعاۋشىلار اتالمىش كومپانيا ىلەسپە گازدى رۇقساتسىز جاققانى ءۇشىن وسىنشا كولەمدە ايىپپۇل تولەۋگە ءتيىس دەپ ەسەپتەپ وتىر.
بەيسەنبى, 25 ءساۋىر 2013 2:35
باتىس قازاقستان وبلىسىنىڭ ەكولوگتارى «جايىقمۇنايگاز» جاۋاپكەرشىلىگى شەكتەۋلى سەرىكتەستىگىنەن 1,8 ملرد. تەڭگە كولەمىندە ايىپپۇل ءوندىرىپ الۋعا نيەتتە. قورشاعان ورتانى قورعاۋشىلار اتالمىش كومپانيا ىلەسپە گازدى رۇقساتسىز جاققانى ءۇشىن وسىنشا كولەمدە ايىپپۇل تولەۋگە ءتيىس دەپ ەسەپتەپ وتىر.
وسىعان بايلانىستى, يندۋستريا جانە جاڭا تەحنولوگيالار مينيسترلىگىنە قاراستى گەولوگيا جانە جەر قويناۋىن پايدالانۋ كوميتەتىنىڭ ايماقارالىق دەپارتامەنتى تالاپ-ارىز تاپسىردى. دەپارتامەنت قىزمەتكەرلەرىنىڭ مالىمەتتەرى بويىنشا, سەرىكتەستىك 30,896 تەكشە مەتر كولەمىندە رۇقسات ەتىلمەگەن ىلەسپە گاز جاعىپ, اۋاعا جىبەرگەن. «باسشىلىق («جايىقمۇنايگاز» جشس) اتالمىش تالاپ نەگىزسىز جانە ينۆەستورلاردىڭ مۇددەلەرىنە ىقپال جاساۋعا قابىلەتسىز دەپ ەسەپتەيدى», دەلىنگەن قازاقستان قور بيرجاسىندا جاريالانعان حابارلامادا.
ال Zhaikmunai كومپانياسىنىڭ نەگىزگى اكتيۆىنە قازاقستاننىڭ رەسەي فەدەراتسياسىمەن سولتۇستىك-باتىستا شەكتەسەتىن شەكاراسىنان 60 شاقىرىم جەردەگى شىنار كەن ورنى (274 شارشى شاقىرىم), سونداي-اق گاز وڭدەۋشى زاۋىت جاتادى. كومپانيا قاعازدارى لوندون قور بيرجاسىندا ليستينگتەن وتكەن. ال ونىڭ ديرەكتورلار كەڭەسىنىڭ باسشىسى بەلگيالىق كاسىپكەر فرەنك مونسترا مۇنىڭ اكتسياسىنىڭ 40,5 پايىزىنا يەلىك ەتىپ وتىرسا, «قازقۇرىلىسسەرۆيس» ينجەنەرلىك-قۇرىلىس كومپانياسى 27 پايىز اكتسيانى الىپ وتىر.
تەمىر قۇسايىن,
«ەگەمەن قازاقستان».
باتىس قازاقستان وبلىسى.
