قالا تۇرعىندارىن سالاۋاتتى ءومىر سالتىن ۇستانۋعا ءارى قينالعاننىڭ مۇڭ-مۇقتاجىن بولىسۋگە شاقىرۋدى ماقسات ەتكەن تۋرنير №76 مەكتەپ-ليتسەيىنىڭ جاسىل الاڭىندا وتسە, وعان رۋحاني-قوعامدىق سالا وكىلدەرىنەن قۇرالعان 8 كوماندا قاتىستى.
– قاتىسۋشى كوماندالاردىڭ جارناسى, وعان قوسا «ەل-نەسىبە» قايىرىمدىلىق قورى مەن جەكەلەگەن ازاماتتاردىڭ كومەگىمەن بارلىعى 154000 تەڭگە جينالىپ, ارىس قالاسىندا تۇراتىن ەكى وتباسىعا تەڭدەي ءبولىپ جىبەرىلدى. بۇعان دەيىن وتكەن تۋرنيرلەردەن تۇسكەن قاراجات ەلوردالىق الەۋمەتتىك كومەككە مۇقتاج وتباسىلارعا تابىستالسا, بۇل جولى بارشامىزدى الاڭداتقان ارىستاعى جاعدايعا بايلانىستى سول ءوڭىردىڭ تۇرعىندارىنا از دا بولسا جاردەمىمىزدى تيگىزسەك دەگەن نيەتپەن وسىلاي شەشتىك. اتاپ ايتقاندا, ۇيىنە سنارياد ءتۇسىپ, باسپاناسى تۇگەلدەي جانىپ كەتكەن قارلىعاش بايەگىزوۆا مەن ءوزى جانە ەكى ۇلىنا سنارياد ءتيىپ, اۋىر جاراقاتتانعان نۇرلان راحيموۆتىڭ وتباسىنا تۋرنيردەن تۇسكەن قارجىنى اۋداردىق. قايىرىمدىلىق تۋرنيرىنە اتسالىسقان ازاماتتارعا العىسىمىز شەكسىز, - دەيدى ۇيىمداستىرۋشىلاردىڭ ءبىرى قولعانات ماقات ۇلى.
ال تۋرنير قورىتىندىسىنا كەلسەك, قارسىلاس شاق كەلتىرمەگەن «تۇران» كومانداسى «رۋحانيات» كمم-ءنىڭ اۋىسپالى كۋبوگىنە يە بولسا, ولارعا فينالدا جول بەرگەن «سەليكاتنىي» كومانداسى ەكىنشى ورىندى مىسە تۇتتى. جارتىلاي فينالدا سۇرىنگەن تۋرنير ۇيىمداستىرۋشىلارى «رۋحانيات» جانە «ەگەمەن قازاقستان» كوماندالارى ءوزارا 3-ورىندى ساراپقا سالىپ, ناتيجەسىندە «ەگەمەن قازاقستان» كومانداسى جەڭىسكە جەتتى.
