وبلىستىق ءبىلىم باسقارماسىنىڭ مالىمەتىنشە, ەكىنشى كەزەڭ ءۇشىن بالالاردى قابىلداۋ ءجانە ۇيىمداستىرۋ بويىنشا جەدەل ءىس-قيمىل جوسپارى ءازىرلەنگەن.
بالالاردى ورنالاستىرۋ ءۇشىن «قازحروم» اق فەرروقورىتپا زاۋىتىنىڭ, باسقارمانىڭ «جاس داۋرەن», «بالداۋرەن» وقۋ-ساۋىقتىرۋ ورتالىعى, شارباقتى اۋدانى «چايكا» بالالار لاگەرى دايىندالۋدا.
جەدەل ءىس-قيمىل جوسپارىنا سايكەس وبلىستىڭ ءبىلىم باسقارماسى, پوليتسيا دەپارتامەنتى, تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى, توتەنشە جاعدايلار جانە دەنساۋلىق ساقتاۋ باسقارماسى بىرلەسىپ, اتالعان ورتالىقتاردا بالالاردىڭ قاۋىپسىزدىگىن قامتاماسىز ەتۋ شارالارىن جۇرگىزۋدە.
وسىندا كەلگەن بالالارعا مەديتسينالىق جاردەم كورسەتىلەدى. ولاردى مۋزەيلەرگە, باسقا دا مادەني-دەمالىس ورىندارىنا اپارىپ, ءتۇرلى ەكسكۋرسيالىق تۋرلار ۇيىمداستىرىلادى. قارجىلاندىرۋ بيۋدجەتتىك ءجانە بيۋدجەتتەن تىس قاراجات ەسەبىنەن قامتاماسىز ەتىلەدى.
وتكەن اپتادا بالالاردىڭ العاشقى لەگى دە كەلىپ جەتتى.
– جاقسى ۇشىپ كەلدىك! تۋعان كۇنىمدى ۇشاق ىشىندە وتكىزدىم جانە جاڭا جەردە قارسى الۋ كۇتپەگەن توسىن سىي بولدى, – دەيدى ەرلان اسقار.
جالپى سانى 130 بالا مەن 10 جەتەكشى باياناۋىلداعى دەمالىس ورىندارىنا جەتكىزىلدى.
قازىر «جاس داۋرەن» لاگەرىندە 6, 7-سىنىپ وقۋشىلارى باياناۋىلدىڭ اسەم تابيعاتىن قىزىقتاپ, سابىندىكول, جاسىباي, تورايعىر كولدەرىنىڭ جاعاسىندا دەمالۋدا.
العاش رەت ۇشاققا مىنگەن, الىس جولعا شىققان بالالاردىڭ ءبىرى نۇرلان بەيسەمبەكتىڭ ايتۋىنشا, اسەم تابيعات اياسىنداعى جازعى دەمالىستارى بۇرىنعى قورقىنىشتىڭ ءبارىن ۇمىتتىرىپ جىبەرىپتى.
ارىس قالاسىنداعى №372 مەكتەپتىڭ مۇعالىمى اقجارقىن كەنجەبەك بالالاردىڭ ۇيلەرىنە جاقسى كوڭىل كۇيمەن ورالۋىنا وسىنداي سىيلىق جاساعان وبلىس اكىمدىگىنە العىس ءبىلدىردى.
ەكىنشى كەزەڭدە وڭىرگە تاعى 170 بالا كەلەدى. بۇل كەزەڭدە وبلىس ورتالىعىندا وقيتىن «سەرپىن» باعدارلاماسىنىڭ ستۋدەنتتەرى تالىمگەر جانە تاربيەشى قىزمەتىن اتقارادى.
پاۆلودار وبلىسى
