قازىر وبلىس اكىمىنىڭ ورىنباسارى سەرگەي كارپليۋك باستاعان توپ ارىس قالاسىندا ءجۇر. قۇرامىندا قۇرىلىس, تەحنيكالىق زەرتتەۋ ۇيىمدارىنىڭ ماماندارى بار توپ جوندەلەتىن ۇيلەردى كورىپ, تىزىمگە الىپ, ولاردىڭ قانشالىقتى زاقىمدانعانىن, قانداي جۇمىستار ءجۇرگىزىلەتىنىن, قاجەتتى قۇرىلىس ماتەريالدارىنىڭ كولەمىن انىقتايدى. سوعان سايكەس كەرەكتى قارجى كولەمى انىقتالىپ, كوپ ۇزاتپاي جۇمىستى باستاپ كەتۋ ماقساتى قويىلدى.
– جوندەۋ, قالپىنا كەلتىرۋ جۇمىستارى قوستاناي وبلىسىنا بەكىتىلگەن 450 ءۇيدىڭ جارتىسى كوپ قاباتتى, جارتىسى جەكە سەكتورداعى تۇرعىن ۇيلەر. ولاردىڭ زاقىمدانۋى دا ءارتۇرلى دارەجەدە ەكەنى بەلگىلى. ۇيلەردىڭ قانشالىقتى ب ۇلىنگەنىن, ولارعا جۇمسالاتىن قۇرىلىس ماتەريالدارىنىڭ, اتقارىلار جۇمىستىڭ كولەمىن ارىستا جۇرگەن ءبىزدىڭ 8 ادامنان تۇراتىن ماماندار توبى جەتە زەرتتەپ, انىقتاپ كەلەدى. ولاردىڭ جۇمىسىنىڭ قورىتىندىسى مەن تۇجىرىمىنا ءسايكەس قارجى كولەمى ەسەپتەلەدى. ءبىز وعان نەگىزىنەن جينالعان قارجىدان جۇمسايتىن بولامىز. ال جەتپەي جاتقاندا عانا بيۋدجەتتىك رەزەرۆتەن قاراستىرامىز. سونداي-اق مەن ءبىر-ەكى كۇن بۇرىن قازاقستان حالقى اسسامبلەياسىنىڭ وبلىستىق سەسسياسىندا ەتنومادەني بىرلەستىكتەردىڭ توراعالارىنا وسى جاعدايدى جەتكىزدىم. ءىرى, ورتا, شاعىن بيزنەس وكىلدەرىمەن كەزدەسۋ وتكىزدىم. بارلىعى زارداپ شەككەن وتباسىلارعا گۋمانيتارلىق كومەك كورسەتۋگە, ولاردىڭ تۇرعىن ۇيلەرىن قالپىنا كەلتىرۋگە كومەكتەسۋگە دايىن ەكەندەرىن ءبىلدىردى, – دەدى ا.مۇحامبەتوۆ.
ماماندار زەرتتەۋىنەن كەيىن ۇيلەردى قالپىنا كەلتىرۋ جۇمىستارىنىڭ قالاي ءتيىمدى جۇرگىزىلەتىنى دە شەشىمىن تابادى. ءوڭىر باسشىسى ايتقانداي, مەردىگەر كومپانيالار, قۇرىلىسشىلار, جۇمىس كۇشى جەرگىلىكتى جەردەن قاراستىرىلاتىن بولسا, قوستاناي وبلىسى 450 ءۇيدىڭ قالپىنا كەلتىرۋ شىعىنىن تولەپ, قۇرىلىسشىلار مەن ماماندار جىبەرمەۋ نۇسقاسى دا قاراستىرىلادى.
كۇنگەيدەگى باۋىرلارىمىز ايتىپ كەلمەگەن اپاتتان زارداپ شەگىپ, بالا-شاعا شۋلاپ جاتقاندا توبىل وڭىرىندەگى اعايىننىڭ ارقاسىن اياز قارىعانداي بولدى. اپات بولعان كۇنى-اق ارىس تۇرعىندارىنا كومەك جۇمىستارىن ورتالىقتاندىرۋ ءۇشىن جەتەكشى پارتيا وبلىستىق فيليالىنىڭ توراعاسى رەتىندە وبلىس اكىمىنىڭ باسشىلىعىمەن شتاب قۇرىلدى. ونىڭ قۇرامىندا ۆاسيلي روزينوۆ, يگور كيم, قايرات مايشەۆ سياقتى وبلىسقا بەلگىلى كاسىپكەرلەر مەن قوعامدىق پىكىر كوشباسشىلارى بار. اپاتتىڭ العاشقى كۇنى-اق ءبىر كۇندىك جالاقىسىن اۋدارۋ باستاماسىن وبلىستاعى كوپتەگەن مەكەمە مەن مەملەكەتتىك ەمەس قۇرىلىمدار قىزمەتكەرلەرى, كاسىپوداق ۇيىمدارى قولدادى. تەك مەملەكەتتىك ورگانداردىڭ قىزمەتكەرلەرى زارداپ شەككەندەرگە 20 ملن تەڭگەدەن استام قارجى اۋداردى.
– «قاراسۋ-استىق» جشس ديرەكتورى, قازاقستاننىڭ ەڭبەك ەرى المات تۇرسىنوۆ جانە ونىڭ ۇجىمى 3,5 ملن تەڭگە, «بك-ستروي» جشس ديرەكتورى يگور كيمنىڭ ۇجىمى 2 ملن تەڭگە, «ميلح» جشس باس ديرەكتورى سەرگەي بلوكتىڭ ءوزى 1 ملن تەڭگە اۋداردى, – دەدى ءوڭىر باسشىسى ارحيمەد مۇحامبەتوۆ.
تۇركىستان وبلىسىنا 20 توننا ءبىرىنشى سۇرىپتى ۇن, 7 توننا ماكارون, 3 توننا كونديتەر ونىمدەرى جەتكىزىلدى. وبلىستىڭ كاسىپوداق ورتالىعى «ءسابي» گۋمانيتارلىق اكتسياسىنىڭ اياسىندا 1 جاسقا دەيىنگى بالالارعا قوستانايلىقتاردان جورگەكتەر, بالالار تاعامى, گيگيەنالىق سۋلىقتار سەكىلدى ءبىرىنشى قاجەتتى زاتتاردى جيناۋدى ۇيىمداستىردى. العاشقى جۇك اپاتتان كەيىن ءبىر تاۋلىككە جەتپەيتىن ۋاقىتتا جينالىپ, كەرۋەن جونەلتىلگەن ەدى. ەكىنشى جۇك كەرۋەنى دە جولعا شىعادى.
وبلىس اكىمى ارحيمەد مۇحامبەتوۆ جۋرناليستەر ءۇشىن وتكىزگەن بريفينگتە توبىل-تورعاي ءوڭىرىنىڭ جۇرتشىلىعىن, كاسىپكەرلەرىن وتانداستاردىڭ باسىنا تۇسكەن قيىندىقتى بىرگە كوتەرۋگە, وعان سالعىرت قاراماۋعا, قولدان كەلگەنشە قايىرىمدىلىق كومەگىن بەرۋگە شاقىردى.
قوستاناي
