پروكۋرور مەن پوليتسيانىڭ پىكىرى نەگە قايشى؟
سەنبى, 6 ءساۋىر 2013 2:14
پوليتسيا جۇمىسىنىڭ وتە قيىن, وتە قاۋىپتى ەكەنىن ەلدىڭ ءبارى بىلەدى. ايتسە دە, ءبىزدىڭ پوگوندىلار جوعارعى جاققا مالىمەت بەرۋ ءۇشىن كوبىنەسە كورسەتكىش قۋىپ كەتەتىنىن جاسىرۋعا بولماس. وتكەن جىلى وڭتۇستىك قازاقستان وبلىسىندا ماس حالدە جاسالعان قىلمىس – 28,4, ادامدار توبى جاساعان قىلمىستار – 16,1, بۇرىن سوتتى بولعاندار جاساعان قىلمىس – 70,2, كامەلەتتىك جاسقا تولماعاندار جاساعان قىلمىس 40,5 پايىزعا وسكەن. بىراق, تەرگەۋشىلەر دە قىلمىستىق ىستەردى پىسكەنىنە قاراي, شەرتىپ-شەرتىپ ءجۇرىپ تاڭداپ, تىركەيدى بىلەم.
سەنبى, 6 ءساۋىر 2013 2:14
پوليتسيا جۇمىسىنىڭ وتە قيىن, وتە قاۋىپتى ەكەنىن ەلدىڭ ءبارى بىلەدى. ايتسە دە, ءبىزدىڭ پوگوندىلار جوعارعى جاققا مالىمەت بەرۋ ءۇشىن كوبىنەسە كورسەتكىش قۋىپ كەتەتىنىن جاسىرۋعا بولماس. وتكەن جىلى وڭتۇستىك قازاقستان وبلىسىندا ماس حالدە جاسالعان قىلمىس – 28,4, ادامدار توبى جاساعان قىلمىستار – 16,1, بۇرىن سوتتى بولعاندار جاساعان قىلمىس – 70,2, كامەلەتتىك جاسقا تولماعاندار جاساعان قىلمىس 40,5 پايىزعا وسكەن. بىراق, تەرگەۋشىلەر دە قىلمىستىق ىستەردى پىسكەنىنە قاراي, شەرتىپ-شەرتىپ ءجۇرىپ تاڭداپ, تىركەيدى بىلەم. پروكۋراتۋرا ورگاندارىمەن ستاتيستيكالىق مالىمەتتەردىڭ شىنايىلىعىنا جۇرگىزىلگەن تەكسەرۋ ناتيجەسىندە 2012 جىلى قوعامدىق ورىنداردا جاسالعان – 1700, ال وسى جىلعى قاڭتار ايىندا جاسالعان 40 قىلمىس جاسىرىلعانى انىقتالىپ, كەيىننەن ستاتيستيكالىق ەسەپكە ەنگىزىلدى. ەڭ سوراقىسى, ىشكى ىستەر ورگاندارى جۇمىس كورسەتكىشتەرىنە كەرى اسەرىن تيگىزەتىن اتالعان ساناتتاعى اسا اۋىر قىلمىستاردى ەسەپتەن جاسىرعان. جالپى, 2012 جىلى قوعامدىق ورىنداردا جاسالعان 72 اۋىر جانە اسا اۋىر قىلمىستار ورتا ساناتتاعى قىلمىس رەتىندە قوزعالعانى انىقتالىپ, بۇل زاڭسىزدىقتار پروكۋراتۋرا ورگانىمەن جويىلدى. وسىدان كەيىن پوليتسيانىڭ ءاربىر سوزىنە, ءاربىر مالىمەتىنە كۇدىكپەن قاراۋعا تۋرا كەلەتىن سياقتى.
وڭتۇستىك قازاقستان وبلىستىق ءىىد-ءنىڭ رەسمي سايتىندا مىنانداي مالىمەتتەر بار. اقپان ايىنىڭ باسىندا دەپارتامەنتتىڭ وتكەن جىلدى قورىتىندىلاعان جيىنىنا ىشكى ىستەر ءمينيسترىنىڭ ورىنباسارى ە.كەنەنباەۆ كەلىپ قاتىسىپ, سوڭىنان ەڭبەكشى پب-دە بولىپ, «اسار» شاعىن اۋدانىنداعى ۋپپ-مەن, جاڭادان اشىلعان ستاتسيونارلىق بلوكپوستپەن, قالا تىنىشتىعىن باقىلاۋ ماقساتىندا ورناتىلعان 100 بەينە باقىلاۋ كامەرالارىمەن, زاماناۋي تەحنيكالىق قۇرالدارمەن تانىسقانى ايتىلادى. ءسويتىپ, ۆيتسە-مينيستر اتقارىلعان جۇمىستارعا وڭ باعاسىن بەرىپ كەتكەن.
ەندى پروكۋراتۋرا مالىمەتى مۇلدەم باسقاشا سويلەيدى. وبلىس پروكۋرورىنىڭ ورىنباسارى ءابىل قوجاحمەتوۆتىڭ مالىمەتىنە قاراعاندا, 2012 جىلى شىمكەنت قالاسىنىڭ ورتالىق كوشەلەرىمەن حالىق كوپ شوعىرلاناتىن ورىنداردا 168 (100 ستاتسيونارلىق بەكەتتەرگە) بەينەباقىلاۋ كامەرالارى ورناتىلعان. بىراق, بۇل بەينەكامەرالاردىڭ قىلمىس وقيعالارىن اشۋعا پايداسى ءتيىپ وتىرعان جوق. ونىڭ سەبەبى, ستاتسيونارلىق پوليتسيا بەكەتتەرىنە قويىلعان بەينەباقىلاۋ كامەرالارىنىڭ 50 پايىزى تۇنگى ۋاقىتتا جارىقتاندىرۋ قۇرالى جوقتىعىنان ىستەمەيدى, 25 پايىزى جارتىلاي ىستەيدى. قوعامدىق ورىنداردا قىلمىستىڭ 40 پايىزى نەگىزىنەن تۇندە جاسالاتىنىن ەسكەرسەك, بەينەكامەرالاردىڭ قىلمىس اشۋعا سەپتىگى از ءتيىپ وتىر دەگەن ءسوز.
سونداي-اق, ءىىد-ءنىڭ رەسمي سايتىنداعى الگى اقپاراتتا «كوشە جانە پاتەر ۇرلىعى, بۇزاقىلىق, مال ۇرلىعى, جاسوسپىرىمدەر اراسىنداعى قىلمىستار بويىنشا تىڭعىلىقتى جۇمىستار اتقارىلۋدا» دەگەن جولدار بار.
ال, پروكۋراتۋرا مالىمەتتەرى تاعى دا باسقاشا «سايرايدى»… كامەلەتتىك جاسقا تولماعاندار جاساعان قىلمىس 40,5 پايىزعا وسكەنىن جوعارىدا ايتتىق. سونداي-اق, وبلىستىق ءىىد-ءنىڭ قوعامدىق ورىنداردا كامەلەتكە تولماعانداردىڭ قايتالاپ قىلمىس جاساۋىنىڭ الدىن الۋ تۇرعىسىندا اتقارىپ جاتقان جۇمىستارى دا تومەن دەڭگەيدە ەكەن. وعان دالەل, وتكەن جىلى 705 كامەلەتكە جاسى تولماعاندار قىلمىستىق جاۋاپقا, 400-دەن استامى اكىمشىلىك جاۋاپكەرشىلىككە تارتىلعان بولسا, ولاردىڭ نەبارى 69-نىڭ نەمەسە 3 پايىزىنىڭ عانا اتا-اناسى اكىمشىلىك جاۋاپكەرشىلىككە تارتىلعان.
قىلمىس ءورشىپ تۇرعان ءال-فارابي اۋدانىنىڭ جانگەلدين, رەسپۋبليكا, ايبەرگەنوۆ, قالداياقوۆ كوشەلەرىندە 2012 جىلى 572 قىلمىس بەلگىلەرى بار ارىز-شاعىمدار تىركەلگەن. الايدا, اتالعان اۋماقتا تاۋلىكتىك جالعا بەرىلەتىن 173 پاتەردىڭ 27-ءسى عانا جەكە كاسىپكەر رەتىندە ەسەپكە تىركەلگەنىنە قاراماستان, ونىڭ تەك 5-ءىنىڭ يەسى زاڭسىز كاسىپكەرلىكپەن اينالىسقانى ءۇشىن اكىمشىلىك جاۋاپكەرشىلىككە تارتىلعان. بۇل جۇمىستار, قىلمىس پەن قۇقىق بۇزۋشىلىقتاردىڭ الدىن الۋدا ماڭىزى زور بولىپ تابىلاتىنىنا قاراماستان, قازىرگى تاڭدا تاۋلىكتىك پاتەرلەردى زاڭسىز جالعا بەرۋمەن كۇرەس جانە اتالعان ايماقتاردا رەيدتىك جۇمىستارىن قۇزىرلى ورگاندارمەن بىرلەسىپ جۇرگىزۋ شارالارى اياقسىز قالعان.
«بىلتىرعى جىلى وبلىستىق بيۋدجەتتەن ءىىد جانە ونىڭ قۇرىلىمدىق بولىمدەرىن ماتەريالدىق-تەحنيكالىق جاعىنان جابدىقتاۋ ءۇشىن 2 ميلليارد تەڭگەگە جۋىق قارجى بولىنگەن. وبلىستىق پروكۋراتۋرا وسى قاراجاتتان قىلمىس كەڭىنەن ورىن الىپ جاتقان جەكەلەگەن اۋماقتاردا ۋچاسكەلىك پوليتسيا پۋنكتىن اشۋ تۋرالى ۇسىنىس ايتقان. مىسالى, شىمكەنت قالاسىنىڭ تەمىر جول وتكەلى كوشەسىنىڭ بويىندا 4 قاراقشىلىق, 7 ۇرلىق, 4 بۇزاقىلىق جانە 2 اۋىر دەنە جاراقاتىن سالۋ قىلمىستارى تىركەلگەن. وسى كوشەنىڭ كەيبىر ءۇي تۇرعىندارى زاڭسىز ەسىرتكى زاتتارىن ساتۋمەن اينالىسادى دەگەن شۇعىل مالىمەت تە بار», دەيدى وبلىس پروكۋرورىنىڭ ورىنباسارى ءابىل احان ۇلى.
الايدا, ىشكى ىستەر دەپارتامەنتى بۇل ماسەلەگە جەتە نازار اۋدارماي, سول اۋماققا قاراستى, جىل بويى ءبىر عانا قىلمىس تىركەلگەن قاپال باتىر كوشەسىنە ۋچاسكەلىك پوليتسيا پۋنكتىن اشىپتى.
مىنە, پروكۋراتۋرا مەن پوليتسيانىڭ تىرلىگى مەن مالىمەتتەرى… ەكەۋىنىڭ اراسى جەر مەن كوكتەي. جىل باسىنان بەرى وڭىردە پوليتسيا قىزمەتكەرلەرىنە قاتىستى 23 قىلمىستىق ءىس قوزعالىپتى. ونىڭ تەڭ جارتىسى قازىر سوت قاراۋىندا جاتىر. ال, وتكەن جىلى وسى تاقىلەتتەس 72 ءىس قارالىپ, قۇقىق قورعاۋ ورگاندارىنىڭ 55 قىزمەتكەرى قىزمەتىنەن الاستاتىلعان.
قالاي ايتساق تا, وبلىستىق ىشكى ىستەر دەپارتامەنتىنىڭ باستىعى, پوليتسيا پولكوۆنيگى اسقار وسپانوۆتىڭ وسالدىعىنان بولار, مىنە, وڭتۇستىكتىڭ پوليتسياسىندا وسىنداي كەلەڭسىز تىرلىكتەر بولىپ جاتىر. ايتسە دە, بار قىلمىستى جوق دەپ جاسىرىپ, جارامسىز بەينەكامەرانى بار دەپ باقىرايتىپ وتىرعان باسشىنىڭ نە ويلاعانى بار ەكەن؟
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
