نۇرسۇلتان نازارباەۆ پارتيانىڭ الدىنا قويىلعان مىندەتتەردى جۇزەگە اسىرۋ ءۇشىن باۋىرجان بايبەكتىڭ تاجىريبەسى جەتكىلىكتى ەكەنىن اتاپ ءوتتى.
– باۋىرجان بايبەك «بولاشاق» باعدارلاماسىنىڭ تۇلەگى, ديپلوماتيالىق قىزمەتتە جانە پرەزيدەنت اكىمشىلىگىندە جۇمىس ىستەدى. ول بۇعان دەيىن پارتيا توراعاسىنىڭ ءبىرىنشى ورىنباسارى قىزمەتىن اتقارعان بولاتىن. باۋىرجان بايبەكتىڭ الماتى قالاسىنىڭ اكىمى لاۋازىمىنداعى جۇمىسىنا وڭ باعا بەرۋگە بولادى, – دەدى قازاقستاننىڭ تۇڭعىش پرەزيدەنتى.
ەلباسى نۇرسۇلتان نازارباەۆ باۋىرجان بايبەكتىڭ پارتيانى جانە بۇكىل مەملەكەتىمىزدى دامىتۋ باعدارلامالارىن جۇزەگە اسىرۋعا زور ۇلەس قوساتىنىنا سەنىم ءبىلدىردى.
«Nur Otan» پارتياسىنىڭ توراعاسى نۇرسۇلتان نازارباەۆ ماۋلەن اشىمباەۆقا اتقارعان جۇمىسى ءۇشىن العىس ايتىپ, الداعى قىزمەتىنە تابىس تىلەدى.
– ماۋلەن اشىمباەۆ پارتيا باسشىلىعىندا بولعان كەزەڭدە ەكى سەزد وتكىزىپ, پرەزيدەنت سايلاۋىنا قاتىستىق. وسىنىڭ ءبارى پارتيامىز ءۇشىن زور سىناق بولدى. ول تابىستى جۇمىس ىستەدى دەپ ويلايمىن. «Nur Otan» – ەلىمىزدىڭ باستى ساياسي كۇشى. الدىمىزدا پارتيانىڭ قوعامداعى بەدەلىن ودان ءارى ارتتىرۋ مىندەتى تۇر, – دەدى ەلباسى.
سوڭىندا قازاقستاننىڭ تۇڭعىش پرەزيدەنتى «Nur Otan» پارتياسىنىڭ قىزمەتى بۇكىل ەلىمىزدى دامىتۋعا باعىتتالۋعا ءتيىس ەكەندىگىن اتاپ ءوتتى.
