باياناۋىل – اۋليەلەر مەن عۇلامالار كوپ شىققان كيەلى مەكەن. بۇقار جىراۋ, جاياۋ مۇسا, ءجۇسىپ كوپەي ۇلى سياقتى تۇلعالاردىڭ تۋعان جەرى. ەكسپەديتسيا قۇرامى اكادەميك قانىش ساتباەۆتىڭ باياناۋىل مەموريالدىق مۇراجايىن ارالادى. ودان بولەك, سۇلتانماحمۇت تورايعىروۆ كەسەنەسىندە بولىپ, مۇسا مىرزا مەشىتىندە قۇران باعىشتاپ, سارىادىر بۇلاعىنان سۋ ءىشتى. كيەلى مەكەندە كونە تاريحتىڭ ىزدەرى دە بارشىلىق. سولاردىڭ ءبىرى تورايعىر اۋىلىنىڭ اۋماعىنان تابىلعان ساق قورعاندارى. سونىمەن قوسا, ۇلتتىق پاركتەگى ەڭ تانىمال تاس – كەمپىر تاس, ونى تۋريستەر بابا-ياگا دەپ تە اتايدى. شارا سوڭىندا سالت اتتىلار بۇلدىرشىندەرگە ارنايى سىي-سياپات ۇسىندى.
«ەكسپەديتسيانىڭ ماقساتى — اتقا ءمىنۋ مادەنيەتىن ناسيحاتتاپ, قازاقستاندا اتتى ءتۋريزمدى دامىتۋ. مەنىڭ ويىمشا, وسى جوبا «رۋحاني جاڭعىرۋ» باعدارلاماسى مەن ەلباسىنىڭ « ۇلى دالانىڭ جەتى قىرى» ماقالاسىنداعى اتقا ءمىنۋ مادەنيەتىن جاڭعىرتۋعا ەلەۋلى ۇلەس قوسادى دەپ سەنەمىن», - دەيدى سالت اتتىلار جەتەكشىسى بەرىك اقىلبەكوۆ.
«كيەلى قازاقستان» سالت اتتىلار ەكسپەديتسياسى 21-ماۋسىمدا «BalQaragai» دەمالىس ورتالىعىنان اقساقال قاريالاردىڭ باتاسىن الىپ, جولعا شىققان بولاتىن. وسى ۋاقىت ارالىعىندا قاتىسۋشىلار اقمولا, پاۆلودار وبلىستارى مەن بۇيراتاۋ, باياناۋىل ۇلتتىق پاركتەرىن ءجۇرىپ ءوتتى. سالت اتتىلار تاۋلىگىنە 50-60 شاقىرىمدى ەڭسەرىپ, جاقىن ماڭداعى اۋىلداردا لاگەر قۇردى. ەكسپەديتسيا قۇرامىندا اتقا ءمىنۋدىڭ قىر-سىرىن ءجىتى بىلەتىن تاجىريبەلى شاباندوزدار, تۋروپەراتور وكىلدەرى, ترەۆەل-بلوگەرلەر, تىلشىلەر, فوتوگرافتار مەن ۆيدەووپەراتورلار بار.
ەكسپەديتسيا ناتيجەسىندە اتتى ءتۋريزمدى بەلسەندى دامىتۋ ءۇشىن قولدانۋعا بولاتىن باعىتتار انىقتالدى. ول جەرلەر ناقتى كوورديناتالارمەن, ساپالى فوتو جانە بەينەماتەريالدارمەن قامتىلىپ, تولىق سيپاتتالاتىن بولادى. ءارى قاراي بۇل اقپاراتتىڭ بارلىعى وتاندىق تۋركومپانيالارعا بەرىلەدى.
شارا قر مادەنيەت جانە سپورت مينيسترلىگىنە قاراستى تۋريزم يندۋسترياسى كوميتەتىنىڭ باستاۋىمەن جۇزەگە اسىپ جاتىر. ۇيىمداستىرۋشىسى - «Kazakh Tourism» ۇك, مارشرۋتتى جاساپ جانە ەكسپەديتسيانى وتكىزگەن - «QazaqGeography» رقب.
ەكسپەديتسيانىڭ تولىق ءجۇرىپ وتكەن جولدارى: نۇر-سۇلتان ق. –قاراعايلى ارحەولوگيالىق كەشەنى – سوكولينىە گورى (بۇيراتاۋ ۇتپ) – ەدىگە بي كەسەنەسى – العاباس ا. – بەلودىموۆسكي كوردون, قارااعاش (بۇيراتاۋۇتپ ) – الكەي مارعۇلان ا. – قارابۇلاق ا. – مۇسا شورمان ۇلى ا. – بۇقار جىراۋ كەسەنەسى – جاڭاتىلەك ا.– جاياۋ مۇسا كەسەنەسى –باياناۋىل ا.– جاسىباي كولى, س.تورايعىروۆ كەسەنەسى, قوڭىر اۋليە (باياناۋىل ۇتپ) – نۇر-سۇلتان قالاسى.
