بۇگىن قر ۇكىمەتىنىڭ الاڭىندا وتكەن بريفينگتە يندۋستريا جانە ينفراقۇرىلىمدىق دامۋ ءمينيسترى ر. سكليار از قامتىلعان وتباسىلاردىڭ تۇرعىن ءۇي ماسەلەسىن شەشۋدىڭ قوسىمشا تەتىكتەرى تۋرالى ايتىپ بەردى.
ر. سكليار اتاپ وتكەندەي, ازاماتتاردىڭ مەملەكەت تاراپىنان جالعا بەرىلەتىن تۇرعىن ءۇي الۋعا قۇقىعى بار. تۇرعىن ءۇي الۋعا اكىمدىكتەردە كەزەكتە تۇرعان ازاماتتاردىڭ ءتىزىمى ەلەكتروندى تۇردە جاريالانادى.
تابىس دەڭگەيى ءار ءتۇرلى مۇقتاج ازاماتتاردى تۇرعىن ۇيمەن قامتاماسىز ەتۋ ءۇشىن ەكى باعدارلاما ءساتتى ىسكە اسىرىلىپ جاتىر: «نۇرلى جەر» تۇرعىن ءۇي باعدارلاماسى جانە «7-20-25» يپوتەكتالىق باعدارلاماسى, ولاردا تۇرعىن ءۇي الۋدىڭ ءتۇرلى تەتىكتەرى قاراستىرىلعان.
سونىمەن قوسا, ا.ج. اقپان ايىندا «Nur Otan» پارتياسىنىڭ XVIII سەزىندە قر تۇڭعىش پرەزيدەنتى - ەلباسى ن. نازارباەۆتىڭ بەرگەن جاڭا باستامالارىنا سايكەس, از قامتىلعان وتباسىلاردىڭ تۇرعىن ءۇي ماسەلەلەرىن جىلدامداتىپ شەشۋ ءۇشىن از قامتىلعان كوپ بالالى وتباسىلارعا, تولىق ەمەس وتباسىلارعا جانە مۇگەدەك بالالاردى تاربيەلەپ وتىرعان وتباسىلارعا ارنالعان قوسىمشا تەتىكتەر پىسىقتالدى.
مۇنداي وتباسىلارعا جىلدىعى 2%-بەن, باستاپقى جارناسى 10%-بەن 20 جىل مەرزمىگە نەسيە بەرىلەتىن بولادى. مۇنداي قۇقىعىن جەرگىلىكتى اتقارۋشى ورگانداردا كەزەكتە تۇرعاندار پايدالانا الادى. ولار ءتيىستى باعىتتاۋ قاعازىن الىپ, وسى نەسيەنى الۋ ءۇشىن تۇرعىنۇيقۇرىلىسجيناقبانكىنە كەلۋلەرى قاجەت.
كوپبالالى وتباسىلار ءۇشىن جالعا بەرىلەتىن تۇرعىن ءۇي سالۋ جانە ونى الۋ ءۇشىن رەسپۋبليكالىق بيۋدجەتتەن وڭىرلەرگە جىل سايىن 50 ملرد تەڭگە نەمەسە 7 جىل بلويى 350 ملرد تەڭگە ءبولۋ قاراستىرىلعان. جىل سايىن 6 مىڭ جالعا بەرىلەتىن پاتەردى ساتۋ ىسكە اسىرىلادى. بۇل 7 جىل ىشىندە اكىمدىكتەردە رەسمي ەسەپتە تۇرعان كوپ بالالى وتباسىلاردى 40 مىڭ جالعا بەرىلەتىن تۇرعىن ۇيمەن قامتاماسىز ەتۋگە مۇمكىندىك بەرەدى (قازىر كەزەكتى 32 مىڭ وتباسى تۇر).
قر يدم مالىمەتتەرىنشە, بيىل 3 165 جالعا بەرىلەتىن تۇرعىن ءۇي قۇرىلىسى باستالعان, 2 883 تۇرعىن ءۇي بىرلىگىن ساتىپ الۋ جوسپارلانعان. سونىمەن قاتار بۇگىندە ءتۇرلى قاراجاتتاردى تارتۋمەن 1480 كوپ بالالى وتباسى تۇرعىن ۇيمەن قامتىلدى.
بۇدان سوڭ ازاماتتاردىڭ از قامتىلعان ساناتتارىنا ارنالعان جالعا بەرىلەتىن تۇرعىن ءۇي قۇرىلىسىن ارتتىرۋ كوزدەلىپ وتىر. بۇل جۇمىستار ۇلتتىق بانكپەن بىرلەسىپ جۇرگىزىلەدى. جەكە ينۆەستورلار مەن قۇرىلىس سالۋشىلاردى تارتۋمەن جاڭا تەتىكتەر ازىرلەنەدى.
سونداي-اق مەملەكەت باسشىسىنىڭ تاپسىرماسى بويىنشا جۇمىس ىستەيتىن جاستار ءۇشىن بيىل نۇر-سۇلتان, الماتى جانە شىمكەنت قالالارىندا 1 مىڭنان كەم ەمەس جالعا بەرىلەتىن پاتەر سالۋدى جانە ساتىپ الۋدى قامتاماسىز ەتۋ جوسپارلانعان ەدى.
«بۇل جوسپارلار قايتا قاراستىرىلدى. اتالعان ءۇش قالادا جاستارعا 3 مىڭ پاتەر بەرىلەتىن بولادى. بيىل دا, 2020 جىلى دا, 2021 جىلى دا», — دەدى ر. سكليار.
