قويان-قولتىق ۇرىس تارتىسقا تولى بولدى. ويتكەنى, تۋرنيرگە سپورت شەبەرلەرى مەن ۇمىتكەرلەر دە قاتىستى. قالاداعى اسكەري جانە سپورتتىق كلۋبتاردان ىرىكتەلىپ الىنعان كىل مىقتىلار اراسىنداعى سايىس جوعارى دەڭگەيدە ءوتتى.
ناعىز سايىپقىران جىگىتتەردىڭ ايقاسى دەپ قويان-قولتىق جەكپە-جەكتى ايتۋعا بولادى. ونىڭ ۇستىنە وسىنداي سپورت ءتۇرىن سەرىك ەتكەن ەلىمىزدىڭ سىرتقى جانە ىشكى تىنشىتىعىن قورعاپ جۇرگەن ازماتتارىمىزدىڭ مىقتى دا ەپتى بولعانى ەلدىڭ دە كوڭىلىنە مەدەت. قويان-قولتىق جەكپە-جەكتە قارسىلاسىڭدى, قول-اياق بىلاي تۇرسىن, وڭتايى كەلسە كۇرەسە كەتىپ, قۇلاعان ساتتە تىرپ ەتكىزبەي, 20 سەكۋند ۇستاعان سوڭ, ارتىنشا اۋىرتۋ ءادىسىن قولدانۋ ارقىلى جەڭىلگەنىن مويىنداتۋعا بولادى. اشىق جارىستا توعىز كوماندا ساپىندا 100-گە جۋىق اسكەري قىزمەتشى 9 سالماق دارەجەسىندە ونەر كورسەتتى.
بۇل سپورتتىق شارانىڭ ماقساتى – قويان-قولتىق ۇرىستى اسكەري-قولدانبالى سپورت ءتۇرى رەتىندە دامىتۋ, اسكەري وقىتۋدىڭ ماڭىزدى قۇرالى رەتىندە سالاماتتى ءومىر سالتىن ناسيحاتتاۋ, سپورتشىلاردىڭ كاسىبي شەبەرلىگىن جانە تورەشىلەردىڭ بىلىكتىلىگىن ارتتىرۋ.
بۇقارالىق سپورت پەن سالاماتتى ءومىر سالتىن ناسيحاتتاۋدى ماقسات تۇتقان دودانىڭ جەڭىمپازدارى ماراپاتتالدى.
جالپىكوماندالىق ەسەپتە ارنايى جەدەل ارەكەت ەتۋ جاساعىنىڭ جىگىتتەرى ۇزدىك شىقتى. ولاردىڭ قانجىعاسىندا 3 التىن, 1 قولا مەدال بار. 65 كەلى سالماققا دەيىن امانبەك جامانقاراەۆ, 85 كەلىدە سالامات الماتوۆ, 90 كەلىدە ەرنار حالىقوۆ قارسىلاس شىداتپاسا, اسقار ابدۋللا 3-ورىندى قاناعات تۇتتى. ەندى جۇلدەگەرلەر رەسپۋبليكالىق كەزەڭدە قوستاناي نامىسىن قورعايتىن بولادى.
– سپورتشىلار ءبىر-ءبىرىن جاقسى بىلەدى, سول سەبەپتى تۋرنير تارتىستى ءوتتى, وسال جىگىت جوق. ءبىز تىڭعىلىقتى دايىندىقتىڭ ارقاسىندا جەڭىسكە جەتتىك, جەڭىمپازداردى قۇتتىقتايمىن. الدا توبىل-تورعاي نامىسىن لايىقتى قورعايمىز دەپ سەنەمىن, – دەيدى ارنايى جەدەل ارەكەت ەتۋ جاساعىنىڭ جاتتىقتىرۋشىسى قۋانىش باباقاەۆ.
جەكپە-جەك – بابالار ءۇردىسىنىڭ جالعاسى, بىلەكتىلەر مەن جۇرەكتىلەر سايىسى. ەلدىڭ شەتىندە, جەلدىڭ وتىندە ەل قورعانى بولىپ جۇرگەن قاتارداعى جاۋىنگەرلەر قۇرىش بىلەكتى, ەر جۇرەكتى بولۋلارى ءتيىس. سايىستىڭ جەڭىمپازى اتانعاندار الداعى ەل كولەمىندە جالاۋىن كوتەرەتىن دودادا باقتارىن سىناپ, ءوڭىر نامىسىن قورعايتىن بولادى.
