1884 جىلى تۋىپ, 82 جاسقا كەلىپ قايتقان دميتري پوليكارپوۆيچ اقساقال ءوزىنىڭ كۇندەلىگىندە: «فوتوسۋرەت بوس ەرمەك ەمەس, فوتوسۋرەت ول – عىلىم, ونەر, فوتوسۋرەت – ۋاقىتتىڭ دالەلى» دەپ جازعان ەكەن. ايتسا ايتقانداي, ءوتكەن عاسىردىڭ باسىندا ونىڭ فوتواپپاراتىنىڭ وبەكتيۆىنە ءىلىنگەن قاس-قاعىم ساتتەر قازاق دالاسىنىڭ شەجىرەسىنە اينالعان. فوتوگرافتىڭ پاۆلودارداعى ءۇي-مۋزەيى قورىنان كورمەگە 50 فوتوسۋرەت ۇسىنىلىپتى. وندا حح عاسىردىڭ باسىنداعى قازاق حالقىنىڭ كۇندەلىكتى تۇرمىسى, ەسكى پاۆلوداردىڭ كورىنىستەرى, كەڭ دالانىڭ, باياناۋىل تاۋلارىنىڭ كوركەم پەيزاجى بەينەلەنگەن.
– دميتري پوليكارپوۆيچ ەڭبەكتەرىندە قويىلىمدىق كادرلار جوق. سول كەزدەگى فوتوپلاستينكالاردىڭ جارىق سەزگىشتىگىنىڭ جوعارى بولۋىمەن قاتار, فوتوگراف ءوزىنىڭ كاسىبي شەبەرلىگىنىڭ ارقاسىندا بولىپ جاتقان وقيعالاردىڭ ءار ءساتىن سول كۇيىنشە ءتۇسىرىپ جاريالاعان, – دەيدى وبلىستىق تاريحي-ولكەتانۋ مۋزەيىنىڭ قىزمەتكەرى باقىتگۇل مۇراتبەكوۆا.
فوتوسۋرەتكە تۇسىرۋمەن بالا جاسىنان اينالىسقان دميتري پوليكارپوۆيچتىڭ ءومىرى دە قازاق دالاسىنداعى اسا ءىرى وقيعالى كەزەڭدەرگە تۇسپا-تۇس كەلەدى. ول قازاقتىڭ كوشپەلى ءومىرى تاريح قويناۋىنا كەتىپ بارا جاتقانىن ءتۇسىنىپ, ونى اسا ىنتىزارلىقپەن ءتۇسىرەدى. سونىمەن قاتار ونىڭ شىعارمالارىنان قازاقستاندا بولعان توڭكەرىس, اشتىق, ۇلى وتان سوعىسى سياقتى تاريحي وقيعالاردىڭ بارلىعى دا كورىنىس تابادى.
1908 جىلى باگاەۆتىڭ «جەر اۋدارىلعانداردى ارناۋلى قاراۋىلمەن ايداۋ», «جەر ديىرمەندەرى», «ايىرباس الاڭى» جانە تاعى دا باسقا سۋرەتتەرى پاۆلوداردان تىسقارى جەرلەردە دە لايىقتى قۇرمەتكە يە بولادى. 1912 جىلى دميتري باگاەۆ بۇكىلرەسەيلىك بايقاۋدىڭ باس جۇلدەگەرى اتاندى. دميتري باگاەۆتىڭ «وشاق باسىنداعى ايەل», «تايدى ۇستاۋ», «بەسىك تەربەتكەن انا قيالى», «التىباقان», «ەكىباستۇز شاحتەرى» سياقتى فوتوجۇمىستارى الەمدىك فوتوسۋرەت مۇراسى بولىپ سانالادى. ەڭ باستىسى, ولار قازاق دالاسىنىڭ شەجىرەسىنە اينالۋىمەن دە قۇندى ەڭبەكتەر.
قوستاناي
