باتىس قازاقستان وبلىستىق تاريح جانە ارحەولوگيا ورتالىعى ماماندارى ورال قالاسىنىڭ ىرگەسىندەگى ورتاعاسىرلىق جايىق قالاسى ورنىندا ساقتالعان كونە وبانى قازۋدى قولعا الدى. بۇل سارماتتار كەزەڭىنە جاتاتىن جەرلەۋ كەشەنى.
– ورال قالاسىنىڭ ىرگەسىندەگى جەلتاۋ بيىگىندە ءبىرنەشە كونە وبا-قورعان ساقتالعان. بولاشاقتا اشىق اسپان استىنداعى مۇراجايعا اينالۋى جوسپارلانعان ايماق بولعاندىقتان, ءبىز ولاردىڭ كوبىنە تيىسپەي, سول كۇيىندە ساقتاعىمىز كەلەدى. ال قازىر قازىلىپ جاتقان بۇل وبا – بۇرىن تونالعان, ءارى 2003-2004 جىلدارى جايىق قالاشىعى ورنىن قازۋ كەزىندە تەحنيكامەن ب ۇلىنگەن ەسكەرتكىش. ءبىزدىڭ ماماندار قازبا جۇمىسىن بارلىق ارحەولوگيالىق تالاپتارعا ساي جۇرگىزىپ جاتىر. ءبىز وبانىڭ ءار كەزەڭدەگى توپىراق قاباتىن, تابىلعان بۇيىمدار مەن سۇيەكتى ارنايى زەرتحاناعا تاپسىرىپ, ناقتى عىلىمي تالداۋ جاساتۋدى جوسپارلاپ وتىرمىز, – دەيدى ورتالىقتىڭ ديرەكتورى جانتاس سافۋللين.
شىڭعىرلاۋ اۋدانىنداعى سەگىزساي القابىندا ەكى جىلدان بەرى قازبا جۇمىستارىمەن اينالىسىپ جۇرگەن ارحەولوگ مۇرات قالمەنوۆ وڭىردەگى 300-دەي وبانىڭ تەڭ جارتىسى 1966 جىلدان باستاپ قازىلىپ, زەرتتەلگەنىن ايتادى. بىراق كۇنى بۇگىنگە دەيىن سەگىزساي القابىنداعى كونە وبالار تۋرالى جيناقتالعان قورىتىندى عىلىمي ەڭبەك جوق. «بۇل ءوڭىردى مىڭ جىلعا جۋىق سارمات-ساۆرومات تايپالارى مەكەندەگەن, ول ءداۋىردىڭ بارلىق كەزەڭىنە ساي وبالار وسى جەردە ساقتالعان. بىراق ءبىر ورتالىقتىڭ نەمەسە عالىمنىڭ جەتەكشىلىگىندەگى ءجۇيەلى زەرتتەۋ بولماعان سوڭ بۇعان دەيىن جۇرگىزىلگەن جۇمىستاردىڭ ناتيجەسى جان-جاقتا شاشىلىپ جاتىر», دەيدى مۇرات دابىل ۇلى.
قازاقستاندىق ارحەولوگتاردىڭ تاعى ءبىر نازار اۋدارىپ وتىرعان نۇكتەسى – باتىس قازاقستان وبلىسى تاسقالا اۋدانى اۋماعىنداعى ەشكىتاۋ جوتاسى. مۇندا قازىر ءبىلىم جانە عىلىم مينيسترلىگى الكەي مارعۇلان اتىنداعى ارحەولوگيا ينستيتۋتىنىڭ نۇر-سۇلتان قالاسىنداعى فيليالىنىڭ ديرەكتورى تالعات بازارباي ۇلى باستاعان عالىمدار «سولتۇستىك-شىعىس كاسپي ماڭىنىڭ تاس ءداۋىرى» گرانتتىق جوباسى اياسىندا قازبا جۇمىسىن باستاعان.
– اتالمىش ينستيتۋتتىڭ باس ساراپشىسى, جەتەكشى عىلىمي قىزمەتكەرى ارمان بيسەمباەۆ تاسقالا اۋدانىنداعى بىرلىك اۋىلى ماڭىنان تابىلعان ەرتە تەمىر داۋىرىنە جاتاتىن شامامەن VII-VI عاسىرعا ءتان قولا اينا مەن تاس قۇرباندىقتى ءبىزدىڭ مۋزەيگە تاپسىردى. تاريحتى زەردەلەپ, وتكەندى عىلىمي اينالىمعا ەنگىزۋ جولىندا ەسەلى ەڭبەك ەتىپ, ايماعىمىزدىڭ ارحەولوگيالىق تىنىسىن كەڭەيتۋگە سەپ بولىپ وتىرعان عالىمدارعا العىس ايتامىن, – دەيدى باتىس قازاقستان وبلىستىق تاريحي-ولكەتانۋ مۋزەيىنىڭ ديرەكتورى ميربولات ەرساەۆ.
باتىس قازاقستان وبلىسى
