«ءبىز اي سايىن ەڭ تومەنگى جالاقىنى ەسەپتەۋ مونيتورينگىن جۇرگىزەمىز. ماسەلەن, مىندەتتى زەينەتاقى جارنالارىنىڭ تۇسىمدەرىن تالداۋ ناتيجەلەرى بيىلعى ساۋىردە 92 مىڭ قىزمەتكەر ەڭبەكاقىنى ەتج مولشەرىنەن تومەن العانىن كورسەتتى. سونداي-اق ەڭبەكاقىسى تومەن قىزمەتكەرلەر بويىنشا جالاقىنىڭ وسۋىنە مونيتورينگ جۇرگىزەمىز. قازىرگى ۋاقىتتا 203 مىڭنان استام جۇمىس بەرۋشى 1,1 ملن ادامنىڭ ەڭبەكاقىسىن ارتتىرۋ مىندەتىن ءوز موينىنا الدى» دەدى مينيستر.
ەسكە سالا كەتەيىك, ەلباسى نۇرسۇلتان نازارباەۆتىڭ قازان ايىنداعى جولداۋىن جۇزەگە اسىرۋ ءۇشىن 2019 جىلدىڭ باسىنان باستاپ ەڭ تومەنگى جالاقى مولشەرى 1,5 ەسەگە – 28-دەن 42,5 مىڭ تەڭگەگە دەيىن وسكەنى ءمالىم.
بۇعان 1,3 ملن ادام, ونىڭ ىشىندە ءبىلىم بەرۋ, دەنساۋلىق ساقتاۋ, الەۋمەتتىك قىزمەت كورسەتۋ, مادەنيەت جانە سپورت سالالارىندا جۇمىس ىستەيتىن 275 مىڭ ازاماتتىق قىزمەتشى قامتىلدى.
بۇدان بولەك بيىل ماۋسىم ايىنان باستاپ بيۋدجەتتىك سالانىڭ جەكەلەگەن قىزمەتكەرلەرىنىڭ جالاقىسى 30%-عا دەيىن ارتتى.
دەنساۋلىق ساقتاۋ, ءبىلىم بەرۋ, الەۋمەتتىك قورعاۋ, مادەنيەت, سپورت, اۋىل شارۋاشىلىعى جانە باسقا سالالاردا جۇمىس ىستەيتىن 1 ميلليوننان استام ازاماتتىق قىزمەتشى وسى ايدا جوعارى جالاقى الادى.
ەندى ءبىر قىزمەتكەردىڭ ورتاشا جالاقىسى 114,5 مىڭ تەڭگەنى قۇرايدى (2019 جىلعى 1 ماۋسىمعا دەيىن 99,6 مىڭ تەڭگەنى قۇرادى).
بيىل جالاقىلاردىڭ وسۋىنە رەسپۋبليكالىق بيۋدجەتتەن 144,3 ملرد تەڭگە كوزدەلگەن.
