ارىس قالاسىنىڭ تۇرعىندارى تولىق ەۆاكۋاتسيالانادى

«قورعانىس، ىشكى ىستەر مينيسترلەرىنە جانە تۇركىستان وبلىسىنىڭ اكىمىنە ارىس قالاسى اسكەري بولىمىندەگى وق-ءدارى قويماسىندا بولعان جارىلىستىڭ زارداپتارىن جويۋ جونىندە شۇعىل شارالار قابىلداۋدى تاپسىردىم. تۇرعىنداردىڭ قاۋىپسىزدىگىن قامتاماسىز ەتىپ، جارىلىستىڭ سەبەپتەرىن انىقتاۋ قاجەت»، دەلىنگەن پرەزيدەنت تاپسىرماسىندا. 

وسىعان وراي، تۇركىستان وبلىسى ارىس قالاسىنداعى اسكەري ءبولىم اۋماعىنداعى جارىلىسقا بايلانىستى ايماق باسشىسى ومىرزاق شوكەەۆتىڭ توراعالىعىمەن ارنايى كوميسسيا قۇرىلدى. تۇركىستان وبلىسى اكىمدىگىنىڭ باسشىلىق قۇرامى وقيعا ورنىنا باردى. اسكەريلەر مەن قۇقىق قورعاۋ ورگاندارى تج ايماعىنا كەلىپ جەتتى.

«توتەنشە جاعداي جاريالاندى. بارلىق اۋدان، جاقىن ەلدى مەكەندەر جۇمىلدىرىلدى. قازىرگى ۋاقىتتا بولعان وقيعانىڭ اۋقىمىنان قالانى تۇتاستاي ەۆاكۋاتسيالاۋ كەرەكتىگىن كورىپ تۇرمىز. بارلىق باعىتتا كولىكتەر لەگى قوزعالادى. ادامداردى الا كەتىپ، ارنايى ۇيىمداستىرىلعان لاگەرلەرگە جەتكىزەدى. اۋدانداردىڭ اكىمدەرى ءوز كوماندالارىمەن بىرگە لاگەرلەر ۇيىمداستىرىپ، كەلگەن ادامداردىڭ ءتىزىمىن جاساپ، كىمدەردى تۋىستارىنا، كىمدەردى قوناق ۇيلەرگە ورنالاستىرۋ كەرەكتىگىن انىقتاۋ كەرەك. ءار لاگەردى اۋدان اكىمى باسقارادى»، - دەدى ءو.شوكەەۆ. 

وبلىس اكىمىنىڭ تاپسىرماسىنا سايكەس، تۇرعىندار ءۇش لاگەرگە ورنالاستىرىلادى. ولار: اقدالا بۇرىلىسى; 41 رازەزد; ۆودوزوبور باعىتىندا لاگەرلەر. اتالعان ءۇش باعىت بويىنشا اسكەري كولىكتەر، كامازدار مەن ارنايى جاساق جۇمىلدىرىلۋدا. لاگەر باسىندا تۇرعىنداردى اۋدان اكىمدەرى قارسى الىپ، جايعاستىرادى. الەۋمەتتىك نىسانداردى (اۋرۋحانا، بالالار) پوليتسيا قىزمەتكەرلەرى كوشىرۋدە. 

توتەنشە جاعدايعا بايلانىستى قۇرىلعان ارنايى شتاب قازىرگى تاڭدا كوپتەپ تاراپ جاتقان «بوگەن» سۋ قويماسىنان كەلەتىن قاۋىپ تۋرالى اقپاراتتىڭ جالعان ەكەنىن مالىمدەدى.  

سونداي-اق، وتىرار مەن ورداباسى اۋداندارىندا 100 ورىندىق ەكى گوسپيتال اشىلدى. قوسىمشا 30 جەدەل مەديتسينالىق كولىك جۇمىس ىستەۋدە.

ارىستاعى توتەنشە جاعدايعا قاتىستى تۇركىستان وبلىسى توتەنشە جاعداي دەپارتامەنتى حابارلاما تاراتتى. وندا تۇرعىنداردى جارىلىس بولعان ايماققا، قاۋىپتى زاتقا جاقىنداماۋعا، قاۋىپتى جەرلەردەن تەز ارادا كەتۋگە، اينالاداعىلارعا قاۋىپ تۋرالى ەسكەرتۋگە شاقىردى. سونىمەن قاتار، ەۆاكۋاتسيا كەزىندە قۇجاتتار جانە ءبىرىنشى كەزەكتەگى قاجەت زاتتاردى الۋعا، ب ۇلىنگەن كونسترۋكتسيالار مەن جالاڭاش سىمداردى ۇستاماۋعا، قۇتقارۋ قىزمەتىنىڭ نۇسقاۋلارىنا سايكەس ارەكەت ەتۋگە ۇندەپ، قانداي دا ءبىر قيىندىققا تاپ بولعان جاعدايدا Tۇركىستان وبلىسى بويىنشا قاۋىرت جەلى (8723-35-83-02) قىزمەتىنە حابارلاسۋدى ەسكەرتتى.  ءارى، شىمكەنت قالاسى تج دەپارتامەنتىندە تاۋلىك بويى «قاۋىرت جەلىسى» 8 (7252) 44-94-72 جۇمىس ىستەۋدە. ارىستاعى توتەنشە جاعدايعا بايلانىستى مەگاپوليستە 14 ەۆاكۋاتسيالىق بەكەت اشىلدى. قازىرگى تاڭدا قاۋىرت جەلى ءسى بويىنشا 700-گە جۋىق تەلەفون حابارلاما كەلىپ ءتۇستى. قالادا 15 ەۆاكۋاتسيالىق بەكەتى اشىلدى. سونىمەن قاتار ارىس قالاسىنان حالىقتى كوشىرۋ ءۇشىن 40 اۆتوبۋس دايىندالىپ، جىبەرىلگەن.

ال، قر قورعانىس مينيسترلىگى تاراتقان اقپاراتتا وقيعا ورنىنا ارنايى كوميسسيا جونەلتىلگەن.      

ارىستاعى توتەنشە جاعدايعا وراي ورداباسى اۋدانىندا مەديتسينالىق شتاب قۇرىلدى. ورداباسى اۋداندىق ورتالىق اۋرۋحاناسىنان جانە وبلىستىق كلينيكالىق اۋرۋحاناسىندا 200 - دەن استام ناۋقاسقا ارنالعان ورىن دايىندالدى. 30 جەدەل جاردەم كولىكتەرىن شىمكەنت قالاسىنا كىرەر 3 جولعا قويىلدى. تاعى دا قاجەت بولعان جاعدايدا بىرنەشە اۋدانداردان الدىرىلعان قوسىمشا جەدەل جاردەم كولىكتەرى دايىن. وبلىستىق كلينيكالىق اۋرۋحانادان تراۆماتولوگ، حيرۋرگ، رەانيماتولوگ دارىگەرلەر قۇرىلعان مەديتسينالىق شتابقا جينالدى. قازىرگى كەزدە جاراقات العاندار جوق. ەۆاكۋاتسيا جۇمىستارى جۇرگىزىلىپ جاتىر. ارىس قالالىق ورتالىق اۋرۋحاناسى مەن ەمحاناسىنان ناۋقاستار ەۆاكۋاتسيا جاسالدى.

جارىلىس سالدارىنان وتىرار تسرب-عا 34 ادام كەلگەن. ولاردىڭ بارلىعىنا مەديتسينالىق كومەك كورسەتىلگەن. اۋدان اكىمدىگىمەن بىرگە جايعاستىرۋ جۇمىستارى جۇرگىزىلىپ جاتىر. 

ەستەرىڭىزگە سالار بولساق، 24 ماۋسىم ساعات 09:20-دا ءورت ءسوندىرۋ قىزمەتىنە №44856 اسكەري ءبولىمنىڭ قويماسىندا جارىلىس بولىپ، ءورت شىققانى تۋرالى حابارلاما كەلىپ تۇسكەن. وقيعا ورنىنا وبلىستىق تجد جەكە قۇرامىنىڭ 52 ادامى مەن 12 تەحنيكاسى جۇمىلدىرىلدى. سونداي-اق شىمكەنتتەگى كينولوگيالىق قىزمەتتىڭ 23 ادامى اتتاندىرىلدى. قازىرگى تاڭدا وقيعا ورنىندا ءورت ءسوندىرۋ شارالارى مەن ەۆاكۋاتسيالىق جۇمىستار جۇرگىزىلۋدە. توتەنشە جاعدايدان زارداپ شەككەندەر تۋرالى اقپارات انىقتالۋدا.

تۇركىستان