«قازىرگى تاڭدا كوپتەپ تاراپ جاتقان «بوگەن» سۋ قويماسىنان كەلەتىن قاۋىپ تۋرالى اقپاراتتىڭ جالعان ەكەنىن مالىمدەيمىز», دەدى اكىمدىكتەن.
بۇعان دەيىن حابارلاعانىمىزداي, تۇركىستان وبلىسىنىڭ اكىمى ومىرزاق شوكەەۆ باستاعان ارنايى كوميسسيا وقيعا ورنىندا ءجۇر. ارنايى شتاب قۇرىلىپ, اسكەريلەر مەن قۇقىققورعاۋ ورگاندارى تج ايماعىنا كەلىپ جەتتى. وبلىس اكىمىنىڭ تاپسىرماسىنا سايكەس, تۇرعىندار:
1.اقدالا بۇرىلىسى
2. 41-رازەز 3. «ۆودوزوبور» باعىتىندا لاگەرلەرگە ورنالاستىرىلادى.
«اتالعان ءۇش باعىت بويىنشا اسكەري كولىكتەر, كامازدار مەن ارنايى جاساق جۇمىلدىرىلۋدا. لاگەر باسىندا تۇرعىنداردى اۋدان اكىمدەرى قارسى الىپ, جايعاستىرادى. الەۋمەتتىك نىسانداردى (اۋرۋحانا, بالالار) پوليتسيا قىزمەتكەرلەرى كوشىرۋدە. سونداي-اق,وتىرار مەن ورداباسى اۋداندارىندا 100 ورىندىق ەكى گوسپيتال اشىلدى. قوسىمشا 30 جەدەل مەديتسينالىق كولىگى جۇمىس ىستەۋدە», دەدى وبلىس اكىمدىگىنەن.
بۇگىن تاڭەرتەڭ تۇركىستان وبلىسىنىڭ ارىس قالاسىنداعى اسكەري ءبولىم قويماسىندا جارىلىس بولدى. بىرنەشە ءوڭىردىڭ توتەنشە جاعدايلار دەپارتامەنتى شۇعىل جەلىلەر قۇردى. كوپ ۇزاماي وبلىس باسشىسى ومىرزاق شوكەەۆ باستاعان ارنايى كوميسسيا ارىستاعى اسكەري بولىمگە اتتاندى. جاعدايدىڭ اۋقىمىمەن تانىسقان ءوڭىر اكىمى ارىس تۇرعىندارىن ەۆاكۋاتسيالاۋ تۋرالى شەشىم قابىلدانعانىن ءمالىم ەتتى. قر ءىىم توتەنشە جاعدايلار كوميتەتى تۇرعىندار قايدا جانە قالاي ەۆاكۋاتسيالانىپ جاتقانىن حابارلادى.
قر پرەزيدەنتى قاسىم-جومارت توقاەۆ ءتيىستى ورگاندارعا ارىستاعى توتەنشە جاعدايدىڭ زارداپتارىن جويۋ تۋرالى تاپسىرما بەردى.
قر قورعانىس مينيسترلىگى رەسمي اقپارات تاراتىپ, تۇسكە دەيىنگى ۋاقىتتاعى جاعداي بويىنشا زارداپ شەككەندەر جوقتىعىن ايتتى. كەيىن حابارلانعانداي, وقيعا ورنىنا قورعانىس ءمينيسترى نۇرلان ەرمەكباەۆ ۇشىپ شىقتى.
