بيىلعى جيىن جاستار جىلىنىڭ اياسىندا ءوتتى. وتانشىل جاستاردى ادال قىزمەت ەتۋگە, ەل قورعانى بولۋعا ءتاربيەلەيتىن بىرەگەي الاڭعا اينالعان «ايبىن» اياسىندا جاستار ءاسكەري-قولدانبالى بايقاۋلار, اتاپ ايتقاندا, بەلتەمىردە تارتىلۋ, جالپىاسكەري قورعانىس جيىنتىعىن كيۋ, پنەۆماتيكالىق مىلتىقتان وق اتۋ, گراناتا لاقتىرۋ, اك-74 اۆتوماتىن بولشەكتەۋ جانە جيناۋ, قىسقا جانە الىس قاشىقتىققا جۇگىرۋ سىندى سايىستارعا قاتىستى.
سونىمەن, ءتورت كۇنگە سوزىلعان بايقاۋ قورىتىندىسى بويىنشا رەسپۋبليكالىق «جاس ۇلان» مەكتەپتەرى مەن مامانداندىرىلعان ليتسەيلەر اراسىندا «جاس ۇلان» مەكتەپ ينتەرناتىنىڭ (سەمەي قالاسى) وقۋشىلارى ءبىرىنشى ورىنعا شىقتى. ەكىنشى ورىندى ارميا گەنەرالى ساعادات نۇرماعامبەتوۆ اتىنداعى رەسپۋبليكالىق مەكتەبىنىڭ (نۇر-سۇلتان قالاسى) كومانداسى يەلەندى. ال ءۇشىنشى ورىنعا كەڭەس وداعىنىڭ باتىرى گەنەرال-مايور سابىر راحىموۆ اتىنداعى رەسپۋبليكالىق «جاس ۇلان» مەكتەبىنىڭ (شىمكەنت قالاسى) كومانداسى شىقتى.
قازاقستان قارۋلى كۇشتەرى جانە وزگە دە اسكەري قۇرىلىمدارعا قاراستى اسكەري-پاتريوتتىق كلۋبتار اراسىندا «شىعىس» وڭىرلىك قولباسشىلىعىنىڭ «شىعىس» اسكەري-پاتريوتتىق كلۋبى ءبىرىنشى ورىندى, «ساعادات» اسكەري-پاتريوتتىق كلۋبى ەكىنشى ورىندى جانە اسكەري پوليتسيا باس باسقارماسىنىڭ «جاس ۇلان» اسكەري-پاتريوتتىق كلۋبى ءۇشىنشى ورىندى يەلەندى.
وڭىرلىك اسكەري-پاتريوتتىق كلۋبتار اراسىندا «جىگەر» (باتىس قازاقستان وبلىسى), «جاس قىران» (شىعىس قازاقستان وبلىسى), «ايبىن» (اقمولا وبلىسى) كوماندالارى جۇلدەلى ورىنداردى ءبولىستى.
ال سەمەي قالاسىنان كەلگەن «جاس ۇلان» اسكەري-پاتريوتتىق كلۋبى «ايبىن-2019» اسكەري-پاتريوتتىق جيىنىنىڭ گران-پري جۇلدەسىن جەڭىپ الدى.
جيىننىڭ قورىتىندىسى بويىنشا جەڭىمپاز جانە جۇلدەگەر كوماندالارعا گراموتالار, مەدالدار, كۋبوكتار مەن ەستەلىك سىيلىقتار تابىس ەتىلدى.
