بيىل دا تاتار حالقىنىڭ ۇلتتىق مەرەكەسى سابانتوي وبلىستىق دەڭگەيدە ەرەكشە اتالىپ ءوتىلىپ, وعان وبلىس اكىمىنىڭ ورىنباسارى اسەم ءنۇسۇپوۆا, وسكەمەندەگى دوستىق ءۇيى-قوعامدىق كەلىسىم ورتالىعىنىڭ ديرەكتورى ەلدار تولەۋبەكوۆ, سەمەي قالاسى اكىمى ەرماك سالىموۆتەر قاتىستى. سابانتويعا وبلىستىڭ بەسقاراعاي, بورودۋليحا اۋداندارىمەن قاتار رەكسەيدىڭ قازان قالاسىنان دا تاتار اعايىندار كەلىپ قاتىسۋدا. اتاۋلى مەرەكەدە تاتار حالقىنىڭ ءان-جىرلارى شىرقالىپ, ۇلتتىق ويىندارىنان سايىس ءوتتى. تاتارستاننىڭ ەڭبەك سىڭىرگەن مادەنيەت قىزمەتكەرى, داڭقتى سپورتشى روم يلماتوۆتىڭ, ەڭبەك ارداگەرى راشيدا اشرافقىزىنىڭ ايتۋىنشا «تاتارچا كۋراس» ويىندارى بابادان بالاعا مۇرا بولىپ كەلە جاتقان ويىندار. ۇلتتىق ويىن دەمەكشى, باعانعا ورمەلەپ, باعان باسىنداعى سىي-سىياپاتتى الۋ كەشكە دەيىن جالعاساتىن سياقتى. ازىرشە ەشكىم دە بيىكتىككە شىعا المادى. سونداي-اق, دەمەۋشى رافايل حازيپوۆتىڭ ۇيىمداستىرۋىمەن تاتار پالاۋى فەستيۆالى ءوتىپ, سەمەيلىكتەردىڭ بارلىعى دا ءدام تاتتى.
رەسەي فەدەراتسياسىنىڭ وسكەمەندەگى باس كونسۋلدىعىنىڭ اتتاشەسى اندرەي حانوۆ, تاتارستاننىڭ حالىق ءارتىسى رەزەدا تۋحۆاتۋللينا جانە حالىقارالىق كونكۋرستار لاۋرەاتى الەكساندر يگناتەۆتەر سابانتويدىڭ قۇرمەتتى قوناقتارى بولدى. تاتارستاننىڭ پرەزيدەنتى رۋستام مينناحينوۆتىڭ سەمەي تاتارلارىنا جولداعان قۇتتىقتاۋىن سابانتويدا قازاننان كەلگەن تاتار اعايىندار وقىدى.
سەمەيدە ءوتىپ جاتقان سابانتويدا تاتار ورتالىعىنىڭ ۇيىمداستىرۋىمەن ۇلتتىق تاعام «چاك-چاك»-تى ەڭ ءتاتتى, ءدامدى عىپ دايىنداعانداردىڭ اراسىندا كونكۋرس ءوتىپ, قورىتىندىسى شىعارىلدى. ادىلقازىلار القاسى ەڭ ءدامدى «چاك-چاكتى» تاڭدادى. دەسەك تە, بارلىق قاتىسۋشىلار جوعارى ماراپاتتارعا يە بولدى. سەبەبى اركىمدىكى بولسىن تازا ەڭبەك ەكەنى كورىنىپ تۇر.
شاراعا قاتىسقان وبلىس اكىمىنىڭ ورىنباسارى اسەم ءنۇسۇپوۆا ون قولىنان ونەر تامعان اسپاز كەلىنشەك ديانا يزمايلوۆا گران-ءپريدى, ال تاعى ءبىر تاتاردىڭ ونەرلى قىزى فانيا كاريموۆاعا ءبىرىنشى ورىندى تاپسىردى. ولارعا تاتار حالقىنىڭ ۇلتتىق تاعامىن قاستەرلەپ, كونكۋرستىڭ ەرەكشە دەڭگەيدە وتۋىنە اتسالىسقاندىقتارى ءۇشىن ريزاشىلىعىن ءبىلدىردى
جيىن سوڭىندا سەمەيدەگى بيزنەس جانە سەرۆيس كوللەدجىنىڭ ستۋدەنتتەرى تاتار ۇلتتىق كيىمدەرىنەن ءسان ۇلگىسىن كورسەتتى.
راۋشان نۇعمانبەكوۆا
«ەgemen Qazaqstan»
سەمەي
