2018-2019 وقۋ جىلى 5755 وقۋشى 11 سىنىپتى بىتىرگەن. قورىتىندى مەملەكەتتىك اتتەستاتتاۋ ناتيجەلەرى بويىنشا 406 تۇلەك "التىن بەلگى", 264 تۇلەك ۇزدىك اتتەستاتقا يە بولدى (2018 جىلى - 320 "التىن بەلگى", 215 - ۇزدىك اتتەستات).
"4143 تۇلەك نەمەسە مەكتەپ بىتىرۋشىلەردىڭ 72% الداعى ۇلتتىق بىرىڭعاي تەستىلەۋگە قاتىسۋعا ءوتىنىش بەردى. 2018 جىلمەن سالىستىرعاندا قاتىسۋ 5% كوبەيگەن, ياعني بىلتىر تۇلەكتەردىڭ 67% قاتىسقان", - دەدى قىزىلوردا وبلىسى ءبىلىم باسقارماسىنىڭ باسشىسى مايرا مەلدەبەكوۆا.
قىزىلوردا وبلىسىندا ۇبت 21-26 ماۋسىم ارالىعىندا 9 تەستىلەۋ پۋنكتىندە وتكىزىلەدى.
"جىل بويى "تالدىسۋ", "قامباش" لاگەرلەرىندە بارلىق تۇلەكتەر قوسىمشا دايىندىق كۋرستارىنان ءوتتى. سونىمەن قاتار, اتا-انالار مەن تۇلەكتەرگە پسيحولوگيالىق ترەنينگتەر وتكىزىلدى. بارلىق تەستىلەۋ پۋنكتتەرى بەينەباقىلاۋ كامەرالارىمەن, ۇيالى بايلانىس سيگنالىن وشىرەتىن قۇرىلعىلارمەن جانە مەتالل ىزدەگىشتەرمەن جابدىقتالعان, ءاربىر اۋديتورياعا كونديتسيونەرلەر ورناتىلعان", - دەپ اتاپ ءوتتى م. مەلدەبەكوۆا.
ايماقتىڭ 4640 تۇلەگى ۋنيۆەرسيتەتتەرگە (81%), 1000 تۇلەك كوللەدجدەرگە (17%) تۇسەدى دەپ جوسپارلانۋدا. 628 تۇلەك رەسەي فەدەراتسياسىنىڭ 4 جوعارى وقۋ ورنىنا ءتۇسۋ ەمتيحانىن تاپسىردى. بۇل ماسكەۋ ۇلتتىق زەرتتەۋ تەحنولوگيالىق ۋنيۆەرسيتەتى "مبجقي", رەسەي مەملەكەتتىك اگرارلىق ۋنيۆەرسيتەتى – ك. ا.تيميريازەۆ اتىنداعى ماشا, ماسكەۋ ەنەرگەتيكالىق ينستيتۋتى جانە سانكت-پەتەربۋرگ مەملەكەتتىك ونەركاسىپتىك تەحنولوگيالار جانە ديزاين ۋنيۆەرسيتەتى. ەمتيحاننىڭ ناتيجەسى شىلدە ايىندا بەلگىلى بولادى.
ايتا كەتەيىك, 2019 جىلدان باستاپ جوعارى ءبىلىم الۋعا قولجەتىمدىلىكتى ارتتىرۋ ماقساتىندا ۇبت جىلىنا 4 رەت ۇيىمداستىرىلادى. قاڭتار ايىندا ۇبت-عا 2392 وقۋشى (41,5%) قاتىسىپ, ورتاشا بالل 77 بولدى. ناۋرىز ايىندا تەستىلەۋدى 4042 (70%) تۇلەك تاپسىردى, ورتاشا بالل 83-ءتى قۇرادى.
ۇلتتىق بىرىڭعاي تەستتىڭ ءۇشىنشى كەزەڭى 21-26 ماۋسىمدا, ال ءتورتىنشى كەزەڭ 17-20 تامىز ارالىعىندا وتەدى.
اتاپ وتەيىك, ءبىلىم بەرۋ گرانتىنا تەك ءۇشىنشى كەزەڭدە (21-26 ماۋسىمدا) تەستىلەۋ تاپسىرعان بىتىرۋشىلەر ۇمىتكەر بولا الادى.
ۇبت ناتيجەلەرى تەستىلەۋ كۇنى بەلگىلى بولادى. سونداي-اق, ۇلتتىق تەستىلەۋ ورتالىعىنىڭ رەسمي سايتىندا جاريالانادى.
ۇبت ناتيجەلەرىن @edugovkz_bot Telegram الەۋمەتتىك جەلىسى ارقىلى بىلۋگە بولادى. ول ءۇشىن تۇلەكتەرگە ءوزىنىڭ جەكە تەستىلەۋ ءنومىرىن (اكت) ەنگىزۋ قاجەت.
اپەللياتسياعا ءوتىنىش ۇبت ناتيجەلەرى جاريالانعاننان كەيىن كەلەسى كۇنى ساعات 13.00-گە دەيىن قابىلدانادى جانە اپەللياتسيالىق كوميسسيا ءبىر كۇنتىزبەلىك كۇن ىشىندە قارايدى.
اپەللياتسيالىق كوميسسيانىڭ وتىرىسىنا ءتۇسۋشى كەلمەگەن جاعدايدا ونىڭ اپەللياتسياعا بەرگەن ءوتىنىشى قارالمايدى.
ءوتىنىشتى وقۋشىنىڭ جەكە ءوزى بەرەدى, سونىمەن قاتار ءپان مەن سۇراقتاردى بەلگىلەپ, ناقتى تالاپتارىن كورسەتەدى. وزىمەن بىرگە جەكە كۋالىگى مەن تەستىلەۋگە رۇقسات قاعازى بولۋى كەرەك.
