ماڭعىستاۋ وبلىسىندا «قاراپايىم زاتتار ەكونوميكاسى» باعدارلاماسىن دامىتۋ اياسىندا 40-تان استام جوبا ۇسىنىلدى.
وڭىرلىك كوممۋنيكاتسيالار قىزمەتى الاڭىندا وتكەن بريفينگتە ماڭعىستاۋ وبلىسىنىڭ يندۋستريالىق-يننوۆاتسيالىق دامۋ باسقارماسىنىڭ ءبولىم باسشىسى ا.بەگيەۆانىڭ ايتۋىنشا, باعدارلاما اياسىندا ۇكىمەت وڭدەۋ ونەركاسىبى جانە اگروونەركاسىپ كەشەنى سالاسىنداعى باسىم جوبالاردى 2018-2020 جىلدار ارالىعىندا قولداۋ باعىتىندا 600 ملرد تەڭگە قاراستىرعان بولسا, سونىڭ ىشىندە وڭدەۋ ونەركاسىبىن دامىتۋعا 400 ملرد تەڭگە بولىنگەن. بۇل نەسيەلەۋ باعدارلاماسىنا نەگىزىنەن جەڭىل ونەركاسىپ, جيھاز ونەركاسىبى, تاماق جانە قايتا وڭدەۋ ونەركاسىبى, سونداي-اق قۇرىلىس ماتەريالدارىن ءوندىرۋ, تۋريزم, ءبىلىم سالاسى, كولىك جانە لوگيستيكا سالاسىنداعى قىزمەت تۇرلەرىن قامتيتىن جوبالارمەن بارلىق بيزنەس سۋبەكتىلەرى قاتىسا الادى. جوبا اتالعان سالالاردى دامىتۋ ماسەلەسىنە قاتىستى, سونىڭ ىشىندە جۇيەلىك دەڭگەيدەگى, ورتالىق جانە جەرگىلىكتى دەڭگەيدەگى بىرقاتار ءىس-شارالاردى قامتيتىن 9 تاراۋدان تۇرادى. قازىرگى تاڭدا ماڭعىستاۋ وبلىسىندا «قاراپايىم زاتتار ەكونوميكاسىن» دامىتۋ جونىندەگى ۇكىمەت تاپسىرماسىنا سايكەس ايماق باسشىلىعى مەن «اتامەكەن» ءوڭىرلىك كاسىپكەرلەر پالاتاسى نەگىزىندە قۇرىلعان جوبالىق كەڭسەدە ءتيىستى ءىس-شارالار جوسپارى جاساقتالىپ, جۇمىس ءجۇرگىزىلۋدە.
– بۇگىنگى تاڭدا ەكىنشى دەڭگەيدەگى بانكتەرمەن جالپى سوماسى 3,0 ملرد تەڭگەگە 9 جوبا, ونىڭ ىشىندە 2,46 ملرد تەڭگە بولاتىن 7 جوبانى «دامۋ» قورى ماقۇلداپ وتىر جانە جالپى سوماسى 2,20 ملرد تەڭگەنى قۇرايتىن 5 جوبانى سۋبسيديالاۋ تۋرالى كەلىسىمگە قول قويىلعان. جانە 20 ملن تەڭگە سوماسىندا نەسيە بويىنشا 1 جوبا, 10 ملن تەڭگە نەمەسە نەسيەنىڭ 50%-ىنا كەپىلدەمە العان. سونىڭ ىشىندە, وڭىردەگى وڭدەۋ ونەركاسىبىندەگى ازوتتى مينەرالدى تىڭايتقىشتار ءوندىرەتىن ءىرى كاسىپورىن «قازازوت» اق-ىندا وسى باعدارلاما اياسىندا نەسيە الۋعا قولداۋ تاپقان.
ال «قاراپايىم زاتتار ەكونوميكاسىنىڭ» باسقا جوبالاردىڭ ارتىقشىلىعىنا توقتالساق, بىرىنشىدەن, كاسىپكەر قانداي سومادا نەسيە الام دەسە دە شەكتەۋ جوق. ەكىنشىدەن, نەسيەنىڭ 50 پايىزىن «دامۋ» كاسىپكەرلىكتى قولداۋ قورى سۋبسيديالاپ, 5 ملرد تەڭگەگە دەيىن نەسيەگە كەپىل بولا الادى. اتالعان سالالاردا بيزنەستەرىن باستاۋعا نيەتتى ازاماتتار تولىق اقپاراتتى «اتامەكەن» كاسىپكەرلەر پالاتاسىنان, «دامۋ» كاسىپكەرلىكتى قولداۋ قورىنان جانە ەكىنشى دەڭگەيلى بانكتەردەن الا الادى, – دەيدى «دامۋ» كاسىپكەرلىكتى قولداۋ قورىنىڭ ماڭعىستاۋ وبلىستىق فيليالى ديرەكتورى گ. قالىمبەتوۆا.
جوبانىڭ العاشقى قاناتقاقتى ناتيجەسى رەتىندە اقتاۋدا كاسىبي سپورتشىلاردى دايىندايتىن سپورت-ساۋىقتىرۋ كەشەنى اشىلماق. كاسىپكەردىڭ قۇنى 100 ملن تەڭگە تۇراتىن ۇسىنىسىن «Forte Bank» ماقۇلداپ, كەشەن 2020 جىلدىڭ مامىر ايىندا اشىلادى دەپ جوسپارلانۋدا. سپورت كەشەنى اشىلعان سوڭ كاسىبي سپورتشىلار ءۇشىن ءىرى سپورتتىق سايىستارعا, وليمپيادالارعا دايىندالۋ ءۇشىن الىسقا ساپار شەكپەي, ءوز ەلىمىزدە دايىندالۋ قولجەتىمدى بولماق.
