اۋقىمدى شارادا باس قوسقان 100-دەن استام عالىم, وقىتۋشى, وتاندىق جانە شەتەلدىك ۇيىمداردىڭ قىزمەتكەرلەرى «ورتالىق ازياداعى گەندەرلىك سىن-تەگەۋرىندەر مەن وزگەرىستەر» تاقىرىبىندا وي ءبولىستى.
نازارباەۆ ۋنيۆەرسيتەت جوعارى بيزنەس مەكتەبىنىڭ قاۋىمداستىرىلعان پروفەسسورى دجەنيفەر ليۋيس گەندەرلىك تاقىرىپتىڭ تەوريالىق جانە پراكتيكالىق اسپەكتىلەرىن تولىق تالقىلاۋعا تىرىسقانىن تىلگە تيەك ەتتى. «فورۋمعا اتسالىسقان قازاقستاندىق مەكتەپتەردىڭ وكىلدەرى وقۋشىلارمەن جۇمىس ىستەۋ بارىسىندا كەزدەسەتىن ەڭ ماڭىزدى گەندەرلىك اسپەكتىلەرگە توقتالدى», دەدى د.ليۋيس. حالىقارالىق ساراپشىنىڭ سوزىنە سەنسەك, نازارباەۆ ۋنيۆەرسيتەتتەگى مەديتسينا مەكتەبىنىڭ پروفەسسورلارى دارىگەرلەردىڭ ناۋقاستارمەن قارىم-قاتىناسى كەزىندە قانداي ماسەلەلەرمەن بەتپە-بەت كەلگەنىن تارقاتىپ ايتتى.
گەندەرلىك تەڭدىك ماسەلەلەرى ءار سالادا كەزدەسەدى. ونى سول سالانىڭ ماماندارى عانا جاقسى بىلەدى. وسى جايتتى ەسكەرگەن فورۋم ساراپشىلارى مانساپتىق مۇمكىندىكتەردەگى تەڭدىك, ساياساتتاعى ايەلدەردىڭ ورنى, جاستارعا جىنىستىق ءبىلىم بەرۋ, تۇرمىستىق زورلىق-زومبىلىق, ايەلدەر كاسىپكەرلىگى, سىبايلاس جەمقورلىقتىڭ گەندەرلىك اسپەكتىلەرى سەكىلدى قوعامداعى ماسەلەلەردى قامتۋ ارقىلى تاقىرىپ اياسىن كەڭەيتە ءتۇستى.
ال شارانىڭ كەلەسى كۇنىنە بەلگىلەنگەن ستەيكحولدەرلەردىڭ (stákeholder – قىزىعۋشى تاراپ, جەكە تۇلعا, دەلدال نەمەسە وكىل) دوڭگەلەك ۇستەلىندە ءبىلىم بەرۋ سالاسىنىڭ قىزمەتكەرلەرى, عالىمدار, ۇەۇ مەن وزگە دە ۇيىمداردىڭ وكىلدەرى العاشقى كۇنى ايتىلعان ساراپتامالار مەن وسىعان دەيىنگى جاسالعان گەندەرلىك زەرتتەۋلەردى ءىس جۇزىندە قالاي قولدانۋعا بولاتىنىن تالقىلادى.
نازارباەۆ ۋنيۆەرسيتەتتىڭ جوعارى ءبىلىم بەرۋ مەكتەبىنىڭ اسسيستەنت-پروفەسسورى اننا كوەن-ميللەر اتالعان جوو-داعى ارىپتەستەرىمەن بىرگە وقۋشىلار اراسىنداعى گەندەرلىك اسپەكتىلەر جونىندە اۋقىمدى زەرتتەۋ جۇرگىزەدى. «مەكتەپ وقۋشىلارى مەن مۇعالىمدەردىڭ ورتاسىن جانە تاجىريبەسىن زەردەلەۋمەن اينالىستىم», دەگەن ا.كوەن-ميللەر دوڭگەلەك ۇستەل بارىسىندا زەرتتەۋ ناتيجەلەرىمەن ءبولىستى.
