مەملەكەتتىك تابيعي اپاتتارعا قارسى كۇرەس دەپارتامەنتىنىڭ دەرەكتەرى بويىنشا, ەڭ كوپ ءولىم سانى ماگاد اۋدانىنا قاراستى اۋرانگاباد, گايە جانە ناۆادتا تىركەلگەن.
سەنبى كۇنى مەملەكەتتىڭ كوپتەگەن بولىكتەرىندە قاتتى ىستىققا بايلانىستى 24 ساعات ىشىندە 45 ءولىم تىركەلدى. جەكسەنبى كۇنى تاعى 29 ادام قازا تاپتى. 100-دەن استام ادام ءىز-ءتۇزسىز جوعالىپ كەتتى.
IANS اگەنتتىگىنە سۇحبات بەرگەن رەسمي قىزمەتكەرلەردىڭ سوزىنە قاراعاندا گايا اۋدانىنىڭ اكىمشىلىگى دۇيسەنبى كۇنى قاتتى ىستىققا بايلانىستى توتەنشە جاعداي جاريالادى. بۇل - اۋا-رايى جاعدايلارىنا بايلانىستى شتاتتا ەنگىزىلگەن العاشقى توتەنشە جاعداي. بيلىك وكىلدەرى تۇرعىندارعا تاڭەرتەڭگى ساعات 11-دەن كەشكى 4-كە دەيىن ۇيدەن شىقپاۋعا كەڭەس بەردى. «بۇل شارا ادامداردى, قۇرىلىستا جۇمىس ىستەيتىن جۇمىسشىلاردى قورعاۋ ءۇشىن جاسالعان قادامنىڭ ءبىر بولىگى», دەدى گايا اۋدانى ماگيستراتى ابحيشەك كۋمار سينگح. بيحارداعى بارلىق مەملەكەتتىك مەكتەپتەر ىستىققا بايلانىستى 22 ماۋسىمعا دەيىن جابىلدى.
بيحاردىڭ كوپتەگەن اۋداندارىندا ءبىر اپتادان استام ۋاقىت بويى تەمپەراتۋرا 40°C-دان جوعارى بولىپ تۇر. ءۇندىستاننىڭ مەتەورولوگيالىق دەپارتامەنتىنىڭ مالىمەتتەرى بويىنشا, ەڭ جوعارى تەمپەراتۋرا سەنبى مەن جەكسەنبى كۇندەرى نورمادان ايتارلىقتاي جوعارى بولدى. بۇل بيحارداعى كوپتەگەن جەرلەردە جىلدىڭ وسى ۋاقىتى ءۇشىن قالىپتى ماكسيمۋمنان 5,1°C-گە ارتىق.
