كەزدەسۋدى اشقان Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ كەزەكتەن تىس قازاقستان رەسپۋبليكاسى پرەزيدەنتىن سايلاۋ حالىقتىڭ ەلباسى باعىتىن جالعاستىرۋعا, ونىڭ ىشىندە شەتەلدىك سەرىكتەستەرمەن دوستىق قارىم-قاتىناستى ساقتاپ قالۋعا نيەتتى ەكەندىگىن كورسەتكەنىنە نازار اۋداردى.
– قازاقستاندىقتار ەلدىڭ تۇڭعىش پرەزيدەنتى نۇرسۇلتان نازارباەۆ ساياساتىنىڭ جالعاسا بەرۋىنە قولداۋ كورسەتىپ, ەلباسىنىڭ بارلىق ستراتەگيالىق باستامالارى مەن باعدارلامالارى ءارى قاراي دا ىسكە اسىرىلىپ, ءبىزدىڭ پارتيانىڭ اتقاراتىن ءرولى زور بولادى. ساباقتاستىق سونىمەن بىرگە قازاقستاننىڭ كوپۆەكتورلى بەيبىت سىرتقى ساياساتىن ساقتاپ قالۋدى قاراستىرادى. ءبىز الداعى ۋاقىتتا دا بۇعان دەيىن قالىپتاسقان جانە بەلسەندى دامىتىلعان باعىتتار بويىنشا قارىم-قاتىناسىمىزدى نىعايتا بەرەمىز, – دەپ مالىمدەدى Nur Otan پارتياسى توراعاسىنىڭ ءبىرىنشى ورىنباسارى.
م.اشىمباەۆ ءوز سوزىندە Nur Otan پارتياسىنىڭ قىتاي كوممۋنيستىك پارتياسىمەن ىنتىماقتاستىقتى دامىتۋعا ۇلكەن ماڭىز بەرەتىنىن اتاپ ءوتىپ, پارتياارالىق ۇنقاتىسۋدىڭ جوعارى قارقىنىنىڭ دالەلى رەتىندە 2015-2017 جىلدارعا ارنالعان ىنتىماقتاستىق تۋرالى حاتتامانى مىسالعا كەلتىردى.
– ءبىز پارتيالارىمىزدىڭ اراسىنداعى ىنتىماقتاستىق تۋرالى حاتتامانى جاقسى ىسكە اسىرا بىلدىك. ءبىزدىڭ دەلەگاتتارىمىز قىتايدا بولىپ, ءتۇرلى ءىس-شارالارعا قاتىستى. سونداي-اق ءبىز دە قىتايلىق ارىپتەستەرىمىزدى ءبىرنەشە رەت قابىلدادىق. كەلەشەكتە ءبىزدىڭ پارتيامىزدىڭ جانە قىتاي كوممۋنيستىك پارتياسىنىڭ ورتاق مۇددەسىن تانىتاتىن باعىتتار بويىنشا قارىم-قاتىناسىمىزدى ودان ءارى دامىتا بەرەتىن بولامىز, – دەدى م.اشىمباەۆ.
ءوز كەزەگىندە قىتاي حالىق رەسپۋبليكاسى كوممۋنيستىك پارتياسى ورتالىق كوميتەتى ەۋرازيا حالىقارالىق ءبولىمى باسقارماسىنىڭ ديرەكتورى تسيان نايچەن مەملەكەتتەرىمىزدىڭ اراسىنداعى دوستىق قارىم-قاتىناسىمىزدى ودان ءارى نىعايتۋ ماقساتىندا قىتاي كومپارتياسىنىڭ Nur Otan پارتياسىمەن ىنتىماقتاستىقتى كۇشەيتە تۇسۋگە نيەتتى ەكەنىن راستادى.
بۇدان بولەك تاراپتار, پارتيالىق وقىتۋ مەن پارتيالىق كادرلاردى دايىنداۋ سالاسىنداعى سەرىكتەستىكتىڭ كەلەشەگىن تالقىلادى.
