...العىسىن ايتادى
جول ازابىنان قۇتىلاتىن بولامىز
ءبىز باتىس قازاقستان وبلىسى ورتالىعىنان 600 شاقىرىمدا جاتقان ەڭ شالعاي بوكەي ورداسى اۋدانىندا تۇرامىز. ءوزىم ءومىر بويى اۋىل شارۋاشىلىعى سالاسىندا ەڭبەك ەتكەن ارداگەرمىن.
قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ بىلتىر ءبىزدىڭ وڭىرگە جۇمىس ساپارمەن كەلگەن كەزدە جول قۇرىلىسىنىڭ ماڭىزدىلىعىن اتاپ ءوتىپ, شالعايدا ورنالاسقان بوكەي ورداسى, جانىبەك جانە قازتالوۆ اۋداندارىنا تاس جول سالۋ ماسەلەسىن شەشۋدى ۇكىمەتكە تاپسىردى. بۇل جول تەزىرەك سالىنسا, «قازاقستاننىڭ جالپىۇلتتىق قاسيەتتى ورىندارى» تىزىمىنە ەنگەن حان ورداسى مادەني-تاريحي كەشەنىنە تۋريستەردىڭ اعىلۋىنا جول اشىلىپ, حالىق تالاي جىلعى جول ازابىنان قۇتىلىپ, مۇلدەم جاڭا ءداۋىر باستالار ەدى.
وتكەندە اق جايىق ولكەسىنە پرەزيدەنتىمىز قاسىم-جومارت توقاەۆ كەلىپ كەتتى. جولىمىزدىڭ سالىنۋىن كوپتەن كۇتىپ جۇرگەن بوكەيوردالىقتار «تۇڭعىش پرەزيدەنتتىڭ تاپسىرماسى ەندى ءوز ۋاقىتىندا ءارى ساپالى سالىنار ما ەكەن؟!» دەپ الاڭداۋلى ەدى. وسى كەزدەسۋگە دە ەل اتىنان كەلىپ ارنايى قاتىستىم. مەملەكەت باسشىسى وڭىردە ءبىرىنشى كلاستى ينفراقۇرىلىم قۇرۋ ماسەلەسىن جەكە ماسەلە ەتىپ كوتەرىپ, ۇكىمەتكە ارنايى تاپسىرما بەرگەنىنە قاتتى قۋاندىق. «اسىرەسە وبلىستا جولداردىڭ 70%-ى – ناشار كۇيدە. بۇل دابىل قاعاتىن ماسەلە دەپ ەسەپتەيمىن. ويتكەنى ساپاسىز جول تۇرعىنداردىڭ كۇندەلىكتى تۇرمىسىن تومەندەتىپ قانا قويمايدى, ءوڭىردىڭ ەكسپورتى مەن كولىك تاسىمالى كورسەتكىشتەرىنە دە اسەر ەتەدى. قازىر ورىنبور باعىتىنا جانە ءوڭىردىڭ قازتالوۆ, جانىبەك جانە بوكەي ورداسى اۋداندارىنا جول سالىنىپ جاتىر. وبلىستىڭ وڭتۇستىك اۋداندارىن ورال قالاسىمەن جالعايتىن جولدىڭ قۇرىلىسىن 2021 جىلدىڭ سوڭىنا دەيىن اياقتاۋدى ۇكىمەتكە تاپسىرامىن», دەدى قاسىم-جومارت كەمەل ۇلى. بۇل تاپسىرما بوكەي ورداسىندا تۇراتىن مىڭداعان جەرلەستەرىمنىڭ قۇلاعىنا مايداي جاققانى ءسوزسىز. ەل تىلەگىن ەسكەرگەن مەملەكەت باسشىسىنا بوكەيوردالىقتاردىڭ العىسىن جەتكىزۋ ءۇشىن وسى جولداردى جازىپ وتىرمىن.
حايروللا سابىروۆ,
ەڭبەك ارداگەرى
باتىس قازاقستان وبلىسى,
بوكەي ورداسى اۋدانى
...اسەرىمەن بولىسەدى
سۇلتانبەك قوجانوۆ وقۋلارى ءوتتى
قازاق ۇلتىنىڭ كوگىنە كۇن, رۋحىنا نۇر بولعان سۇلتانبەك قوجانوۆتىڭ 125 جىلدىعى بيىل رەسپۋبليكا كولەمىندە كەڭىنەن اتالىپ وتپەك. وسى شاراعا وراي تۇركىستان وبلىسىنىڭ التى الاشتىڭ ارداقتىسى دۇنيەگە كەلگەن اقسۇمبە اۋىلىندا بايىپتى باستامالار باستاۋ الۋدا. جۋىردا سۇلتانبەك ەسىمىن يەلەنگەن مەكتەپتە رەسپۋبليكالىق دەڭگەيدە ءداستۇرلى سۇلتانبەك قوجانوۆ وقۋلارى ءوتتى. شاراعا ارىسى نۇر-سۇلتان, بەرىسى الماتى, شىمكەنت قالالارىنان بەلگىلى عالىمدار, سۇلتانبەكتانۋشىلار, ەل اعالارى شاقىرىلعان بولاتىن.
سونداي-اق سۇلتانبەك وقۋلارىنا جامبىل, قىزىلوردا, تۇركىستان وبلىستارىنان 22 وقۋشى ورەندەر ارنايى قاتىسىپ, باقتارىن سىناپ قايتتى. جۇزدەن جۇيرىك اتانىپ وزا شاپقان وقۋشىلار ارنايى العىس حاتتارمەن, باعالى سىيلىقتارمەن ماراپاتتالدى. ودان سوڭ مەكتەپ الدىنداعى سۇلتانبەك بابامىزدىڭ ەسكەرتكىشىنە قوناقتار گۇل شوعىن قويىپ, اس ۇستىندە قۇران باعىشتالدى. جالپى, ءىس-شارا كوپتىڭ كوڭىلىندە, كورەگەن جانداردىڭ كوكەيىندە قالاتىنداي جوعارى دەڭگەيدە ءوتتى. ول دا بولسا اياداي عانا اۋىلدىڭ ىنتىماعى مەن بىرلىگىنىڭ ەلگە ۇلگى بولا الاتىنداي ەكەندىگىن تانىتتى. ەل اعالارى اقسۇمبە اۋىلىنىڭ ارداقتى ازاماتتارىنا اق باتاسىن جاۋدىرىپ, شەكسىز العىستارىن ءبىلدىردى.
ماقسات قارعاباي
تۇركىستان وبلىسى
...وي قوزعايدى
قازاق نەگە ساياحاتتامايدى؟
وسكەمەننىڭ قازاعى ءومىر بويى اقتاۋدى كورمەي كەتۋى, قوستانايدىڭ قازاعى ەشقاشان تارازدى كورمەي كەتۋى مۇمكىن. ورالدىڭ قازاعى ءومىر بويى تالدىقورعاندى كورمەي كەتۋى ىقتيمال. قازاق اراسىن قالاي جاقىنداتامىز؟ ىشكى ءتۋريزمدى قالاي دامىتامىز؟ تىكەلەي قالاارالىق رەيستەردى نەگە اشپايمىز؟ شىمكەنت – سەمەي, اتىراۋ – پاۆلودار دەگەن رەيستەر جوق, مىندەتتى تۇردە الماتى مەن نۇر-سۇلتان ارقىلى ۇشۋعا ءماجبۇرمىز.
قازاقتى قۇدالىق قانا ەمەس, ساياxات تا جاقىنداستىرسىن دەگەن نيەت قوي.
سامات نۇرتازا
...ريزاشىلىعىن بىلدىرەدى
اۋىلىنا سپورت الاڭىن سالىپ بەردى
جەرلەستەرىنىڭ چەمپيون بولعانىن قالايتىن قالتالى ازامات ءوز قارجىسىنا سپورت الاڭىن سالىپ بەرگەن بولاتىن.
جەكە كاسىپكەر ماۋلەن شاپانباي ۇلى مۇقاشەۆ مۇقىرى اۋىلىندا دۇنيەگە كەلگەن. ول ەلباسى ماقالاسىنان باستاۋ العان «تۋعان جەر» باعدارلاماسىنا قولداۋ رەتىندە ءارى جەرلەستەرىنىڭ اراسىنان چەمپيون شىقسىن دەگەن نيەتپەن سپورت الاڭىن سىيعا تارتتى. اۋىلداعى سپورت نىسانىندا فۋتبول, باسكەتبول, ۆولەيبول مەن تەننيس الاڭدارى بار. فۋتبول مەن ۆولەيبول الاڭى 42/22 مەتر, باسكەتبول مەن تەننيس الاڭى 30/22 مەتردى قۇرايدى. مۇندا ءار تۇرعىننىڭ سپورتپەن اينالىسىپ, شەبەرلىگىن شىڭداۋعا مۇمكىندىگى بار.
«تۋعان جەردىڭ ءار تۇلەگى قاي جەردە, قانداي قىزمەتتە جۇرسە دە اتامەكەن – التىن بەسىگىن ءبىر ءسات ەستەن شىعارماي, وعان ماڭگىلىك قارىزدارمىن دەپ ەسەپتەۋى ءتيىس. ويتكەنى ادام بويىنداعى دارىن, قابىلەت, تەكتىلىك سىندى ابزال قاسيەتتەر انا ءسۇتى, اكە قانى, تۋعان جەردىڭ توپىراعىنان داريدى», – دەدى جەكە كاسىپكەر ماۋلەن شاپانباي ۇلى. اۋىل تۇرعىندارىنىڭ العىسىنا بولەنگەن جانى جومارت ازاماتقا حالىق قۇرمەتپەن تۇلپار مىنگىزىپ, يىعىنا زەرلى شاپان جاپتى.
سامال قابىشەۆا
الماتى وبلىسى
