ماسەلەن, قىزىلجارلىق ەرىك ازەنوۆتىڭ سولتۇستىك قازاقستان وبلىسى اكىمدىگىمەن الىسىپ كەلە جاتقانىنا بيىل ءۇش جىلدان استى. قوس تاراپ 2016 جىلى جەر قويناۋىن پايدالانۋ جونىندە ارنايى كەلىسىمشارتقا وتىرعان. سول بويىنشا كەن ورنىندا 6 ملن اقش دوللارىنا اس تۇزىن وندىرەتىن زاۋىت اشىپ, 100 ادامدى جۇمىسپەن قامتۋ كوزدەلگەن ەدى. الايدا تەرىسكەيدەگى اكىم-قارالار ءتيىستى جەر تەلىمىن بەرمەي, شارۋانى جۇرگىزۋگە كەدەرگى كەلتىرۋدە دەيدى كاسىپكەر.
– بۇل ماسەلەگە قاتىستى سولتۇستىك قازاقستان وبلىسى سوتىنىڭ شەشىمى بار. وندا اكىمدىكتىڭ زاڭعا قايشى ارەكەتتەرى كورسەتىلگەن. وبلىستىق سوت جىبەرىلگەن ولقىلىقتاردى تولىق كولەمدە تۇزەتۋگە قاۋلى شىعاردى. ءۇش سوتتا دا جەڭىپ شىقتىم, الايدا اكىمدىك ءتيىستى مىندەتتەرىن ورىنداۋعا اسىعار ەمەس. مەملەكەتپەن كەلىسىمشارت جاساستىق, بىراق اتقارۋشى ورگاندار جاۋاپسىزدىق تانىتىپ وتىر, – دەيدى ە.ازەنوۆ.
پارلامەنت ءماجىلىسىنىڭ دەپۋتاتى كەڭەس ابساتيروۆ مۇنداي فاكتىلەردەن كەيىن كەيبىر مەملەكەتتىك ورگاندارعا دەگەن سەنىمسىزدىك پايدا بولۋى ىقتيمال ەكەندىگىن جاسىرمادى.
– مەملەكەتتىك ورگانداردىڭ «بيزنەستىڭ جول كارتاسى-2020» باعدارلاماسى بويىنشا ورىنداماعان ءمىندەتتەمەلەرىن مىسالعا الۋعا بولادى. 2015 جىلى بيزنەس نىساندارىنا ينفراقۇرىلىم تارتۋ بويىنشا جاقسى باستاما قولعا الىندى. بۇل ءىس توقتاپ قالعان سوڭ كەلىسىمشارت جاساسقان تۇلعالار قۇرالاقان قالدى. وسى رەتتە جوبالىق-سمەتالىق قۇجاتتامانى دايىنداۋعا جەكە جانە قارىزعا الىنعان اقشا جۇمسالعانىن ايتا كەتۋ كەرەك. كەزىندە «سەمەي ينجينيرينگ» اق مەن قورعانىس مينيسترلىگى اراسىندا وسىعان ۇقساس جاعداي تىركەلگەن ەدى. زاۋىت مينيسترلىكتىڭ تاپسىرىسىن تولىق كولەمدە ورىنداپ شىقتى. ايتسە دە جاۋاپتى ۆەدومستۆو اتقارىلعان ىسكە قاراجاتتى اۋدارماي الەك قىلدى. سالدارىنان اقشانى سوت ارقىلى الۋعا تۋرا كەلدى, – دەپ ناقتى دەرەكتەردى كەلتىردى حالىق قالاۋلىسى.
وتىرىس كەزىندە سپيكەرلەر ەسەپ كوميتەتىنىڭ دەرەكتەرىن دە بايان ەتتى. ماسەلەن, وتكەن جىلى 9 ملرد تەڭگە كولەمىندەگى ءبىر مىڭ اتقارۋ قۇجاتى ورىندالماعان. جوعارعى سوتتىڭ ازاماتتىق ىستەر جونىندەگى سوت القاسىنىڭ توراعاسى مەيرامبەك تايمەردەنوۆ بۇگىندە مەملەكەتتىك قىزمەتكەرلەردى زاڭدى بۇزعانى ءۇشىن جاۋاپكەرشىلىككە تارتۋ كۇن تارتىبىندەگى ماسەلەلەردىڭ قاتارىندا ەكەندىگىن ايتادى. ازىرگە كەلىسىمشارتتى بۇزعان تاراپقا ايىپپۇل سالۋ نەمەسە م ۇلىككە شەكتەۋ قويۋ زاڭ جۇزىندە قاراستىرىلماعان.
كەڭەستىڭ ناتيجەسىندە ادىلەت مينيسترلىگى, جوعارعى سوت جانە باس پروكۋراتۋرا جۇكتەلگەن مىندەتتى بۇزعان جاۋاپتى تۇلعالاردى قىلمىستىق, اكىمشىلىك, سونداي-اق تارتىپتىك جاۋاپكەرشىلىككە تارتۋ جونىندە ۇسىنىستى قاراستىرۋعا ۋادە ەتتى.
جاقسىلىق مۇراتقالي,
«Egemen Qazaqstan»
