ماۋسىم ايىنىڭ العاشقى اپتاسىندا قاراعاندى وبلىسىنىڭ تەمىرتاۋ قالاسىندا ءدال وسىنداي بي ونەرىنىڭ ۇزدىكتەرىن سىنعا سالعان «تانتسەۆالنايا فەەريا» VI رەسپۋبليكالىق بايقاۋى ۇيىمداستىرىلدى. ايتۋلى شارادا كيروۆ ورتا مەكتەبىنىڭ حورەوگرافى ت.چيچاگينانىڭ جەتەكشىلىگىمەن ونەر كورسەتكەن تالانتتى بيشىلەردەن قۇرالعان «جاس جالىن» بي توبى ايرىقشا كوزگە ءتۇستى. توپ جەتەكشىسىنىڭ پىكىرىنشە, جەتكىنشەك بيشىلەر مۋزىكالىق ىرعاققا ساي ىقشامداعان كەربەز دەنە قيمىلدارىمەن, بي ونەرىنىڭ ءمانىن ءتۇسىنۋ دەڭگەيىمەن ەرەكشەلەندى. ولار اسەم قيمىلمەن مىڭ بۇرالا بيلەپ ءجۇرىپ, نامىستى دا قولدان بەرگەن جوق. كەش قورىتىندىسى بويىنشا, تالانتتى انسامبل جۇلدەلى 2-ورىنعا يە بولدى.
قانجىعاسى مايلانىپ قايتقان بي توبىنداعى ءار بيشىگە ۇيىمداستىرۋشىلار تاراپىنان ارنايى سەرتيفيكات پەن باعالى سىيلىقتار تابىس ەتىلدى. جەڭىس تۇعىرىنا كوتەرىلگەن ونەرپازدار جانارىنان شەكسىز ريزاشىلىق سەزىمى ايقىن بايقالىپ تۇردى. كەش سوڭىندا جەڭىمپازدار وزدەرى ءۇشىن جانكۇيەر بولىپ, قولداۋ ءبىلدىرگەن جەتەكشىلەرى مەن اتا-انالارىنا دا العىسىن جەتكىزۋدى ۇمىتپادى. بايقاۋدان قانجىعاسى مايلانىپ, ءجۇلدەلى ورالعان بالدىرعاندارعا مەكتەپ ديرەكتورى ج. سولتانوۆ ءبىلىم ورداسىنىڭ بارشا ۇستازدار قاۋىمى اتىنان قۇتتىقتاۋىن جولداپ, «جاس جالىن» بي توبىنىڭ كوركەمدىك جەتەكشىسى ب.چيچاگينانى ارنايى العىس حاتپەن ماراپاتتاپ, شىعارماشىلىق تابىس تىلەدى. سونداي-اق سالتاناتتى جيىن سوڭىندا مەكتەپ ديرەكتورى جاس ونەرپازداردىڭ الدا ءالى دە تالاي بەلەستى باعىندىراتىنىنا زور سەنىم ءبىلدىردى.
اينا الپىسباي,
ل.ن.گۋميلەۆ اتىنداعى
ەۇۋ ستۋدەنتى
