«قاراعاندىعا 85 جىل» اتتى تاقىرىپ اياسىندا وتكەن شارادا كارتينا, قولدانبالى ونەر بۇيىمدارىنان تۇراتىن 70-تەن اسا شىعارماشىلىق تۋىندى كەلۋشىلەر نازارىنا ۇسىنىلدى.
– اتالعان شارا سوتتالعان ازاماتتارعا ءوز تالانتىن كورسەتۋگە مۇمكىندىك بەرەدى. بايقاۋ ءناتيجەسى بويىنشا التى جۇلدەلى ورىن انىقتالادى. ۇزدىك دەپ تانىلعان تۋىندىلاردىڭ اۆتورلارىنا سىيلىقتار تابىس ەتىلەدى, – دەدى قاجك دەپارتامەنتىنىڭ ءبولىم باستىعى, ادىلەت مايورى ەركەبۇلان قارعالتاەۆ.
كورمە تورىنەن ورىن العان شىعارماشىلىق تۋىندىلار ارقىلى الدەبىر سەبەپتەرمەن بوستاندىعىنان ايىرىلعان ازاماتتار وزدەرىنىڭ ويلارى مەن ءومىر تۋرالى كوزقاراستارىن جانە اينالاداعى الەمگە دەگەن قارىم-قاتىناسىن تانىتۋعا تىرىسقان.
– وسىنداي كورمە-بايقاۋلاردىڭ تاربيەلىك ماڭىزى زور. ونەر اداسقان ادامنىڭ ءتۇزۋ جولعا تۇسۋىنە كومەكتەسەدى. جىل وتكەن سايىن بۇل كورمەگە دەگەن قىزىعۋشىلىق ارتىپ كەلەدى. اۆتورلار ءتۇرلى تەحنيكالاردى قولدانىپ, ءارتۇرلى ماتەريالدارمەن جۇمىس ىستەيدى. مۇندا كاسىبي ستۋديالاردا قولدانىلمايتىن زاتتار ىسكە جاراتىلادى. مىسالى, كومىردەن جاسالعان ءمۇسىننىڭ ءوزى ءبىر كەرەمەت. سونىمەن قاتار اۆتورلاردىڭ اراسىندا بوياۋلاردى وزدەرى جاسايتىندارى دا بار. ماتەريالداردى دايىنداۋىنىڭ ءوزى ولاردىڭ ونەرمەن اينالىسقىسى كەلەتىنىن كورسەتەدى. مۇنداعى ءاربىر تۋىندى ءوز الىنشە ەرەكشەلىككە ۇمتىلعان, – دەيدى ونەرتانۋشى, قازىلار القاسىنىڭ مۇشەسى ناتاليا يۆانينا.
«ءۇمىت-2019» كورمە-بايقاۋىنىڭ قورىتىندىسى بويىنشا «ستانوكتىك ونەر», «قولدانبالى ونەر», «كوركەمسۋرەت جانە گرافيكا» اتالىمدارى بويىنشا ۇزدىك دەپ تانىلعان جۇمىستار قارتتار ۇيىنە تاپسىرىلادى.
قاراعاندى
