سونداي-اق بۇل اۋقىمدى شاراعا وننان استام ەلدىڭ پرەزيدەنتى مەن ۇكىمەت باسشىلارى قاتىسۋدا. اوسشك قۇرامىندا 27 مۇشە-مەملەكەت: اۋعانستان, ازەربايجان, بانگلادەش, باحرەين, ءباا, ۆەتنام, يزرايل, يوردانيا, يراك, يران, قازاقستان, كامبودجا, كاتار, قىرعىزستان, قىتاي, مىسىر, موڭعوليا, پالەستينا, پاكىستان, كورەيا رەسپۋبليكاسى, رەسەي, تاجىكستان, تايلاند, تۇركيا, وزبەكستان, ءۇندىستان, شري-لانكا بار. سونداي-اق اوسشك-ءنى شاقىرۋ تۋرالى يدەيا بىرقاتار مەملەكەتتەردەن جانە بۇۇ, ەقىۇ, امل (اراب مەملەكەتتەرى ليگاسى), تۇركپا, حالىقارالىق كوشى-قون ۇيىمى سياقتى حالىقارالىق ۇيىمداردان قولداۋ تاپتى.
بۇگىندە ازيا مەملەكەتتەرىنىڭ باسىن بىرىكتىرىپ وتىرعان ازياداعى ءوزارا ءىس-قيمىل جانە سەنىم شارالارى كەڭەسىن قۇرۋ تۋرالى باستامانى پرەزيدەنت نۇرسۇلتان نازارباەۆ 1992 جىلى بۇۇ-نىڭ باس اسسامبلەياسىنىڭ 47-سەسسياسىندا جاريا ەتكەن بولاتىن. باستامانىڭ نەگىزگى ماقساتى - وڭىردەگى بەيبىتشىلىك پەن قاۋىپسىزدىكتى قامتاماسىز ەتۋ جونىندەگى ءتيىمدى جانە قولايلى قۇرىلىم قۇرۋعا ۇمتىلۋ.
تاجىكستان اوسشك تاريحىندا كەڭەس توراعاسى بولعان ءتورتىنشى مەملەكەت. 2018 جىلى قىركۇيەكتە بۇۇ باس اسسامبلەياسىنىڭ 73-ءشى سەسسياسى اياسىندا فورۋمداعى توراعالىق قىتايدان تاجىكستانعا ءوتتى. تاجىك تاراپى ديالوگتاعى ءوز توراعالىعىنىڭ تاقىرىبىن «ورنىقتى دامۋ ارقىلى جالپىعا ورتاق بەيبىتشىلىك پەن قاۋىپسىزدىك» دەپ تاڭدادى.
اوسشك-گە مۇشە مەملەكەتتەر مەن ۇكىمەتتەر باسشىلارىنىڭ كەزدەسۋى ءتورت جىل سايىن وتەدى. سوڭعى رەت بۇل كەزدەسۋ 2014 جىلدىڭ مامىرىندا قىتاي حالىق رەسپۋبليكاسىنىڭ شانحاي قالاسىندا وتكەن.
