– ازياداعى ءوزارا ءىس-قيمىل جانە سەنىم شارالارى كەڭەسىنىڭ سامميتىنە كەلەر بولساق, ءسىز وسى فورۋمنىڭ باسىندا تۇردىڭىز جانە ونىڭ باستاماشىلارىنىڭ ءبىرى بولدىڭىز. تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆ 1992 جىلى بىرىككەن ۇلتتار ۇيىمىنىڭ مىنبەرىنەن وسىنداي ۇسىنىس جاساعان بولاتىن. سول باستاما قولداۋ تاۋىپ, سودان بەرى بۇل ۇدەرىس تابىستى دامىپ كەلەدى. ءسىزدىڭ وسى ۇيىمنىڭ دامۋىنا زور ۇلەس قوسقانىڭىزدى تاعى دا اتاپ وتكىم كەلەدى. ال, قازىر, ءىس جۇزىندە وسى جيىندى باسقارىپ وتىرسىز, – دەدى مەملەكەت باسشىسى.
قاسىم-جومارت توقاەۆ قازاقستان مەن تاجىكستاننىڭ كوپقىرلى قۇرىلىمدار مەن حالىقارالىق ۇيىمداردا ءبىر-بىرىنە قولداۋ كورسەتىپ كەلە جاتقانىن ايتىپ, وسى ىقپالداستىقتى جالعاستىرا بەرۋگە نيەتتى ەكەنىن جەتكىزدى.
تاجىكستان پرەزيدەنتى قاسىم-جومارت توقاەۆقا ءىلتيپات ءبىلدىرىپ, قازاقستان رەسپۋبليكاسىنىڭ پرەزيدەنتى بولىپ سايلانعاننان كەيىنگى ءبىرىنشى جۇمىس ساپارى ەكەنىن اتاپ ءوتتى.
– ەڭ الدىمەن, ءسىزدى قازاقستان رەسپۋبليكاسىنىڭ پرەزيدەنتى بولىپ سايلانۋىڭىزبەن قۇتتىقتايمىن. جوسپارلارىڭىز بەن باستامالارىڭىزدىڭ تابىستى جۇزەگە اسۋىنا تىلەكتەسپىن. سايلاۋ قورىتىندىسى حالقىڭىزدىڭ قازاقستاننىڭ ىشكى جانە سىرتقى ساياسي باعدارىن جۇزەگە اسىرۋ ىسىندەگى ساباقتاستىقتى قولدايتىنىن تاعى دا دالەلدەدى, – دەدى ەمومالي راحمون.
تاجىكستان كوشباسشىسى قازاقستانمەن ىنتىماقتاستىقتىڭ ءوز مەملەكەتىنىڭ سىرتقى ساياساتىندا ماڭىزدى ورىنعا يە ەكەنىن اتاپ ءوتتى. ونىڭ پايىمداۋىنشا, بىرلەسكەن كۇش-جىگەردىڭ ارقاسىندا ەكى ەل اراسىنداعى ستراتەگيالىق ارىپتەستىك بولاشاقتا دا جەمىستى دامي بەرەدى.
كەلىسسوزدەر سوڭىندا تاراپتار دۋشانبە ءسامميتىنىڭ قاتىسۋشى ەلدەر ءۇشىن كەڭەس ءسامميتىنىڭ ارالىق جۇمىسىنىڭ قورىتىندىسىن شىعارۋعا, ايماقتاعى تۇراقتىلىق پەن قاۋىپسىزدىكتى قامتاماسىز ەتۋ ماسەلەلەرى جونىندە پىكىر الماسۋعا جانە بولاشاقتاعى باعىتتارى مەن باسىمدىقتارىن ايقىنداۋعا مۇمكىندىك بەرەتىنىن اتاپ ءوتتى.
رەسمي كەزدەسۋدەن كەيىن ەمومالي راحمون قاسىم-جومارت توقاەۆقا ءوزىنىڭ رەزيدەنتسياسى – ۇلت سارايىن تانىستىردى.
