وڭتۇستىك كورەيا قارسى سوققىعا دايىن
بەيسەنبى, 7 ناۋرىز 2013 7:19
وڭتۇستىك كورەيا ەگەر كحدر وزىنە قاتىستى اسكەري كۇش قولدانار بولسا, ءوزىنىڭ دە قارسى سوققى بەرۋگە دايىن ەكەنىن حابارلادى. وڭتۇستىك كورەيانىڭ اسكەري بيلىگى مۇنداي مالىمدەمەنى پحەنياننىڭ اقش پەن وڭتۇستىك كورەيانىڭ بىرلەسكەن اسكەري جاتتىعۋلارىن بولدىرماۋ تۋرالى تالابىنا بايلانىستى جاساپ وتىر.
بەيسەنبى, 7 ناۋرىز 2013 7:19
وڭتۇستىك كورەيا ەگەر كحدر وزىنە قاتىستى اسكەري كۇش قولدانار بولسا, ءوزىنىڭ دە قارسى سوققى بەرۋگە دايىن ەكەنىن حابارلادى. وڭتۇستىك كورەيانىڭ اسكەري بيلىگى مۇنداي مالىمدەمەنى پحەنياننىڭ اقش پەن وڭتۇستىك كورەيانىڭ بىرلەسكەن اسكەري جاتتىعۋلارىن بولدىرماۋ تۋرالى تالابىنا بايلانىستى جاساپ وتىر.
بۇعان دەيىن كحدر ەگەر وڭتۇستىك كورەيا مەن اقش 2013 جىلدىڭ 11 ناۋرىزىنا بەلگىلەنگەن بىرلەسكەن اسكەري جاتتىعۋلاردى وتكىزۋدەن باس تارتپايتىن بولسا, وندا 1953 جىلعى ءبىتىمدى بۇزاتىندىعىن مالىمدەگەن بولاتىن. ايتا كەتۋ كەرەك, كسرو مەن قحر-دىڭ قولداۋىنداعى كوممۋنيستىك سولتۇستىك پەن بىرىككەن ۇلتتار ۇيىمىنىڭ قولداۋىنداعى كاپيتاليستىك وڭتۇستىك اراسىنداعى كورەي سوعىسى تەك بىتىمگە قول قويۋ ارقىلى عانا توقتاتىلعان بولاتىن. ءبىر جاعىنان سولتۇستىك كورەيا مەن قىتاي, ەكىنشى جاعىنان بۇۇ اسكەرلەرى ء(ىس جۇزىندە اقش وكىلدەرى) قول قويعان سول ءبىتىم ءفورمالدى تۇردە كۇنى بۇگىنگە دەيىن كۇشىندە تۇر. سونىمەن بىرگە, امەريكا اسكەرلەرىنىڭ ءالى كۇنگە وڭتۇستىك كورەيا اۋماعىنان كەتپەگەنىن دە ەسكە سالا كەتۋ قاجەت.
كاردينالدار بەنەديكتكە العىس ايتتى
بۇرناعى كۇنى كونكلاۆقا دايىندالۋعا جانە ونى وتكىزەتىن كۇندى بەلگىلەۋدى تالقىلاۋ ماقساتىندا ۆاتيكانعا كەلگەن كاردينالدار بۇرىنعى ريم پاپاسى بەنەديكت حVI-عا العىس حات جولدادى. ۆاتيكانعا جينالعان كاردينالدار ونىڭ ريم كاتوليك شىركەۋىنىڭ يەسى رەتىندە بولعان بارلىق جارقىن كەزەڭىنە, سونداي-اق كاتوليك شىركەۋى مەن بۇكىل الەم ءۇشىن كورسەتكەن ىزگى نيەتتى قايىرىمدىلىعى ءۇشىن تاعى دا ريزاشىلىق بىلدىرە وتىرىپ قۇرمەتتى پونتيفيككە بەرىلگەندىكپەن العىس ايتادى, دەلىنگەن كاردينالدار جولداۋىندا. سونىمەن بىرگە, تەلەگراممادا كاردينالدار العىسىنىڭ ونىڭ قاجىرلى ەڭبەگىن بۇكىل كاتوليك شىركەۋىنىڭ مويىنداۋى بولىپ تابىلاتىندىعى دا كەلتىرىلگەن.
بوسقىندار سانى ميلليونعا جەتتى
سيريادان شىققان بوسقىندار سانى ميلليون ادامعا جەتكەن. بۇل تۋرالى بۇۇ-عا سىلتەمە جاساي وتىرىپ, رەيتەر اگەنتتىگى حابارلاعان. وسى اگەنتتىك كەلتىرگەن مالىمەتتەرگە قاراعاندا, بوسقىنداردىڭ تەڭ جارتىسى جاستارى 11-گە دە جەتپەگەن بالالار كورىنەدى.
ميلليونعا جۋىق ادام باسقا جاقتارعا كەتتى, تاعى ميلليون ادام ەل ىشىندە تۇرعىلىقتى جەرلەرىن اۋىستىرۋدا, مىڭداعان ادام كۇن سايىن شەكارادان وتۋدە, دەپ مالىمدەگەن بۇۇ-نىڭ بوسقىندار ءىسى جونىندەگى جوعارعى كوميسسارى انتونيۋ گۋتەرريش. ولارعا كومەك كورسەتۋ ءۇشىن ءبىز قولدان كەلگەننىڭ ءبارىن جاساپ جاتىرمىز. بۇل قاسىرەتتى توقتاتۋ قاجەت, دەپ اتاپ كورسەتكەن ول. بۇۇ-نىڭ مالىمەتتەرى بويىنشا, سوڭعى ەكى ايدا عانا 400 مىڭنان استام ادام سيريادان كەتۋگە ءماجبۇر بولعان. ءسوز ورايىندا سيريادا 22,5 ميلليون حالىق تۇراتىنىن ايتا كەتۋ كەرەك.
مينيستر كورولگە انت بەردى
بەلگيانىڭ جاڭا قارجى ءمينيسترى 55 جاستاعى كۋن گەنس وتكەن سەيسەنبى كۇنى بەلگيالىقتار كورولى البەرت ەكىنشىگە انت بەردى. بۇعان دەيىن ول لەۆەن ۋنيۆەرسيتەتىنىڭ پروفەسسورى لاۋازىمىندا قىزمەت اتقارعان بولاتىن.
گەنستى مينيسترلىك لاۋازىمعا بەلگيانىڭ پرەمەر-ءمينيسترى ۇسىنعان ەدى. ال وعان دەيىنگى مينيستر ستەۆەن ۆاناكەرە, بۇقارالىق اقپارات قۇرالدارىنىڭ حابارلاۋىنشا, الەۋمەتتىك ۇيىمنىڭ اكتسيالارىن ساتىپ الۋعا قاتىستى ءىستى ادال جۇرگىزبەگەنى ءۇشىن وتستاۆكاعا كەتكەن بولاتىن. باق-تىڭ مالىمەتتەرىنە قاراعاندا, اتالمىش داۋ-جانجالعا كولەمى جاعىنان بەلگياداعى ەكىنشى قارجى ۇيىمى سانالاتىن Belfius بانكتىڭ دە قاتىسى بار كورىنەدى. كۋن گەنستىڭ قارجى قۇقىعى ماسەلەسىنە ماماندانىپ جۇرگەنىن دە ايتا كەتۋ قاجەت.
سۋ استى فلوتىن قۇرۋعا كومەكتەسپەك
رەسەي ۆەتنامعا سۋ استى فلوتىن قۇرۋعا كومەكتەسپەك. حانويدا رەسەي قورعانىس ءمينيسترى سەرگەي شويگۋ وسىنداي مالىمدەمە جاسادى.
بيىل ءبىزدىڭ بىرلەسكەن كۇش-جىگەرىمىزدىڭ ارقاسىندا ۆەتنام رەسپۋبليكاسى اسكەري-تەڭىز فلوتىنىڭ تاريحىندا جاڭا پاراق اشىلادى – سۋ استى فلوتى پايدا بولادى, دەپ اتاپ كورسەتكەن س.شويگۋ ۆەتنامدىق ارىپتەسى فۋانگ كۋانگ تحانمەن كەزدەسۋدەن كەيىن. سونىمەن بىرگە, س.شويگۋ ۆەتنام قورعانىس مينيسترىمەن سۇڭگۋىر قايىقتاردى دايىنداۋ مەن ەكيپاجدى دايىنداۋ ماسەلەلەرىن ۇيلەستىرۋ جونىندەگى ماسەلەنىڭ تالقىلانعانىن دا جەتكىزگەن.
ازاتتىعى جوق ادام اسكەردە قالاي قىزمەت ەتكەن؟
دجالال-ابادتىڭ بۇرىنعى اسكەري كوميسسارى كۋرمانبەك ابدرايماحۋنوۆ قىرعىزستاننىڭ ازاماتى بولىپ تابىلمايتىن وزبەكستان تۇرعىنىنىڭ قىرعىز ارمياسى قاتارىندا قىزمەت ەتۋىنە كومەكتەسكەن, دەپ حابارلادى مۇقك. بۇگىندە ابدرايماحۋنوۆقا قاتىستى قىلمىستىق ءىس قوزعالعان.
20 جاسار ساردوربەك تەميروۆ توتەنشە جاعدايلار مينيسترلىگىنىڭ دجالال-اباد وبلىسى تاش-كۋمىر قالاسىنداعى اسكەري بولىمىنە «زاڭسىز» شاقىرىلعان, دەپ اتاپ كورسەتىلگەن مەملەكەتتىك ۇلتتىق قاۋىپسىزدىك كوميتەتىنىڭ ءباسپاسوز رەليزىندە. مۇقك مالىمەتتەرىنە قاراعاندا, تەميروۆ وزبەكستان تۇرعىنى بولعانىمەن, ونىڭ ءوزى «ازاماتتىعى جوق ادام» كورىنەدى. ارنايى قىزمەت ونىڭ 2012 جىلدىڭ جەلتوقسانىندا اسكەرگە شاقىرىلۋىنا دجالال-اباد قالالىق بىرلەسكەن اسكەري كوميسسارياتىنىڭ باستىعى پودپولكوۆنيك كۋرمانبەك ابدرايماحۋنوۆتىڭ جاعداي تۋعىزعانىن انىقتاعان. قازىرگى ۋاقىتتا وسى ءىس بويىنشا تەرگەۋ جالعاسۋدا.
پرەمەر دەموكرات-مينيسترلەردى قىزمەتتەرىنەن بوساتپاق
5 ناۋرىزدا كوممۋنيستەر پارتياسى مەن دەموكراتيالىق پارتيا دەپۋتاتتارى سەنىمسىزدىك ۆوتۋمىن بىلدىرگەن مولداۆيانىڭ قازىرگى پرەمەر-ءمينيسترى ۆلاديمير فيلات ءوزى وتستاۆكاعا كەتكەنگە دەيىن دەمپارتيادان تاعايىندالعان بارلىق مينيسترلەردى قىزمەتتەرىنەن بوساتپاق نيەتتە.
ونىڭ ايتۋىنشا, دەموكرات-دەپۋتاتتار مينيسترلەر كابينەتىنە سەنىمسىزدىك بىلدىرگەننەن كەيىن وسى پارتيادان تاعايىندالعان مينيسترلەر «ىقتيمال ارانداتۋشىلار» رەتىندە جاڭا قۇرام جاساقتالعانعا دەيىن جۇمىستارىن جالعاستىراتىن ۇكىمەت قۇرامىندا قالا المايدى. سونىمەن بىرگە, ول پارلامەنت توراعاسى ماريان لۋپۋدىڭ دا وتستاۆكاعا كەتۋىن كۇتەتىنىن مالىمدەگەن. ال دەموكراتيالىق پارتيادان سايلانعان لۋپۋ بولسا ءوز ەركىمەن وتستاۆكاعا كەتپەيتىنىن ايتقان.
ينتەرنەت ماتەريالدارى نەگىزىندە ازىرلەندى.
