اۋەسقوي بوكستى دامىتىپ, ناسيحاتتاۋدى ماقسات ەتكەن ءداستۇرلى دودا بيىل 11-رەت ۇيىمداستىرىلدى. ەلىمىزدىڭ 11 وڭىرىنەن جانە رەسەي, ازەربايجان, وزبەكستان, قىرعىزستان, تاجىكستان مەملەكەتتەرىنەن كەلگەن 100-گە جۋىق بىلعارى قولعاپ شەبەرى بەس كۇن بويى جارىس كورىگىن قىزدىردى. تۋرنير قورىتىندىسى بويىنشا قازاقستان ۇلتتىق قۇراماسى 9 التىن, 7 كۇمىس, 10 قولا مەدالعا يە بولدى. اتىراۋلىق ءۇش بوكسشى - ساداي فارزاليەۆ, ولجاس باينيازوۆ, رايس نۇرقانات جوعارى ناتيجەگە قول جەتكىزىپ, التىننان القا تاقتى.
وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ: «قانشا عاسىر وتسە دە, قازاق باتىرلارىنىڭ ەرلىكتەرى ۇرپاق جادىنان وشپەيدى. جىل سايىن بۇل جارىستىڭ اۋقىمىن كەڭەيتىپ, ءادىل جانە جوعارى دەڭگەيدە وتكىزۋگە تىرىسامىز. جاستاردى سپورتقا باۋلىپ, وتانسۇيگىشتىككە تاربيەلەيتىن مۇنداي شارالاردىڭ ماڭىزى زور», - دەيدى.
اتىراۋ
