رمياندار سەرج سارگسياندى تاڭدادى. نەگە؟
جۇما, 22 اقپان 2013 7:02
ارمەنيادا سايلاۋ ءوتتى. حالىق قازىرگى پرەزيدەنت سەرج سارگسياننىڭ ۇستاعان باعىتىن قولدادى. سايلاۋعا قاتىسقانداردىڭ 58,6 پايىزى ونى جاقتاپ داۋىس بەردى.
ءبىرىنشى تۋر بولعاندىقتان دا مۇنى جوعارى كورسەتكىش دەپ باعالاعان ءجون. بۇل ەلدە ساياسي پارتيالار, توپتار جەتكىلىكتى. حالىقتىڭ ساياسي بەلسەندىلىگى دە ايتارلىقتاي جوعارى. بۇل سايلاۋدى سەرج سارگسياننىڭ العاشقى مەرزىمدەگى جۇمىسىنا باعا دەپ قابىلداۋعا بولعانداي.
جۇما, 22 اقپان 2013 7:02
ارمەنيادا سايلاۋ ءوتتى. حالىق قازىرگى پرەزيدەنت سەرج سارگسياننىڭ ۇستاعان باعىتىن قولدادى. سايلاۋعا قاتىسقانداردىڭ 58,6 پايىزى ونى جاقتاپ داۋىس بەردى.
ءبىرىنشى تۋر بولعاندىقتان دا مۇنى جوعارى كورسەتكىش دەپ باعالاعان ءجون. بۇل ەلدە ساياسي پارتيالار, توپتار جەتكىلىكتى. حالىقتىڭ ساياسي بەلسەندىلىگى دە ايتارلىقتاي جوعارى. بۇل سايلاۋدى سەرج سارگسياننىڭ العاشقى مەرزىمدەگى جۇمىسىنا باعا دەپ قابىلداۋعا بولعانداي.
ءسىرا, وسىنداي جاعدايدى اڭعارعان ءبىراز ساياساتكەرلەر, وعان بەلگىلى دارەجەدە باسەكەلەس بولعانداي ءبىرنەشە بەدەلدى قايراتكەرلەر كۇنى بۇرىن سايلاۋعا قاتىسۋدان باس تارتتى. بۇل رەتتە بۇرىنعى پرەزيدەنت لەۆون تەر-پەتروسيان, «وركەندەگەن ارمەنيا» پارتياسىنىڭ كوسەمى, بيزنەسمەن گ.تسارۋكياندى ايتۋعا بولار ەدى. ال كۇرەسكە قوسىلعاندار اراسىنان, ءارتۇرلى, ءتىپتى ەكزوتيكالىق مىنەزدى ادامدى دا كەزدەستىرەسىڭ. سول مىنەزدەرىن كورسەتىپ, كۇلكى تۋدىرعاندارى دا بولدى. ءسويتىپ, العاشقى 15 ۇمىتكەردەن سوڭعى كۇرەسكە 7 ادام شىقتى.
ولاردىڭ ىشىندە بۇرىنعى لاۋازىمى جوعارىلاۋى ەكس-پرەمەر گراند باگراتيان بولسا, ايقايى كۇشتىلەۋى بۇرىنعى سىرتقى ىستەر ءمينيسترىنىڭ ورىنباسارى راففي وۆانەسيان ەدى. «ۇلتتىق ءوزىن ءوزى ايقىنداۋ» بىرلەستىگى پارتياسىنىڭ كوسەمى پارۋير ايريكيان, تاۋداعى قاراباقتىڭ سىرتقى ىستەر ءمينيسترى بولعان ارمان مەليكيان, ساياساتكەر اندرەس گۋكوسيان جانە ءوزىن ءوزى ۇسىنعان ۆاردان سەدريكيان – ساياسي ويىن دۇرمەگىنە جاي قوسىلعاندار. بۇلاردىڭ اراسىنان جەڭىپ شىعۋ سەرج سارگسيانعا قيىنعا سوققان جوق.
سايلاۋدا راففي وۆانەسياننىڭ 36,7 پايىز داۋىس جيناپ, ەكىنشى ورىن العانى ءبىراز جۇرتتى تاڭداندىردى. ونىڭ دا كوپ قۇپياسى جوق. ول سايلاۋ ناۋقانىن باستاعاندا, تاۋداعى قاراباق رەسپۋبليكاسىنا بىردەن تاۋەلسىزدىك بەرەمىن دەپ مالىمدەدى. بۇل رەسپۋبليكادا ءبىراز حالىق تۇرادى, تاۋەلسىزدىك دەگەن ءتاتتى ۇعىم ءبىراز داۋىستى وۆانەسيانعا الىپ بەردى. باسقا ۇمىتكەرلەردىڭ بارلىعىنىڭ داۋىسىن قوسقاندا 10 پايىزدىڭ توڭىرەگىندە. سودان دا سارگسياننىڭ جەڭىسى قيسىندى دا زاڭدى.
ارمەنيا – شاعىن عانا ەل. حالقىنىڭ سانى 3 ميلليون توڭىرەگىندە. جەرى – 29,74 مىڭ شارشى كم. مەملەكەتتىك سيپاتى – دەموكراتيالىق پرەزيدەنتتىك رەسپۋبليكا. ەل باسشىسى – پرەزيدەنت. مىڭداعان جىلدىق تاريحى بار ەل. بىراق ەشكىم دە ءبىز مىناداي بولعانبىز دەپ, كوكىرەك سوقپايدى. سول تاريحىن جالعاستىرىپ جاتىر. جەرى شاعىن جانە وندا قازبا بايلىق از. بىراق ونىڭ ەسەسىنە وتە تالانتتى حالقى بار. ول ءوز كۇندەرىن كورىپ قانا قويمايدى, ونەرىمەن, ەڭبەكقورلىعىمەن, كاسىپقورلىعىمەن ەلىن الەمگە تانىتادى. سودان دا ارمەنيا دەيتىن ەلدى, مەملەكەتتى, ارميان دەيتىن حالىقتى جۇرتتىڭ ءبارى بىلەدى.
قازىرگى ەكونوميكالىق كورسەتكىشتەرمەن قاراعاندا, ەلدىڭ دەڭگەيى جوعارى ەمەس. ءتىپتى حالقىنىڭ ءبىرازى تابىستارىن سىرتتان تاۋىپ ءجۇر. ارمياندار ءوز ەلىندەگىلەرگە قاراعاندا, سىرتقا ەڭ كوپ شاشىلعان حالىق ەكەن. ولار بۇل جونىندە ەۆرەيلەردى دە ارتقا تاستاعان كورىنەدى. بىراق كوشە سىپىرعان, اربا سۇيرەگەن, بىرەۋگە قۇل بولىپ جۇرگەن ارمياندى تابا المايسىڭ. ولار باسقالارعا جۇمىس ىستەتەدى. بىلگەن سوڭ. اقش, فرانتسيا سياقتى ەلدەردە ميللياردەر ارمياندار بولسا, ميلليونەرلەردى كوپ ەلدەن تاباسىڭ. سىرتتا ءجۇرىپ ەلىن ۇمىتپايدى. ءداستۇرىن, ءتىلىن ۇمىتپايدى. قانداستارىنا قامقور بولىپ جۇرەدى.
ەلگە كىم باسشى بولىپ سايلانسا دا, ەڭ الدىمەن, ولار سول تالانتتى حالقىنا ارقا سۇيەيدى. ەل الدىندا ۇلكەن مىندەتتەر تۇر. حالقىن اش ەتپەۋ ءوز الدىنا, شاعىن ەلىن سوعىس سياقتى كەساپاتتان ساقتاپ قالۋى كەرەك. بۇل ەلدىڭ باسقالارمەن جەكە تىرەسىپ سوعىسۋعا شاماسى جوق. سودان رەسەيدەي الىپ ەلگە ارقا سۇيەيدى, باسقالارمەن دوستاسادى. سارگسيان وتكەن بەس جىلدا سولاي ەتتى. ارمياندار سوندىقتان دا الداعى بەس جىلدىقتا دا ءوز تاعدىرىن تاعى دا ونىڭ قولىنا ۇستاتتى.
ماماديار جاقىپ,
«ەگەمەن قازاقستان».
