09 ماۋسىم، 2019

وسكەمەندە سايلاۋشىلار قىمىزدارىن ءىشىپ، داۋىستارىن بەرىپ جاتىر

620 رەت كورسەتىلدى

حالىقتىڭ داۋىس بەرۋگە بەلسەندى تۇردە كەلىپ جاتقانىن مەكتەپ سىرتىنداعى قاپتاعان كولىكتەردەن-اق اڭعارۋعا بولاتىنداي.


شىعىس قازاقستاندا داۋىس بەرۋ جالعاسىپ جاتىر.

ءۇش ساعات بۇرىن وبلىس اكىمى دانيال احمەتوۆ وسكەمەندەگى №42 مەكتەپ عيماراتىندا ورنالاسقان №9 سايلاۋ ۋچاسكەسىنە كەلىپ، داۋىس بەردى.

ءبىز قالاداعى جىبەك ماتالار ىقشام اۋدانىنداعى №46 ورتا مەكتەپتە ورنالاسقان №95 جانە 97 سايلاۋ ۋچاسكەلەرىنە بارىپ، داۋىس بەرۋ پروتسەسىن كورىپ قايتتىق.

حالىقتىڭ داۋىس بەرۋگە بەلسەندى تۇردە كەلىپ جاتقانىن مەكتەپ سىرتىنداعى قاپتاعان كولىكتەردەن-اق اڭعارۋعا بولاتىنداي. «تۇرعىندار وتە بەلسەندى. ساعات 7-دەن بەرى تولاسسىز كەلىپ جاتىر. ءبىزدىڭ اۋدان - جاستاردىڭ اۋدانى. جاڭا ۇيلەر كوپتەپ سالىنىپ جاتىر. جاستار اتا-اناسىمەن، بالا-شاعاسىمەن كەلىپ جاتىر. مىنە، قازىرگى ۋاقىتتا، ساعات 11:30-دا سايلاۋشىلاردىڭ ۇشتەن ءبىر بولىگى داۋىس بەردى دەۋگە بولادى. داۋىس بەرۋ پروتسەسىن ەكى باقىلاۋشى باقىلاپ وتىر. تمد باقىلاۋشىلارى ءسال كەيىنىرەك كەلەدى» دەيدى №97 سايلاۋ كوميسسياسىنىڭ توراعاسى سۆەتلانا افاناسەۆا.

وسى سايلاۋ ۋچاسكەسىندە داۋىس بەرىپ شىققان اقساقالدى دا سوزگە تارتتىق. «نە ايتام؟! ءوزىم قالاعان ادامعا داۋىس بەردىم. ءبىز جاڭا كوشەدە تۇرامىز. تاياۋدا الماتىدان كەلىپ ەدىم. ءبىر كەمشىلىك، ۇگىتشىلەر بىزگە كەلمەدى، قاي ۋچاسكەدەن داۋىس بەرەتىنىمىزدى ايتپادى» دەيدى وسكەمەن قالاسىنىڭ 77 جاستاعى تۇرعىنى اسكەربەك مۇسابەكوۆ.

وسى مەكتەپتىڭ كىرەبەرىسىندە ورنالاسقان №95 سايلاۋ ۋچاسكەسىندە كىسى قاراسى ءتىپتى قالىڭ ەكەن. سايلاۋ ۋچاسكەسىنە كىرمەس بۇرىن مەكتەپ اۋلاسىندا اقجاۋلىقتى اجەنى جولىقتىردىق. «جاستار پاتريوت بولىڭدار» دەگەن وسكەمەننىڭ قارت تۇرعىنى گۇلزيپا ماتاەۆا، جاسى 83-تە، وبلىس ورتالىعىنا 1995 جىلى كوشىپ كەلگەنىن، بۇرىن كۇرشىم اۋدانىندا مۇعالىمدىك قىزمەت اتقارعاندىعىن ايتتى.

№95 سايلاۋ ۋچاسكەسىنىڭ كىرە بەرىسىنەن ساتۋشىلار ورىن الىپتى. قىمىز، باسقا دا تاماق ونىمدەرىن ساۋداعا قويىپتى. كەيبىر ادامدار كەزەككە تۇرىپ، قىمىزدان ءدام تاتىپ جاتتى. ال ىشتە داۋىس بەرۋ كەزەگىندە تۇرعان تۇرعىندار قاتارى قالىڭ ەكەندىگىن اڭعاردىق. تۇرعىنداردىڭ كوپتىگى سونداي، №95 سايلاۋ كوميسسياسىنىڭ ءتورايىمى قولىنىڭ تيمەي جاتقاندىعىن ايتىپ، سۇراعىمىزعا جاۋاپ بەرۋگە مۇمكىندىگى جوقتىعىن جەتكىزدى. دەسەك تە وسى سايلاۋ ۋچاسكەسىندەگى باقىلاۋشىلاردىڭ ءبىرىن از-كەم اڭگىمەگە تارتتىق. «تاڭعى ساعات 7-دەن بەرى باقىلاپ وتىرمىز. حالىق وتە بەلسەندى. ەشقانداي زاڭ بۇزۋشىلىقتى بايقاعان جوقپىز. بۇل مەكتەپتە ەكى بىردەي سايلاۋ ۋچاسكەسى ورنالاسقان. وسى ۋچاسكە بويىنشا 2437 ادام داۋىس بەرەدى ەكەن» دەيدى «امانات» ازاماتتىق پلاتفورماسى اتىنان سايلاۋدى باقىلاپ وتىرعان باقىلاۋشى بولات ايتمۇحامبەتوۆ.

ايتا كەتەيىك، شىعىس قازاقستاندا 1040 سايلاۋ ۋچاسكەسى قۇرىلعان. ال وبلىس ورتالىعى – وسكەمەن قالاسىندا 120 سايلاۋ ۋچاسكەسى جۇمىس ىستەپ تۇر.

وسكەمەن

سۋرەتتەردى تۇسىرگەن تىلەۋبەك شاياحمەت

سوڭعى جاڭالىقتار

ۇقساس جاڭالىقتار