ىرىكتەۋ كەزەڭىنىڭ ءۇشىنشى جانە ءتورتىنشى تۋر اياسىندا قازاقستان قۇراماسى رەيتينگ بويىنشا الەمنىڭ ەڭ ۇزدىك جانە ەڭ ناشار كومانداسىمەن جولىعادى. جەرلەستەرىمىز ءۇشىن سىرت الاڭداعى ويىن ماڭىزدى بولماق. ويتكەنى ۇلتتىق قۇراما ەدەن ازار باستاعان الەمىڭ ەڭ ۇزدىك فۋتبولشىلارىنا قارسى وينايدى. ءدال قازىرگى ۋاقىتتا بەلگيا فيفا رەيتينگىندە كوش باستاپ تۇر. جالپى, 2018 جىلعى الەم چەمپيوناتىنىڭ قولا ءجۇلدەگەرى اتانعان قۇرامانى تانىستىرۋدىڭ ءوزى ارتىق.
بەلگيا قۇراماسى قازاقستاندىق فۋتبولشىلارعا جاقسى تانىس. ويتكەنى ەكى قۇراما وسىمەن ءۇشىنشى رەت ەۋروپا چەمپيوناتىنىڭ ىرىكتەۋ كەزەڭىندە ءبىر توپتا سىنعا تۇسۋدە. ەڭ العاش 2008 جىلعى ەۋروپا چەمپيوناتىنىڭ جانە 2012 جىلعى بىرىنشىلىكتىڭ ىرىكتەۋ كەزەڭىندە «ا» توبىندا ويناعان. بۇل جولى «I» توبىندا جولداما ءۇشىن تالاسۋدا. جالپى, ەكى قۇراما بۇگىنگە دەيىن ءتورت رەت كەزدەسكەن. ەكى ويىندا تەڭ ناتيجە تىركەلسە, ەكى ماتچتا بەلگيا فۋتبولشىلارى جەڭىس تويىن تويلادى.
ەكى قۇرامانىڭ العاشقى تانىستىعى سوناۋ 2006 جىلى بريۋسسەلدە باستالعان. تۇڭعىش رەت كەزدەسكەن قوس قۇراما ءبىر-ءبىرىنىڭ قاقپاسىنا ساڭىلاۋ تابا الماي, تەڭ ناتيجەگە ريزا بولىپ تارقاسقان ەدى. كەلەسى جىلى الماتىنىڭ ورتالىق ستاديونىندا وتكەن قارىمتا كەزدەسۋدە دە 2:2 ەسەبىمەن تەڭ ءتۇستى. ويىنداعى ەسەپتى العاش بولىپ 12-مينۋتتا بەلگيا فۋتبولشىسى كارەل گەرەرتس اشقان بولاتىن. اراعا 12-مينۋت سالىپ كەۆين ميرالياس ەسەپتى 2:0-گە جەتكىزدى. ءبىرىنشى تايم اياقتالار تۇستا قازاقستان قۇراماسىنان دميتري بياكوۆ ەسەپتى قىسقارتۋعا ءمۇمكىندىك الدى. ەكىنشى تايمنىڭ 75-مينۋتىندا سامات سماقوۆ پەنالتيدەن ەسەپتى تەڭەستىرىپ, قازاقستان قۇراماسىنا ماڭىزدى ءبىر ۇپاي سىيلاعان ەدى.
اراعا ءۇش جىل سالىپ ەكى كوماندانىڭ جولى 2012 جىلعى ەۋرو دوداسىنىڭ ىرىكتەۋ جارىسىندا قايتا ءتۇيىستى. العاشقى ويىن 2010 جىلى قازاندا استانادا ءوتتى. «استانا ارەناداعى» ماتچتا قوناقتار قاقپامىزعا جاۋاپسىز ەكى گول سوعىپ, بەلگياعا ماڭىزدى ءۇش ۇپايمەن ورالعان ەدى. ويىنداعى ەكى گولدى دا مارۆين وگۋنجيمي سوققان بولاتىن. كەزدەسۋدىڭ 68-مينۋتىندا قورعاۋشى الەكساندر كيسليتسىن قىزىل قاعاز الىپ, قازاقستان قۇراماسىن قيىن جاعدايدا قالدىرىپ كەتكەنىن دە ايتا كەتەيىك. 2011 جىلدىڭ قازان ايىندا بەلگيادا وتكەن قارىمتا كەزدەسۋدە الاڭ يەلەرى 4:1 ەسەبىمەن جەڭىسكە جەتتى. ءتورت گولدىڭ قارىمتاسى رەتىندە قازاقستان قۇراماسى ساپىنان جالعىز جۇبانىش گولىن قايرات نۇرداۋلەتوۆ سوقتى. ازىرشە ەكى قۇراما اراسىنداعى تەكەتىرەستە بەلگيانىڭ اسىعى الشىسىنان ءتۇسىپ تۇر.
بەلگيا الەم چەمپيوناتىنان كەيىن سەگىز رەت جاسىل الاڭعا شىعىپ, التى ويىندا جەڭىسكە جەتكەن. ءبىر كەزدەسۋدە تەڭ تۇسسە, ءبىر ماتچتا جەڭىلىسكە ۇشىراعان. سەگىز كەزدەسۋدە قارسىلاستار قاقپاسىنا 19 گول سوعىپ, ءوز قاقپاسىنا سەگىز گول ءوتكىزىپ العان. بەلگيا قۇراماسىنىڭ قازىرگى جاعدايى وسىنداي.
بيلەكتىڭ تاڭداۋى
قازاقستان قۇراماسىنىڭ باس باپكەرى ميحال بيلەك الداعى ەكى ويىندا ەل نامىسىن قورعايتىن فۋتبولشىلارىمىزدىڭ ءتىزىمىن جاريالادى. چەحيالىق مامان وتكەن ويىندارعا قاراعاندا بۇل قۇرامدى ءبىرشاما جاڭارتىپتى. قۇرامانىڭ جاڭارۋى دا زاڭدىلىق ەدى. ويتكەنى بيلەك مىرزا جىل باسىندا باس باپكەر بولىپ تاعايىندالعاندا قازاقستاندىق فۋتبولشىلاردى تانىمايتىن جانە ول بۇعان دەيىن ستويلوۆ قۇرىپ بەرگەن ءتىزىمدى شاقىرۋعا ءماجبۇر بولدى. ال قازىر قازاقستان چەمپيوناتىنداعى بىرنەشە ويىنعا ارنايى بارىپ, وزىنە قاجەت فۋتبولشىنى ءجىتى قاداعالاپ, كوزگە ءتۇسىپ جۇرگەندەرىن ۇلتتىق قۇراماعا شاقىرا باستادى. مىسالى, «قايسار» كلۋبىنىڭ قورعاۋشىسى الەكساندر ماروچكين مەن جارتىلاي قورعاۋشى اسحات تاعىبەرگەن, «جەتىسۋ» كومانداسىنىڭ قورعاۋشىسى ولجاس كەرىمجانوۆ بار. سونداي-اق ۇلتتىق قۇرامانىڭ ەڭ كوپ سىنعا ۇشىرايتىن شابۋىل سىزىعىنا بيلەك مىرزا ەكى بىردەي جاڭا فۋتبولشىنى شاقىرىپتى. وتكەندە عانا «استانا» كلۋبىنا سوققان گولى ارقىلى بىرقاتار فۋتبول ماماندارىنىڭ كوزىنە تۇسكەن «ورداباسىنىڭ» شابۋىلشىسى توقتار جاڭعىلىشباي مەن «اقتوبەنىڭ» جاس شابۋىلشىسى ابات ايىمبەتوۆتى دە الداعى ويىنعا شاقىرعان.
ميحال بيلەكتىڭ بۇل جولعى تىزىمىنە قورعاۋشى ەۆگەني پوستنيكوۆ, جارتىلاي قورعاۋشى سەرىكجان مۇجىقوۆ جانە شابۋىلشىلار رومان مۇرتازاەۆ, الەكسەي ششەتكين, ەركەبۇلان سەيداحمەت سەكىلدى فۋتبولشىلار ەنبەي قالدى. پوستنيكوۆ ۇلتتىق قۇراماداعى كارەراسىن اياقتاسا, سەيداحمەت 21 جاسقا دەيىنگى قازاقستان قۇراماسىنا شاقىرتۋ العان.
بەلگيا جانە سان-مارينومەن وتەتىن ويىندارعا شاقىرىلعان
24 فۋتبولشىنىڭ ءتىزىمى مىناداي:
قاقپاشىلار: ستاس پوكاتيلوۆ («قايرات»), دميترو نەپوگودوۆ («ورداباسى»), يگور ششاتسكي («شاحتەر»);
قورعاۋشىلار: ابزال بەيسەبەكوۆ, يۋري لوگۆينەنكو, دميتري شومكو (بارلىعى – «استانا»), عافۋرجان سۇيىمباەۆ, يان ۆوروگوۆسكي (ەكەۋى دە – «قايرات»), الەكساندر ماروچكين («قايسار»), تەمىرلان ەرلانوۆ, سەرگەي مالىي (ەكەۋى دە – «ورداباسى»), ولجاس كەرىمجانوۆ («جەتىسۋ»);
جارتىلاي قورعاۋشىلار: يۋري پەرتسۋح («استانا»), باۋىرجان يسلامحان, يسلامبەك كۋات, گەورگي جۋكوۆ (بارلىعى – «قايرات»), اسحات تاعىبەرگەن («قايسار»), الەكساندر مەركەل («حەراكلەس», گوللانديا), ماكسيم فەدين, ازات نۇرعاليەۆ (ەكەۋى دە – «توبىل»), باكتيەر زاينۋتدينوۆ («روستوۆ», رەسەي);
شابۋىلشىلار: باۋىرجان تۇرىسبەك («توبىل»), ابات ايىمبەتوۆ («اقتوبە»), توقتار جاڭعىلىشباي («ورداباسى»).
