«اق جول» دەموكراتيالىق پارتياسىنان پرەزيدەنتتىككە كانديدات دانيا ەسپاەۆا پاۆلودار وبلىسىنىڭ تۇرعىندارىن سايلاۋالدى باعدارلاماسىمەن تانىستىرىپ ءجۇر. ول ءوزىنىڭ سەنىم بىلدىرىلگەن ادامدارىمەن بىرگە ەكىباستۇز قالاسىنا بارىپ, جەرگىلىكتى كاسىپكەر, ەنەرگەتيكا جانە الەۋمەتتىك سالاداعى جۇمىسكەرلەرمەن كەزدەستى. ەكىباستۇزدا ەنەرگەتيكا, كومىر ونەركاسىبى, باعالى مەتالداردى ءوندىرۋ سالالارى جاقسى دامىعان. بۇگىنگى تاڭدا قالادا 8 مىڭداي شاعىن جانە ورتا بيزنەس نىساندارى بار. بىلتىردىڭ وزىندە جاڭادان 15 جاڭا كاسىپورىن اشىلدى.
ەكىباستۇزدا ۇمىتكەر جەرگىلىكتى ونەركاسىپ پەن الەۋمەتتىك وبەكتىلەرگە باردى. كەزدەسۋلەرگە جەرگىلىكتى بيزنەسمەندەرمەن قاتار قالانىڭ باسقا دا تۇرعىندارى قاتىسىپ, كانديداتتىڭ باعدارلاماسىنداعى نەگىزگى باعىتتارعا قىزىعۋشىلىق تانىتتى. «باعدارلامادا كاسىپكەرلەرگە شاعىن بيزنەستى ىنتالاندىرۋ ءۇشىن سالىقتى تومەندەتۋ, سالالار ءۇشىن قوسىمشا قۇن سالىعىنىڭ مولشەرلەمەسىن ازايتۋ قاراستىرىلعان ەكەن. تاۋار باعاسىنىڭ قۇنى وسىعان بايلانىستى بولعاندىقتان, بۇل – وتە وزەكتى ماسەلە. ماعان شاعىن جانە ورتا بيزنەس ءۇشىن بانكتەگى نەسيە مولشەرلەمەسىن تومەندەتۋ تۋرالى ويى ۇنادى. بۇل دا كوكەيكەستى ماسەلە», دەدى كاسىپكەر ۆيكتوريا وستريكوۆا.
«اق جول» پارتياسىنىڭ ۇمىتكەرىمەن كەزدەسۋ بارىسىندا تۇرعىندار الەۋمەتتىك ماسەلەلەردى دە كوتەردى. ەكىباستۇزداعى حالىق سانى 150 مىڭنان اسادى. مۇندا مەتاللۋرگ, ينجەنەر, شاحتەرلەردىڭ اۋلەتى تۇرادى. قالا تۇرعىندارىنىڭ سوزىنە قاراعاندا, سوڭعى جىلدارى مەكتەپ بىتىرۋشىلەر كورشى مەملەكەتكە وقۋعا تۇسە باستاعان. ولار وندا تەحنيكالىق باعىتتاعى ساپالى ءبىلىم الىپ, جۇمىسپەن قامتىلادى. بۇعان قاتىستى د.ەسپاەۆا ءوز ويىن ءبىلدىرىپ: «ءبىزدىڭ دارىندى جاستارىمىز سىرت جاققا كەتۋدە, بۇل ماسەلەگە باسا نازار اۋدارۋ قاجەت. ءبىرىنشىدەن, تەحنيكالىق قانا ەمەس, بارلىق سالا بويىنشا ءبىلىم ساپاسىن كوتەرۋ كەرەك. جوعارى وقۋ ورنىنان سوڭ بىتىرۋشىلەر جۇمىس تاجىريبەسىنىڭ جوقتىعىنا قاراماستان جۇمىسپەن قامتىلۋى ءتيىس», دەدى.
* * *
«اۋىل» حالىقتىق-دەموكراتيالىق پاتريوتتىق پارتياسى ۇسىنعان پرەزيدەنتتىككە كانديدات تولەۋتاي راقىمبەكوۆ ماڭعىستاۋ وبلىسىنىڭ تۇرعىندارىنا سايلاۋالدى باعدارلاماسىن تانىستىردى. ول قوعامدىق شتابىنىڭ وكىلدەرىمەن بىرگە ءار ايماققا ءتان ماسەلەلەردى كوتەرىپ, ونىڭ شەشۋ جولدارىن ۇسىندى.
«ماڭعىستاۋ وڭىرىنە كۇندەلىكتى تۇتىناتىن ازىق-ت ۇلىكتىڭ باسىم بولىگى باسقا ايماقتاردان اكەلىنەدى. سوعان سايكەس, باعا دا جوعارى. بۇل ماسەلەنى شەشۋ ءۇشىن اۋىل-ايماقتا جىلىجايلاردى كوبەيتۋ كەرەك. بۇعان قوسا شۇبات ءوندىرىسىن ءبىر جولعا قويىپ, تابىس كولەمىن ەسەلەپ ارتتىرۋعا بولادى. وسى تەكتەس باستامالارعا قازىر مەملەكەتتەن جاقسى قولداۋ بار. ەندى تۇرعىندارعا وسىنداي مۇمكىندىكتى ۇتىمدى پايدالانىپ, ىسكە اسىرىلىپ جاتقان ءىس-شارالاردان ۋاقتىلى حاباردار بولىپ, كاسىپ اشۋدىڭ ءتۇرلى تەتىكتەرىن ءتيىمدى قولدانۋ دا ماڭىزدى», دەدى تولەۋتاي راقىمبەكوۆ.
بۇعان قوسا كەزدەسۋلەر بارىسىندا جۇمىسسىزدىق ماسەلەسى كەڭىنەن تالقىلاندى. ويتكەنى مۇنايلى ولكە دەپ اۋىل جاستارى وسىندا اعىلادى. بىراق بارىنە بىردەي تۇراقتى جۇمىس تابىلمايدى. سوندىقتان پرەزيدەنتتىكتەن ۇمىتكەر قاتاڭ جانە قۇرعاق كليماتتى سىلتاۋراتا بەرمەي, سوڭعى تەحنولوگيالاردىڭ نەگىزىندە اۋىل شارۋاشىلىعىن جانداندىرۋعا كۇش سالۋ كەرەكتىگىن ايتتى. ونىڭ سايلاۋالدى باعدارلاماسى تەك اۋىل شارۋاشىلىعىن دامىتۋعا نەگىزدەلمەگەن. سونداي-اق باسپانامەن قامتۋ, ينفراقۇرىلىمدى دامىتۋ جانە جاستار ساياساتىنا قاتىستى دا باعىتتار بار. وڭىردەگى كەزدەسۋ بارىسىندا وسى ماسەلەلەر دە ەگجەي-تەگجەيلى باياندالدى.
سونىمەن قاتار كانديدات اتىراۋداعى دامبى بالىق ينسپەكتسياسىندا عىلىمي بالىق اۋلاۋ پروتسەسىمەن تانىسىپ, بالىقشىلارمەن جۇزدەستى. وندا وڭىردەگى بالىقشىلاردىڭ ەڭبەكاقىسىن ءوسىرۋ كەرەكتىگى ءسوز بولدى. ت.راقىمبەكوۆ بالىق شارۋاشىلىعىن دامىتۋعا ارنالعان, ناقتىراق ايتقاندا, اكۆامادەنيەت, يحتەولوگيا باعىتىندا مەملەكەتتىك دەڭگەيدە ءتيىستى ستراتەگيالىق تۇجىرىمداما قابىلدانۋى ءتيىس دەپ سانايدى.
* * *
كاسىپوداقتار فەدەراتسياسىنان پرەزيدەنتتىككە كانديدات امانگەلدى تاسپيحوۆتىڭ ماڭعىستاۋ وبلىستىق قوعامدىق شتابىنىڭ مۇشەلەرى ءبىلىم بەرۋ مەكەمەلەرىنىڭ قىزمەتكەرلەرىمەن كەزدەستى. سەنىم بىلدىرىلگەن ادامدار الدىمەن وبلىستىق ەنەرگەتيكا كوللەدجىنىڭ ۇجىمىمەن, سودان كەيىن اقتاۋ قالالىق تەحنولوگيالىق قىزمەت كورسەتۋ كوللەدجىنىڭ ەڭبەك ۇجىمىمەن جيىن وتكىزدى. وعان وبلىستىق كاسىپوداقتار ورتالىعى باسشىسىنىڭ ورىنباسارى تەلمان ماتاەۆ پەن ءبىلىم جانە عىلىم قىزمەتكەرلەرىنىڭ سالالىق كاسىپتىك وداعىنىڭ وبلىستىق ۇيىمىنىڭ ءتورايىمى تاربيا بايىمبەتوۆا قاتىسىپ, ءسوز سويلەدى.
باسقوسۋدا الماتى اۋىر ماشينا جاساۋ زاۋىتىندا ينجەنەر-تەحنولوگ بولىپ ەڭبەك جولىن باستاعان ا.تاسپيحوۆتىڭ ءومىربايانى تانىستىرىلدى. ت.ماتاەۆ ۇمىتكەردىڭ تۇعىرناماسىن جان-جاقتى اشىپ كورسەتىپ, بۇل قۇجاتتا قاراپايىم ەڭبەك ادامدارىنىڭ مۇددەسىن قورعاۋعا, حالىقتىڭ الەۋمەتتىك جاعدايلارىن كۇشەيتۋگە ارنالعان باعىتتار بارىن اتاپ ءوتتى. كەزدەسۋگە 120-دان اسا ادام قاتىسىپ, ا.تاسپيحوۆتىڭ سايلاۋالدى باعدارلاماسىن ءبىراۋىزدان قولدايتىندارىن جەتكىزدى.
سونىمەن قاتار سايلاۋالدى ناۋقان جۇمىستارىنىڭ اياسىندا نۇر-سۇلتان قالاسىنىڭ كاسىپوداق ورتالىعى ءمۇشەلەرى اقكول قالاسىنىڭ ىرگەسىندە ورنالاسقان بالالارعا ارنالعان «ارمان» دەنە شىنىقتىرۋ جانە ساۋىقتىرۋ ورتالىعىنا باردى. مۇندا ەلوردالىق ورتا مەكتەپتەر اراسىندا «تۋريستىك جيىن» ءوتتى. بۇل – تاستانبەك ەسەنتاەۆ باستاعان ەلوردالىق قوعامدىق شتابتىڭ كەزەكتى سايلاۋالدى ۇگىت-ناسيحات اكتسياسى. كاسىپوداق مۇشەلەرى مۇعالىمدەر مەن وقۋشىلار اراسىندا ءوز كانديداتتارىنىڭ تۇعىرناماسىن تانىستىرىپ, قولداۋ كورسەتۋگە شاقىردى.
جينالعان قاۋىم كانديدات ا.تاسپيحوۆتىڭ باعدارلاماسىنداعى ەڭبەك ۇجىمىنىڭ مارتەبەسىن كوتەرۋگە قاتىستى باعىتتارعا قىزىعۋشىلىق تانىتىپ, كوكەيلەرىندە جۇرگەن ماسەلەلەرىن ورتاعا سالدى. بۇعان قوسا, ەلىمىزدەگى ساياسي ناۋقانعا سەلقوس قارامايتىندارىن اڭعارتىپ, بەلسەندى قاتىساتىندارىن ايتتى.
* * *
قازاقستان كوممۋنيستىك حالىق پارتياسى اتىنان سايلاۋعا ءتۇسىپ جاتقان جامبىل احمەتبەكوۆتىڭ سەنىم بىلدىرىلگەن ادامى, الماتى وبلىستىق سايلاۋالدى شتابىنىڭ جەتەكشىسى س.بيعاروۆا تالدىقورعان قالاسىنا بارىپ, د.قوناەۆ اتىنداعى ەتنوگرافيكالىق مۋزەيدى ارالادى. سونداي-اق وقۋشىلار سارايىندا دا سايلاۋشىلارمەن كەزدەستى.
س.بيعاروۆا باتىستىڭ تەك پايدا ءۇشىن, كەز كەلگەن جولمەن اقشا تابۋدى كوكسەيتىن ادامگەرشىلىككە جات ءداستۇرى ءبىزدىڭ وتانىمىزعا قاۋىپتى ەكەنىن ايتىپ, پرەزيدەنتتىككە ۇمىتكەردىڭ سايلاۋالدى تۇعىرناماسىندا باتىستىڭ ىقپالى مەن جالعان قۇندىلىقتارىنان باس تارتۋ ماسەلەسى كورسەتىلگەنىن مالىمدەدى. شتاب جەتەكشىسى قازاقستاننىڭ ءاربىر ازاماتى ەلدىڭ بولاشاعىنا جاۋاپتى ەكەنىن العا تارتىپ, ساياسي ناۋقاننىڭ ماڭىزدىلىعىنا توقتالدى جانە كوپشىلىكتى 9 ماۋسىمعا بەلگىلەنگەن سايلاۋعا بەلسەندى قاتىسۋعا شاقىردى.
سونىمەن قاتار كوممۋنيستىك حالىق پارتياسىنىڭ وكىلدەرى جەر-جەردە ءتۇرلى ءىس-شارالار ۇيىمداستىرىپ جاتىر. سونىڭ ءبىرى پاۆلودار وبلىستىق قوعامدىق شتابىنىڭ ەرتىس وزەنىندە تەپلوحودپەن سەرۋەن جاساعانى بولدى. وندا سەرۋەندەۋشىلەر كەڭەستىك مۋزىكالاردى تىڭداپ, ج.احمەتبەكوۆكە داۋىس بەرۋ ۇندەۋىنە قۇلاق ءتۇردى. تەپلوحود ۇگىت پلاكاتتارىمەن بەزەندىرىلدى. ال پارتيا نىشانىمەن ادىپتەلگەن كيىم كيگەن بەلسەندىلەر سايلاۋشىلارعا ۇگىت ماتەريالدارىن تاراتتى.
سەرۋەن بارىسىندا ۇيىمنىڭ پاۆلودار وبلىستىق كوميتەتىنىڭ ءبىرىنشى حاتشىسى گ.نۇعمانوۆا قاتىسۋشىلارعا ج.احمەتبەكوۆتىڭ سايلاۋالدى تۇعىرناماسىنىڭ نەگىزگى تەزيستەرىن تانىستىردى. ول جۇرتقا ۇمىتكەردىڭ كورشى ەلدەرمەن ەۋرازيالىق ەكونوميكالىق وداق جانە «ءبىر بەلدەۋ, ءبىر جول» جوباسى اياسىنداعى حالىقارالىق قارىم-قاتىناستىڭ جانە ەكونوميكالىق ينتەگراتسيانىڭ جالعاسۋىن قولدايتىندىعىن جەتكىزدى.
* * *
Nur Otan پارتياسىنان پرەزيدەنتتىككە كانديدات قاسىم-جومارت توقاەۆتىڭ رەسپۋبليكالىق قوعامدىق شتابى الماتى قالاسىنداعى مادەنيەت ۇيىندە حالىقپەن جۇزدەستى. اپورتتىڭ وتانىنداعى پاتريوت تۇرعىندار بۇل كەزدەسۋگە بەلسەندى قاتىستى.
رەسپۋبليكالىق شتاب جەتەكشسى ماۋلەن اشىمباەۆ باستاعان دەلەگاتسيا جينالعان قاۋىمنىڭ نازارىن ق.توقاەۆتىڭ سايلاۋالدى باعدارلاماسىندا ايتىلعان وزەكتى ماسەلەلەرگە اۋداردى. ماسەلەن, باعدارلاماداعى قۇقىق قورعاۋ ورگاندارىن رەفورمالاۋ جونىندەگى تالاپتاردىڭ ماڭىزدىلىعى اتالىپ ءوتتى. سونداي-اق كانديداتتىڭ ءاربىر قازاقستاندىقتىڭ تابىسى مەن تۇرمىسىن تۇزەۋگە, الەۋمەتتىك قامتاماسىز ەتۋدى جەتىلدىرۋگە كۇش سالاتىنى ايتىلدى. «قۇرمەتتى الماتىلىقتار, 9 ماۋسىم كۇنى سايلاۋ ۋچاسكەلەرىنە شاقىرامىز. بارشاڭىزدى اتسالىسۋعا شاقىرامىن. بارلىعىڭىز بەيبىتشىلىك پەن تۇراقتىلىقتى ساقتاۋ ءۇشىن داۋىس بەرىڭىزدەر. كانديداتتى سايلاي وتىرىپ, سىزدەر قازاقستاننىڭ بولاشاعى ءۇشىن داۋىس بەرەسىزدەر!», دەدى م.اشىمباەۆ.
سونىمەن قاتار ق.توقاەۆتىڭ سەنىم ءبىلدىرىلگەن ادامدارى بيزنەس-قوعامداستىق وكىلدەرىمەن كەزدەستى. بيزنەس سالاسىنداعى وزەكتى ماسەلەلەردى تالقىلاۋ بارىسىندا م.اشىمباەۆ كانديداتتىڭ سايلاۋالدى باعدارلاماسىنىڭ «ورلەۋ» اتتى بولىمىندە سۋ, جول سالۋ مەن مەكتەپ قۇرىلىسى جانە مەديتسينالىق كومەك جايى قامتىلعانى ايتىلدى. «ەگەر ەلدى مەكەن تازا اۋىزسۋمەن قامتىلعان بولسا, وندا ساپالى جول سالىنادى. ءوز ىسىنە بەرىلگەن ۇستازدار ەڭبەك ەتەتىن مەكتەپتەر پايدا بولىپ, العاشقى مەديتسينالىق كومەك كورسەتەتىن ورىندار بولادى. ورلەۋدىڭ ءمانى دە وسىندا. بۇعان قوسا, ورلەۋ ۇعىمى مەملەكەتتىڭ ءوز كاسىپكەرلەرىن ءتيىمدى قورعاۋىنان كورىنەدى. باعدارلامادا بيزنەسمەندەرگە جۇيەلى ءارى كوپ قىرلى قولداۋ كورسەتۋ جايى باسا ايتىلعان», دەدى رەسپۋبليكالىق قوعامدىق شتاب جەتەكشىسى.
* * *
«ۇلت تاعدىرى» ۇلتتىق-پاتريوتتىق قوزعالىسى اتىنان پرەزيدەنتتىككە كانديدات رەتىندە تىركەلگەن ءامىرجان قوسانوۆتىڭ الماتى قالاسىنداعى سايلاۋالدى قوعامدىق شتابىنىڭ مۇشەلەرى ۇلتتىق كىتاپحانادا مادەنيەت قىزمەتكەرلەرىمەن كەزدەستى. ۇگىت-ناسيحات توبىن شتاب جەتەكشىسى ماقسات جاقاۋ باستاپ باردى.
ءا.قوسانوۆتىڭ سەنىم بىلدىرىلگەن ادامدارى كوپشىلىككە سايلاۋالدى تۇعىرنامادا كورىنىس تاپقان نەگىزگى باعىتتاردى تانىستىرىپ, كانديداتتىڭ ءتۇرلى ماسەلەگە كوزقاراسى جايلى بايانداپ بەردى. ولاردى مۇقيات تىڭداعان قاتىسۋشىلار وزدەرىنىڭ سۇراقتارىن دا قويىپ, حالىقتىڭ ءال-اۋقاتىن كوتەرۋ تۇرعىسىندا پىكىر الماستى.
ەلىمىزدىڭ جەر-جەرىندە ءوتىپ جاتقان وسىنداي كەزدەسۋلەردە كانديداتتىڭ سايلاۋالدى تۇعىرناماسىندا كورسەتىلگەن باستى ۇستانىمدار كەڭىنەن ءتۇسىندىرىلىپ جاتىر. ونىڭ باعدارلاماسىنداعى «ءسوز جۇزىندەگى ەمەس, ءىس جۇزىندەگى تاۋەلسىزدىك» اتتى تاراۋىندا سىرتقى ساياساتتا كوپ ۆەكتورلى ديپلوماتيا, اۋماقتىق تۇتاستىقتى قۇرمەتتەۋ, تەڭ قۇقىقتىق قارىم-قاتىناس تاجىريبەسىنە قايتا ورالۋ, ورتالىق ازياداعى كورشىلەس مەملەكەتتەرمەن ءوزارا سەنىمدىلىكتى, وداقتاستىق پەن ۇجىمدىق قاۋىپسىزدىكتى نىعايتۋ, سونداي-اق تۇركى تىلدەس ەلدەردىڭ ىنتىماعىن ودان ءارى تەرەڭدەتۋ تۋرالى ايتىلعان.
سونىمەن قاتار پەتروپاۆل قالاسىندا پرەزيدەنتتىكتەن ۇمىتكەر ءا.قوسانوۆتىڭ وبلىستىق قوعامدىق شتابىندا سايلاۋ كۇنى ۋچاسكەلەردە داۋىس بەرۋ پروتسەسىن قاداعالايتىن بايقاۋشىلار ءۇشىن سەمينار وتكىزىلدى. مۇنداي جيىندار ساياساتتانۋشى دوس كوشىمنىڭ باستاماسىمەن ۇيىمداستىرىلۋدا. ول ەكى كۇن ىشىندە بايقاۋشىلار دايىنداۋ جۇمىستارىن بەلسەندى جۇرگىزۋدە. ساياساتتانۋشى ترەنينگ اياسىندا بايقاۋشىلاردىڭ قۇقىقتارى مەن مىندەتتەرى, سايلاۋ كەزىندە ورىن الۋى ىقتيمال ءتۇرلى جاعدايلارداعى ارەكەتتەرى جايلى ءتۇسىندىردى. سونىمەن قاتار شتاب مۇشەلەرى تۇرعىندارمەن كەزدەسىپ, كانديدات تۋرالى بايانداپ بەردى, ۇگىت-ناسيحات ماتەريالدارىن تاراتتى.
* * *
« ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە كانديدات سادىبەك تۇگەلدىڭ تۇركىستان وبلىسىنداعى سايلاۋالدى قوعامدىق شتابىنىڭ وكىلدەرى وڭىردەگى كيەلى جەرلەردى ارالادى.
ايماقتاعى شتاب جەتەكشىسى ءازيز انەتوۆ باستاعان ناسيحاتشىلار توبى ساپارلارىن الدىمەن قازاق حاندارى مەن بي-شەشەندەرى سۇيەگى جاتقان تاريحي قالا تۇركىستان قالاسىنان باستادى. مۇندا قوجا احمەت ءياساۋيدىڭ كەسەنەسىنە سوعىپ, ءتاۋ ەتتى. سول ماڭدا تۋريستەر مەن زيارات ەتىپ كەلگەندەرگە كانديداتتىڭ باستى ۇستانىمدارى ءتۇسىندىرىلىپ, سونىڭ ىشىندە ۇلتتىق قۇندىلىقتاردى ۇلىقتاۋ تۋرالى كەڭىنەن ايتىلدى. «جەر – جانىمىز, ءتىل – تۇعىرىمىز» دەپ ۇرانداتقان س.تۇگەل وسى تۇركىستان سەكىلدى قاسيەتتى جەرىمىزدىڭ قادىرىن ءبىلىپ, ءدال وسى وڭىردەگى حالىقتىڭ تازا ساقتالعان ءتىلى مەن قايماعى بۇزىلماعان ءداستۇرى بۇكىل قازاققا ۇلگى بولعانىن كوكسەيدى.
سونىمەن قاتار ناسيحاتشىلار توبى ودان ءارى قاراي جىلجىپ, ىرگەدەگى وتىرار اۋدانىنا جول تارتتى. وندا ازىرەت سۇلتاننىڭ ۇستازى, بابتاردىڭ بابى ارىستان بابتىڭ كەسەنەسى بار. كانديداتتىڭ سەنىم بىلدىرىلگەن ادامدارى بۇل جەردە دە بەلسەندى جۇمىس ىستەپ, كەلگەن-كەتكەن جۇرتقا ۇگىت ماتەريالدارىن تاراتتى.
بۇعان قوسا س.تۇگەلدىڭ الماتى وبلىسىنداعى قوعامدىق شتابى دا قارقىندى جۇمىس ىستەپ جاتىر. «ءبىزدىڭ نەگىزگى ماقساتىمىز – وبلىستاعى ءاربىر تۇرعىنىن ءوز كانديداتىمىزدىڭ سايلاۋالدى تۇعىرناماسىنان حاباردار ەتۋ. باعدارلامانىڭ باستى باعىتتارى – مەملەكەتتىك ءتىلدىڭ مارتەبەسىن كوتەرۋ, جەمقورلىقپەن تاباندى كۇرەس, جۇمىسسىزدىق ماسەلەسىن شەشۋ, ەلىمىزدىڭ دەموگرافياسىن باسا كوڭىل ءبولۋ جانە ۇلتتىق ويىندارىمىزدى, اسىرەسە ات سپورتى تۇرلەرىن دامىتۋ. ۇگىت-ناسيحات جۇمىستارى بارلىق اۋدانداردى قامتىپ جاتىر. ءار اۋداندا كەم دەگەندە ءۇش وكىلىمىز جۇمىس ىستەۋدە. بارلىعى – 60 ادام», دەدى وڭىردەگى كانديداتتىڭ سەنىم بىلدىرىلگەن ادامى لاۋرا اشەنوۆا.
دايىنداعان
ورىنبەك وتەمۇرات,
«Egemen Qazaqstan»
