ارىستان يسانجۋلوۆ كوپتەگەن رەسپۋبليكالىق, وبلىستىق جارىستاردا توپ جارىپ, بۇگىندە FIDE (ۇلتتىق شاحمات فەدەراتسيالارىن بىرىكتىرۋشى حالىقارالىق سپورت ۇيىمىنىڭ) شەبەرى دارەجەسىنە جەتكەن الەم چەمپيونى. كەزدەسۋ بارىسىندا ارىستان ەلوردادا ناۋرىزدىڭ 4-15 كۇندەرى «قازاقستان شاحمات فەدەراتسياسىنىڭ» ۇيىمداستىرۋىمەن كلاسسيكالىق شاحماتتان وتكەن الەم چەمپيوناتىنىڭ كوماندالىق قىزىقتى تارتىسى جايلى اڭگىمەلەپ بەردى.
چەمپيوناتتىڭ باس دەمەۋشىسى – ERG ەۋرازيالىق توبى, ال ءتۋرنيردىڭ باس سەرىكتەسى Samruk Kazyna بولسا, وسى شاراعا 50 نوۋتبۋك, 4 پرينتەر جانە 2 مفۋ ۇسىنىپتى. ERG ەۋرازيالىق توبى مەن Samruk Kazyna ءوتىنىشى بويىنشا جوعارىدا اتالعان بارلىق جابدىقتار قازاقستاننىڭ ون ءبىر وڭىرىندەگى بالالار مەكەمەلەرىنە شاحمات سپورتىن دامىتۋ ءۇشىن تابىستالۋى قاجەت ەكەن. سەمەيدەگى №8 بالالار ۇيىنە بولىنگەن ءتورت نوۋتبۋكتى تاپسىرۋ مىندەتى ارىستان يسانجۋلوۆقا تاپسىرىلعان.
– ارىستان ءتورت نوۋتبۋكتى تاپسىرعاندا بالالارىمىز ءبىر جادىراپ قالدى, – دەدى ديرەكتوردىڭ ءتاربيە ءىسى جونىندەگى ورىنباسارى رىمحان نۇرعاليەۆا, – حالقىمىز «جەتىم كورسەڭ جەبەي ءجۇر» دەپ بەكەر ايتپاعان. ارىستانعا قاراپ بالالارىمىز ۇلگى السا نۇر ۇستىنە نۇر بولار ەدى.
راۋشان نۇعمانبەك,
«ەgemen Qاzaqstan»
سەمەي
