ءبىلىم بەرۋ سالاسى قىزمەتكەرلەرىمەن وتكەن جيىندا وبلىس اكىمى نۇرلان نوعاەۆ مامان تاپشىلىعىن جويۋ ءۇشىن ەلىمىزدىڭ وزگە وڭىرلەرىنەن تاجىريبەلى مۇعالىمدەردى شاقىرۋ قاجەتتىگىنە نازار اۋداردى. «اتىراۋعا كەلىپ, جۇمىس ىستەۋگە نيەتتى پەداگوگتەرگە بارلىق جاعداي جاساپ, تۇرعىن ۇيمەن قامتاماسىز ەتۋگە دايىنبىز», دەگەن ايماق باسشىسى مامان ءىزدەۋدى ءبىلىم بەرۋ باسقارماسىنا عانا قالدىرماي, جەرگىلىكتى اكىمدەر ءوز اۋىل-اۋداندارىنىڭ مۇعالىمدەرمەن قامتىلۋىنا اتسالىسۋلارى كەرەك ەكەنىن اتاپ ءوتتى. ايماقتا, اسىرەسە ورىس تىلىندە ءبىلىم بەرەتىن مەكتەپتەردە مۇعالىمدەر جەتىسپەيدى. وبلىس ورتالىعىنىڭ وزىنە 336 ءورىستىلدى پەداگوگ كەرەك.
ءۇش اۋىسىمدىق مەكتەپتەر پروبلەماسى دا وزەكتىلىگىن جويماي تۇر. اتىراۋ قالالىق ءبىلىم ءبولىمىنىڭ باسشىسى فارۋزا شانگەرەەۆا وڭىرلىك كوممۋنيكاتسيالار قىزمەتىندە وتكەن بريفينگتە قالادا 13 ءۇش اۋىسىمدىق مەكتەپ بارىن ايتقان بولاتىن. ياعني, وقۋشىلار سانى بەلگىلەنگەن كورسەتكىشتەن 14 800-گە ارتىق. ماسەلە تولىق شەشىمىن تابۋى ءۇشىن 20 مەكتەپ سالىنۋى كەرەك. قازىر ءتورت ءبىلىم ورداسىنىڭ قۇرىلىسى ءجۇرىپ جاتىر. جىل ساناپ وبلىس ورتالىعىنىڭ اۋقىمى كەڭەيىپ, جاڭا ىقشام اۋداندار بوي كوتەرىپ, حالىق سانى ارتىپ كەلە جاتقان تۇستا الەۋمەتتىك نىساندار قاتارىن دا كوبەيتۋ كۇن تارتىبىنە شىعارى انىق.
جاسىراتىنى جوق, ۇبت قورتىندىلارى بويىنشا اتىراۋ وبلىسىنىڭ كورسەتكىشى ماقتانارلىقتاي دارەجەدە ەمەس. بۇل – الدىمەن ءبىلىم بەرۋ سالاسى قىزمەتكەرلەرىنىڭ بىلىكتىلىگىنە سىن. سالا قىزمەتكەرلەرىمەن كەزدەسكەن ايماق باسشىسى قازىرگى جاعداي تۇبەگەيلى شارالاردى تالاپ ەتىپ تۇرعانىن اتاپ ءوتتى. «وقۋ ورىندارىندا ءبىلىم ساپاسىنىڭ تومەندەپ كەتكەنى تۋرالى شاعىمدار كوپ. سالاداعى جاعدايدى وزگەرتۋ كەرەك, ءار ليتسەي مەن گيمنازياعا تەكسەرۋ جۇرگىزۋ كەرەك», دەدى ن.نوعاەۆ. ەگەر مۇنداي ەرەكشە ءبىلىم وردالارى ءتيىستى تالاپتارعا ساي بولماسا, جالپى ءبىلىم بەرەتىن مەكتەپ ءمارتەبەسىن قايتارىپ بەرۋ قاجەت. سونداي-اق ءوڭىر باسشىسى ارنايى تۇجىرىمداما دايىنداپ, پەداگوگتەر مەن ديرەكتورلاردى اتتەستاتسيادان وتكىزۋدى تاپسىردى.
مەكتەپ ديرەكتورلارى مەملەكەتتىك ساتىپ الۋ راسىمدەرىنە قاتىسادى, بىراق بۇل سالانى دۇرىس بىلمەگەندىكتەن, اعاتتىقتار ءجيى كەتەدى. بۇل ءوز كەزەگىندە ساپاسىز تاۋار الۋعا, وقۋ پروتسەسىنە كەرى اسەر ەتەدى. سوندىقتان الداعى ۋاقىتتا مەكتەپ ديرەكتورىنىڭ ءمىندەتىن ناقتىلاۋ جوسپارلانىپ وتىر. بۇل جۇمىس مەملەكەتتىك ساتىپ الۋ راسىمدەرىن جۇيەلەندىرۋ جانە ورتالىقتاندىرۋ ارقىلى جۇزەگە اساتىن بولادى.
اتىراۋ
