7 ماۋسىمدا پرەمەر-مينيستر ورىنتاعىمەن قاتار ول بيلىكتەگى كونسەرۆاتيۆتىك ءجانە يۋنيونيستىك پارتيالار كوشباسشىلىعىنان دا كەتەدى. ءوزىنىڭ ءمالىمدەمەسىندە تەرەزا مەي ۇلىبريتانيا حانشايىمىن دا ءوز شەشىمىمەن تولىق حاباردار ەتكەنىن ايتتى.
پرەمەردىڭ وتستاۆكاعا كەتۋ سەبەبى ۇلىبريتانيانىڭ ەۋروپانىڭ وداقتان شىعۋ تۋرالى كەلىسىمدى پارلامەنتكە ماقۇلداتا الماعاندىعى بولىپ وتىر. Brexit شارتتارى تۋرالى كەلىسىم دەپۋتاتتار تاراپىنان عانا ەمەس پرەمەردىڭ ءوز كابينەتىنىڭ ءمۇشەلەرى تاراپىنان دا تاباندى قارسىلىققا ۇشىرادى. «وسى كەلىسىمدى ماقۇلداتۋ ءۇشىن مەن پارلامەنتشىلەردىڭ الدىندا قولىمنان كەلگەننىڭ ءبارىن جاسادىم. بىراق وكىنىشكە قاراي ءۇش رەت ۇسىنسام دا ءبارىبىر ونى وتكىزە المادىم. سوندىقتان مەن ەلدىڭ ءمۇددەسى ءۇشىن بۇل جۇمىسپەن جاڭا پرەمەر-مينيستر اينالىسسا دۇرىس بولاتىن شىعار دەگەن شەشىمگە كەلدىم», دەدى تەرەزا مەي ءوزىنىڭ مالىمدەمەسىندە. سونىمەن ءبىرگە ول انگليانى ەۋرووداقتان الىپ شىعا الماعانىنا وكىنىش ءبىلدىردى. «ەندى رەفەرەندۋمنىڭ ءناتيجەسىنە قۇرمەتپەن قاراۋدىڭ امالىن تابۋ مەنىڭ ءىزباسارىمنىڭ مىندەتى بولادى» دەدى ول. مالىمدەمەسىن اياقتاعاندا ول كوزىنە جاس الىپ, داۋىسى ءدىرىلدەدى. اسىرەسە «مەن ءوزىم شەكسىز سۇيەتىن ەلىمە قىزمەت ەتكەنىمدى ماقتان تۇتامىن» دەگەن سوزدەرى ونىڭ كوڭىلىن بوساتقانداي بولدى.
ايتا كەتەتىن بولساق, تەرەزا مەي – ۇلىبريتانيانىڭ مارگارەت تەتچەردەن كەيىنگى ەكىنشى ايەل پرەمەر-ءمينيسترى. 1956 جىلى تۋعان ول 2016 جىلدىڭ 13 شىلدەسىنەن دەۆيد كەمەروننىڭ ورنىنا پرەمەر-مينيستر بولىپ سايلانعان ەدى. ت.مەي ۇلىبريتانيانىڭ ەو-دان شىعۋ تۋرالى رەفەرەندۋمىندا Brexit-كە قارسى بولعان ادامداردىڭ ءبىرى. الايدا د.كەمەرون وتستاۆكاعا كەتكەندە ءوزىنىڭ كانديداتۋراسىن كونسەرۆاتيۆتىك پارتيانىڭ كوشباسشىلىعىنا ۇسىنىپ, بيلىككە وتكەن. بيلىكتەگى پارتيا وسى بولعان سوڭ ت.مەي پرەمەر-مينيسترلىككە دا سايلانعان بولاتىن.
