ەلباسى كەزدەسۋ بارىسىندا ۆلاديمير پۋتينگە «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنىن تاپسىردى.
قازاقستاننىڭ تۇڭعىش پرەزيدەنتى ەۋرازيالىق ەكونوميكالىق وداقتىڭ قازىرگى ناتيجەلەرى مەن ءارى قارايعى دامۋ پەرسپەكتيۆالارىن اتاپ ءوتتى.
– بەس جىل بۇرىن, ءسىز جانە الەكساندر لۋكاشەنكو ۇشەۋمىز وسى وداقتى قۇردىق. ءبىز جۇزەگە اسىرعان بۇل يدەيا مەنىڭ تاراپىمنان 25 جىل بۇرىن ممۋ قابىرعاسىندا ۇسىنىلعان بولاتىن. قيىن ۋاقىتتارعا قاراماستان, ارامىزداعى ءوزارا ساۋدا ءوسىپ كەلەدى. بىرلەسكەن كاسىپورىنداردىڭ سانى ارتۋدا. ەۋرازيالىق ەكونوميكالىق وداق ەو, شىۇ, اسەان جانە باسقا دا ۇيىمدارمەن ينتەگراتسيا جولىمەن ءجۇرۋى ءتيىس دەپ ەسەپتەيمىن. بىزگە وسى جونىندە جۇمىس ىستەۋ كەرەك, – دەدى نۇرسۇلتان نازارباەۆ.
ۆلاديمير پۋتين وزىنە تاپسىرىلعان ماراپات ءۇشىن ەلباسىنا العىس ايتتى جانە جان-جاقتى ديالوگتىڭ ءارى قاراي نىعايا بەرەتىنىنە سەنىم ءبىلدىردى.
– سىزگە ماراپاتىڭىز ءۇشىن جانە ينتەگراتسيا ىسىندە, ەكىجاقتى قارىم-قاتىناستاردا, رەسەي مەن قازاقستاننىڭ ءوزارا ستراتەگيالىق ءىس-قيمىلىن دامىتۋدا اتقارىلعان جۇمىستار ءۇشىن العىس ايتقىم كەلەدى. بۇل رەتتە ءسىزدىڭ زور ەڭبەگىڭىز بار, – دەدى رەسەي پرەزيدەنتى.
* * *
قازاقستاننىڭ تۇڭعىش پرەزيدەنتى نۇرسۇلتان نازارباەۆ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەستى.
كەزدەسۋ بارىسىندا ەلباسى قۇرمەتتى قوناققا «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنىن تابىس ەتتى.
نۇرسۇلتان نازارباەۆ الەكساندر لۋكاشەنكونىڭ ينتەگراتسيالىق ۇدەرىستەردى دامىتۋ جانە ەۋرازيالىق ەكونوميكالىق وداقتى قۇرۋ ىسىنە سىڭىرگەن ەڭبەگىن ەرەكشە اتاپ ءوتتى.
– بيىل ەۋرازيالىق ەكونوميكالىق وداقتىڭ وسى جەردە قۇرىلعانىنا 5 جىل جانە ءوزىم ۇسىنعان ەۋرازيالىق ينتەگراتسيا يدەياسىنىڭ جاريا ەتىلگەنىنە 25 جىل تولىپ وتىر. ءسىز قولداۋ كورسەتپەگەندە بۇل ۇيىم قۇرىلماس ەدى, – دەدى نۇرسۇلتان نازارباەۆ.
ەلباسى نۇرسۇلتان نازارباەۆ بەلارۋس حالقىنا جانە ونىڭ كوشباسشىسى ا. لۋكاشەنكوعا ءاردايىم قولداۋ كورسەتۋگە دايىن ەكەنىن ايتتى.
– سىزگە كەز كەلگەن ماسەلە بويىنشا قولداۋ كورسەتۋگە ءاردايىم دايىنمىن. ءسىز بەلارۋس رەسپۋبليكاسىن جوعارى دەڭگەيدە دامىتىپ كەلەسىز. ءسىزدى قازاقستاننىڭ كورىكتى جەرلەرىن تاماشالاۋعا شاقىرامىن, – دەدى قازاقستاننىڭ تۇڭعىش پرەزيدەنتى.
الەكساندر لۋكاشەنكو قوناقجايلىق كورسەتىپ, ماراپات تاپسىرعانى ءۇشىن نۇرسۇلتان نازارباەۆقا ريزاشىلىق ءبىلدىردى.
– بەلارۋس حالقىنا قۇرمەت كورسەتكەنىڭىز ءۇشىن راحمەت. بۇل ماعان عانا كورسەتىلگەن قۇرمەت ەمەس. بۇل – مەنىڭ حالقىما دەگەن ىستىق ىقىلاسىڭىز بەن قۇرمەتىڭىز. قازاقستاننىڭ پرەزيدەنتى – لايىقتى ازامات. ءسىز دانا شەشىم قابىلدادىڭىز. قازاقستاندىقتار باسقا حالىقتار سياقتى تۇراقتىلىقتى باعالايتىنىنا سەنىمدىمىن. ەڭ باستىسى – ەڭبەك. ەڭبەك ەتسەڭ, ناتيجە دە بولادى, – دەدى بەلارۋس رەسپۋبليكاسىنىڭ پرەزيدەنتى.
* * *
ەلباسى نۇرسۇلتان نازارباەۆ قىرعىز رەسپۋبليكاسىنىڭ پرەزيدەنتى سوورونباي جەەنبەكوۆپەن كەزدەستى.
كەزدەسۋ بارىسىندا نۇرسۇلتان نازارباەۆ سوورونباي جەەنبەكوۆكە «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنىن تابىس ەتتى.
قازاقستاننىڭ تۇڭعىش پرەزيدەنتى باۋىرلاس ەكى حالىق اراسىنداعى قاتىناستاردىڭ جوعارى دەڭگەيدە ەكەنىن اتاپ ءوتتى.
– ءبىز – ءبىر-بىرىمىزگە جاقىن, باۋىرلاس حالىقپىز. مەن ءسىزدىڭ ەلىڭىزدى جاقسى بىلەمىن. قازاقستاننىڭ الداعى ۋاقىتتا دا ءسىزدى قولدايتىنىنا سەنىمدىمىن, – دەدى ەلباسى.
سوورونباي جەەنبەكوۆ جوعارى ماراپات تاپسىرعانى ءۇشىن نۇرسۇلتان نازارباەۆقا العىس ايتىپ, ەلباسىنىڭ ورتالىق ازيا حالىقتارىنىڭ دوستىعىن نىعايتۋ ىسىندەگى ەرەكشە ءرولىن اتاپ ءوتتى.
– ءسىز تۇركى الەمىنىڭ كوشباسشىسى سانالاسىز. ءسىز ورتالىق ازيا ەلدەرىنىڭ دوستىعىن نىعايتۋ ىسىنە زور ۇلەس قوستىڭىز. مەن ءۇشىن قازاق حالقىنىڭ ەلباسىنان وردەن الۋ – زور مارتەبە. سىزگە شىنايى ريزاشىلىعىمدى بىلدىرەمىن, – دەدى قىرعىز رەسپۋبليكاسىنىڭ پرەزيدەنتى.
