يادرولىق قارۋعا تىيىم سالۋ تۋرالى شارتقا 2017 جىلعى 7 شىلدەدە قول قويىلعان بولاتىن. شارتقا سايكەس مۇشە مەملەكەتتىڭ اۋماعىندا يادرولىق قارۋدى جانە يادرولىق جارىلعىش قۇرىلعىلاردى وندىرۋگە, سىناۋعا, ساتىپ الۋعا, بەرۋگە, ساقتاۋعا جانە ورنالاستىرۋعا تىيىم سالىنادى. سونىمەن بىرگە يادرولىق قارۋدى قولدانۋعا, سونداي-اق ونى قولدانۋ قاتەرىن توندىرۋگە تىيىم سالىنادى.
شارت نيۋ-يوركتەگى بۇۇ باس اسسامبلەياسىنىڭ 72-سەسسياسى اياسىندا 2017 جىلعى 20 قىركۇيەكتەن باستاپ قول قويۋعا اشىلدى جانە 50 مەملەكەت راتيفيكاتسيالاعاننان كەيىن كۇشىنە ەنەدى (قازىرگى ۋاقىتتا شارتقا 70 مەملەكەت قول قويدى, 23 مەملەكەت راتيفيكاتسيالادى).
«وسى شارتتى راتيفيكاتسيالاي وتىرىپ قازاقستان يادرولىق قارۋدان ازات الەمدى قۇرۋ جانە ساقتاۋ ىسىنە زور ۇلەس قوسادى, سونداي-اق ەلىمىزدىڭ يادرولىق قارۋسىزدانۋ سالاسىنداعى كوشباسشىلىعىن ناقتىلايدى», دەپ اتاپ ءوتتى سەناتور تولەۋبەك مۇقاشەۆ.
سەناتورلار سونداي-اق «1992 جىلعى 15 مامىرداعى ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر اراسىنداعى اسكەري-تەحنيكالىق ىنتىماقتاستىقتىڭ نەگىزگى پرينتسيپتەرى تۋرالى كەلىسىمگە وزگەرىستەر ەنگىزۋ تۋرالى ءتورتىنشى حاتتامانى راتيفيكاتسيالاۋ تۋرالى» زاڭ جوباسىن قارادى.
حاتتاماعا 2017 جىلعى 30 قاراشادا مينسك قالاسىندا ۇجىمدىق قاۋىپسىزدىك تۋرالى شارت ۇيىمىنا قاتىسۋشى مەملەكەتتەر باسشىلارى قول قويعان بولاتىن. قولدانىستاعى كەلىسىمگە سايكەس جەتكىزىلەتىن اسكەري ونىمگە باعالار ۇلتتىق بولىمشەلەردىڭ ءوز مۇقتاجدارى ءۇشىن ساتىپ الاتىن ىشكى باعالارى بويىنشا بەلگىلەنەتىنىن اتاپ ءوتۋ قاجەت.
وسى حاتتامانىڭ قابىلدانۋىمەن مۇنداي جەڭىلدىكتى باعا ءوندىرۋشى تاراپ ءوز مۇقتاجدارى ءۇشىن ساتىپ المايتىن, بىراق كەلىسىم تالاپتارىنا سايكەس ۇقشۇ-نىڭ باسقا مۇشە مەملەكەتىنە جەتكىزىلەتىن اسكەري ماقساتتاعى ونىمگە قولدانىلادى.
زاڭ جوبالارى پالاتانىڭ قاراۋىنا جىبەرىلدى.
