پالاتا توراعاسى نۇرلان نىعماتۋلين سلوۆاك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ميلان كوللاردى قابىلدادى.
تاراپتار ەكى ەل اراسىنداعى ىنتىماقتاستىقتى دامىتۋ توڭىرەگىندە ورتاق ويلارىمەن ءبولىستى.
ءماجىلىس توراعاسىنىڭ پىكىرىنشە, قازاقستان سلوۆاكيانى ورتالىق ەۋروپا, جالپى ەۋروپالىق وداق ىشىندە ماڭىزدى ارىپتەستەردىڭ ءبىرى رەتىندە قاراستىرادى. 25 جىل ىشىندە قوس مەملەكەت اراسىندا سەنىمدى ساياسي ديالوگ, قاجەتتى قۇقىقتىق بازا قالىپتاسىپ, ساۋدا-ەكونوميكالىق ءارى مادەني- گۋمانيتارلىق ىنتىماقتاستىق ءۇشىن قولايلى جاعداي جاسالدى.
ن. نىعماتۋلين ءبىزدىڭ ەلىمىز ەۋروپا مەن ازيا اراسىنداعى بايلانىستىرۋشى كوپىر ىسپەتتى ەكەنىن العا تارتا كەلىپ, قازاقستان مەن ەۋروپالىق وداق اراسىنداعى «كەڭەيتىلگەن ارىپتەستىك جانە ىنتىماقتاستىق تۋرالى كەلىسىم» بايلانىستى تەرەڭدەتى ءۇشىن ۇلكەن مۇمكىندىك ەكەنىن ايتىپ, ءوزارا ءتيىمدى جوبالاردى بىرلەسە جۇزەگە اسىرۋ ءبىزدىڭ ەلدەرىمىزدىڭ ساۋدا-ينۆەستيتسيالىق باعىتىنا جاڭا سەرپىن بەرەتىنىن باسا ايتتى.
ءوز كەزەگىندە م. كوللار قازاقستاندا باستالعان قىزۋ ساياسي ناۋقانعا كوڭىل ءبولىپ, تۇڭعىش پرەزيدەنت, ەلباسى نۇرسۇلتان نازارباەۆ باستامالارىنىڭ جالپى ەۋرازيالىق كەڭىستىك ءۇشىن وتە ماڭىزدى ەكەنىنە توقتالدى.
كەزدەسۋ بارىسىندا ءماجىلىس توراعاسى پارلامەنتارالىق بايلانىستى كۇشەيتۋگە باسا نازار اۋدارىپ, وسى ورايدا, بەيىندى كوميتەتتەر مەن پارلامەنتارالىق توپتار شەڭبەرىندە ءىس-ساپارلار ارقىلى زاڭنامالىق تاجىريبە الماسۋدى ودان ءارى ىنتالاندىرۋ قاجەتتىلىگىن ايتتى.
