رۋحانيات • 28 مامىر، 2019

قاراعاندىلىق جاس شەبەرلەردىڭ تۋىندىلارى كوپشىلىكتىڭ كوڭىلىنەن شىقتى

كەنشىلەر استاناسىنداعى بەينەلەۋ ونەرى مۇراجايىندا وتكەن «شىعارماشىلىقتىڭ عاجايىپ الەمى» اتتى كورمە كەلگەن جۇرتتىڭ كوڭىلىنەن شىقتى. ويتكەنى، مۇراجاي تورىنەن جاس شەبەرلەر بارىن سالعان تۋىندىلاردىڭ ەڭ ۇزدىكتەرى ورىن العان ەدى.

قايرات ءابىلدا

كورمەدە «الا گۇلدەر» بەينەلەۋ ونەرى، «تۆورچەستۆو» ساندىك-قولدانبالى ونەر جانە «التىن مارجان» بالالار شىعارماشىلىعى ستۋديالارىنداعى تالانت يەلەرىنىڭ قولىنان شىققان 790 كارتينا، سونىمەن قاتار مۇسىندەر مەن ساندىك-قولدانبالى جۇمىستار كەلۋشىلەر نازارىنا ۇسىنىلدى.

قۇرىلعانىنا بيىل 75 جىل تولعان «الا گۇلدەر» بەينەلەۋ ونەرىنىڭ ۇلگىلى ستۋدياسى بالالارعا كەسكىندەمە، سۋرەت، گرافيكا، ءمۇسىن، ستانوكتاعى جانە قولدانبالى كومپوزيتسيالار سياقتى ونەر تۇرلەرىنەن باعىت-باعدار بەرەدى. قازىرگى ۋاقىتتا اتالعان ستۋديادا 4 جاستان 18 جاسقا دەيىنگى 290 بالا وزدەرىنە ۇناعان ىسپەن اينالىسىپ ءجۇر.

«تۆورچەستۆو» ساندىك-قولدانبالى ونەر ستۋدياسىندا بالالار فيتوديزاين، اپپليكاتسيا جاساۋ، سابان توقۋ، توقۋ، كەستە تىگۋ، شي توقىما جانە جاساندى گۇلدەر دايىنداۋمەن شۇعىلدانادى. بۇل شىعارماشىلىق ۇيىم رەسپۋبليكا كولەمىندە جاقسى تانىمال ۇجىمداردىڭ ءبىرى. ستۋديا وبلىستىق، رەسپۋبليكالىق كونكۋرستاردى بىلاي قويعاندا، بىرنەشە مارتە حالىقارالىق بايقاۋلاردا توپ جارعان.

وسىدان سەگىز جىل بۇرىن نەگىزى قالانعان «التىن مارجان» ستۋدياسى بالالاردى سۋرەت نەگىزدەرى، سيۋجەتتىك سۋرەت سالۋ، كۆيللينگ، ۆيتراج، پاپە-ماشە، اعاشقا سۋرەت سالۋ، باتيك، پاننو، كارناۆالدىق ماسكالار، كادەسىيلار جاساۋ سياقتى پايدالى ىستەردىڭ قىر-سىرىن ۇيرەنۋگە باۋليدى. بۇل جەردە ونەر يگەرىپ جۇرگەن جەتكىنشەكتەردىڭ قول جەتكىزگەن تابىسى دا ايتارلىقتاي. ولار وبلىستىق جانە رەسپۋبليكالىق دەڭگەيدەگى شىعارماشىلىق كونكۋرستاردا تالاي مارتە جەڭىمپاز بولعان، جۇلدەگەر اتانعان.

«مۇنداي كورمە ۇيىمداستىرۋ يگى داستۇرگە اينالىپ كەلەدى. بۇل يگى شارا بولاشاقتاعى جاڭا جۇلدىزداردى شەبەرلىكتىڭ بيىك شىڭىنا شىعارۋعا زور ىقپالىن تيگىزەدى»، دەگەن سەنىمدى پىكىر ايتادى ۇيىمداستىرۋشىلار.

قاراعاندى وبلىسى