قازاقستاندا 821 كوللەدج بار, ونىڭ ىشىندە 479 – مەملەكەتتىك, 342 – جەكەمەنشىك. بۇگىندە كوللەدجدەردە بارلىعى 488 مىڭنان استام ادام وقيدى, ونىڭ ىشىندە 199 مىڭى - «بارشاعا ارنالعان تجكب» جوباسى بويىنشا وقيدى. جۇمىسشى ماماندىقتارى بويىنشا ءبىلىمنىڭ ساپاسى مەن قولجەتىمدىلىگىن ارتتىرۋدا جۇرگىزىلىپ جاتقان جۇمىستار تۋرالى قر ءبىلىم جانە عىلىم ءمينيسترى ك. ءشامشيدينوۆا, قر ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ, اتىراۋ جانە سولتۇستىك قازاقستان وبلىستارىنىڭ اكىمدەرى باياندادى.
ماسەلەنى قاراۋ بارىسىندا, سونىمەن قاتار, قر پرەمەر-ءمينيسترىنىڭ ورىنباسارى گ. ابدىقالىقوۆا, «سامۇرىق-قازىنا» ۇلتتىق ءال-اۋقات قورى» اق باسقارما توراعاسى ا. ەسىموۆ, «اتامەكەن» ۇكپ باسقارما توراعاسىنىڭ ورىنباسارى و. ورداباەۆ, كوللەدجدەردى سەنىمدى باسقارۋدا تاجىريبەسى بار جوو-لار مەن بيزنەس وكىلدەرى بايانداما جاسادى.
قر ۇكىمەتىنىڭ باسشىسى اسقار مامين تەحنيكالىق كاسىپتىك ءبىلىم بەرۋ جۇيەسىندە ساپالى ءبىلىمدى, سۇرانىسقا يە ماماندىقتاردى جانە جۇمىسقا ورنالاسۋ كەپىلدىگىن الۋعا جاعدايلار جاساۋ قاجەتتىگىن اتاپ ءوتتى. بۇل جاھاندىق ەڭبەك نارىعىنىڭ وزگەرۋىمەن جانە ەكونوميكا سالالارى ءۇشىن, ونىڭ ىشىندە جاپپاي تسيفرلاندىرۋ ءۇشىن ساپالى كادرلار دايارلاۋدىڭ الەمدىك بەتالىستارىنىڭ پايدا بولۋىمەن بايلانىستى.
كادرلاردى دايارلاۋ زامان تالابىنا ساي بولۋى قاجەت. اسقار مامين كاسىپتىك-تەحنيكالىق دايارلاۋ جۇيەسىن جاڭعىرتۋدا بارلىق الەۋمەتتىك-ەكونوميكالىق فاكتورلاردى, ونىڭ ىشىندە وقۋ مەكەمەلەرىنىڭ اۋماقتىق قولجەتىمدىلىگىن, كوپبەيىندىلىگى مەن تيىمدىلىگىن, تۇلەكتەردىڭ سۇرانىسقا يە بولۋىن ەسكەرۋ كەرەكتىگىن اتاپ ءوتتى.
قر پرەمەر-ءمينيسترى جوبالىق كەڭسە قۇرىپ, كوللەدجدەردى سەنىمگەرلىك باسقارۋعا قىزىعۋشىلىق تانىتقان بيزنەس-قاۋىمداستىقپەن جانە جوو-مەن ارىپتەستىكتىڭ ناقتى مەحانيزمدەرىن ازىرلەۋدى تاپسىردى. وتاندىق ەكونوميكامىزدىڭ ءىرى كومپانيا كوشباسشىلارى ءوز سەنىمگەرلىك باسقارۋىنا شامامەن 150 كوللەدجدى, ۋنيۆەرسيتەتتەر - 50-گە جۋىق كوللەدجدى الا الادى.
قر ۇكىمەتىنىڭ باسشىسى اتاپ وتكەندەي, دۋالدى وقىتۋدى ەنگىزۋ مەن كەڭەيتۋ بويىنشا جۇمىستى كۇشەيتۋ ماقساتىندا كاسىپورىندار كوللەدج بازاسىندا ورتالىقتار اشا الادى. بۇل كوللەدجدەردىڭ جۇمىسىن جۇمىس بەرۋشىنىڭ سۇرانىسىنا جاقىنداتىپ, تۇلەكتەرگە جۇمىسقا ورنالاسۋعا كەپىلدىك بولا الادى. بۇل باعىتتا تابىستى تاجىريبەلەر بار, «قازاقمىس» كورپوراتسياسى ساتپاەۆ قالاسىنداعى تاۋ ءىسى تەحنولوگيالىق كوللەدجىندە, بالقاش قالاسىنداعى پوليتەحنيكالىق كوللەدجىندە وسىنداي ورتالىقتار اشتى.
«ەلباسىنىڭ نەعۇرلىم تالاپ ەتىلەتىن 100 كاسىپ بويىنشا 180 كوللەدج بەن 20 جوعارى وقۋ ورنىن جاڭعىرتۋ جانە ماماندار دايىنداۋدىڭ حالىقارالىق تاجىريبەسىن ەنگىزۋ جونىندەگى تاپسىرماسىن ىسكە اسىرۋ قاجەت», - دەپ اتاپ ءوتتى ا. مامين. بۇل ماقساتتا وسى جىلدىڭ سوڭىنا دەيىن كاسىپتىك ستاندارتتاردى ازىرلەۋدى اياقتاۋ, سونداي-اق, كاسىبي بىلىكتىلىك پروتسەسىن زاڭنامالىق رەتتەۋ بويىنشا ۇسىنىستاردى ەنگىزۋ تاپسىرىلدى.
قر ۇكىمەتىنىڭ باسشىسى وبلىس اكىمدىكتەرىنىڭ نازارىن WorldSkills حالىقارالىق جوباسىنا قاتىسۋ جانە جۇمىستىق قۇزىرەتتەرىن دامىتۋ ءۇشىن وڭىرلەردە وسى قوزعالىسقا قاتىسۋ ءۇشىن بارلىق جاعدايلاردى جاساۋ قاجەتتىگىنە اۋداردى. قوسىمشا تەتىك مەكتەپتەن تىس ۇيىمدار بولا الادى, وندا قازىرگى تالاپتاردى ەسكەرۋمەن, مىسالى, باعدارلامالاۋدا, ءموبيلدى قوسىمشالار مەن ءوز جوبالارىن جاساۋدا بالالاردىڭ داعدىلارى قالىپتاستىرىلادى.
ماسەلەنى قورىتىندىلاعان قر پرەمەر-ءمينيسترى اسقار مامين كادرلارعا قاجەتتىلىكتى بولجامداۋ, كوللەدجدەر مەن ءبىلىم بەرۋ باعدارلامالارىن جاڭعىرتۋ, مەملەكەتتىك ءبىلىم بەرۋ تاپسىرىسىن قالىپتاستىرۋدى جەتىلدىرۋ بويىنشا شارالاردى ازىرلەۋدى تاپسىردى.
«ءاربىر ادام ءوزىنىڭ سۇرانىسقا يە ماماندىق العانىنا جانە كەيىن جۇمىسقا ورنالاسا الاتىنىنا سەنىمدى بولۋى كەرەك», - دەدى ا. مامين.
