ونىڭ ايتۋىنشا, تۋليارەميا, قىزامىق, كەنە ۆيرۋستى ەنتسەفاليتى, پاروتيت, بەزگەك, تەرى لەيشمانيوزى, الۆەوكوككوز اۋرۋشاڭدىعىنىڭ ءبىرلى-جارىم جاعدايلارى تىركەلگەن. سونداي-اق قوسىمشا ۆاكتسيناتسيانىڭ ناتيجەسىندە ءساۋىر ايىندا قىزىلشا اۋرۋى ناۋرىزبەن سالىستىرعاندا 17,3% ءتومەندەگەن. بۇل اۋرۋعا شالدىققانداردىڭ 61,6%-ى ەگىلمەگەن بالالار اراسىندا بايقالعان. «2019 جىلدىڭ 1 قاڭتارىنان قازىرگى ۋاقىتقا دەيىن قىزىلشانىڭ 7560 جاعدايى تىركەلگەن, ونىڭ ىشىندە 14 جاسقا دەيىنگى بالالار اراسىندا 5339 جاعداي, ياعني 70,6%. ەپيدەميولوگيالىق كورسەتكىشتەر بويىنشا وشاقتاردا يممۋنداۋ ءجۇرگىزىلەدى, بۇگىندە 14794 ادام ەگىلدى», دەدى باس مەملەكەتتىك سانيتارلىق دارىگەر.
بالالاردىڭ جازعى دەمالىس كەزىندە ىشەك ينفەكتسياسىنا ءجيى شالدىعاتىنىن جەتكىزگەن ول دۇرىس تاماقتانۋعا كوڭىل ءبولۋ كەرەك ەكەنىن ەسكەرتتى. سونداي-اق مەنينگوكوك ينفەكتسياسى بويىنشا جاعداي تۇراقتى ەكەنىن ايتقان ج.بەكشين: «وسى جىلدىڭ باسىنان بەرى مەنينگوكوكك جۇقپاسىنىڭ 22 راستالعان جاعدايى تىركەلدى, بىلتىر وسى كەزەڭدە 60 ناۋقاس انىقتالعان ەدى», دەدى.
