بيىل 29 مامىردا نۇر-سۇلتان قالاسىندا قازاقستان پرەزيدەنتى قاسىم-جومارت توقاەۆتىڭ توراعالىعىمەن نۇرسۇلتان نازارباەۆتىڭ ەۋرازيالىق ينتەگراتسيا جونىندەگى يدەياسىنىڭ 25 جانە ەۋرازيالىق ەكونوميكالىق وداق جونىندەگى كەلىسىمگە قول قويىلۋىنىڭ 5 جىلدىعىنا وراي جوعارى ەۋرازيا ەكونوميكالىق كەڭەسىنىڭ كەزەكتى وتىرىسى وتەدى.
ءىس-شاراعا قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆ, بەلارۋس رەسپۋبليكاسىنىڭ پرەزيدەنتى ا.لۋكاشەنكو, قىرعىز رەسپۋبليكاسىنىڭ پرەزيدەنتى س.جەەنبەكوۆ, رەسەي فەدەراتسياسىنىڭ پرەزيدەنتى ۆ.پۋتين, ارمەنيا رەسپۋبليكاسىنىڭ پرەمەر-ءمينيسترى ن.پاشينيان قاتىسادى.
سونىمەن قاتار, ەۋرازيالىق ەكونوميكالىق وداق جانىنداعى باقىلاۋشى مەملەكەت باسشىسى رەتىندە مولدوۆا رەسپۋبليكاسىنىڭ پرەزيدەنتى ي.دودون جانە قۇرمەتتى قوناق رەتىندە تاجىكستان رەسپۋبليكاسىنىڭ پرەزيدەنتى ە.راحمون قاتىسادى دەپ كۇتىلۋدە.
جيىندا مەملەكەتتەر باسشىلارى ەۋرازيالىق ەكونوميكالىق وداق جۇمىسىنىڭ وزەكتى ماسەلەلەرىن جانە ودان ءارى دامۋدىڭ پەرسپەكتيۆالارىن, سونىڭ ىشىندە تسيفرلىق كۇن ءتارتىبى مەن وداقتىڭ حالىقارالىق قىزمەتىنىڭ نەگىزگى باعىتتارىنىڭ جۇزەگە اسىرىلۋىن قاراستىرادى. سونداي-اق, ەۋرازيالىق ەكونوميكالىق وداقتىڭ 2019-2020 جىلدارعا ارنالعان ماكروەكونوميكالىق ساياساتىنىڭ نەگىزگى باعىتتارىن تالقىلايدى.
سامميت قورىتىندىسى بويىنشا مەملەكەتتەر باسشىلارىنىڭ – جوعارى ەۋرازيا ەكونوميكالىق كەڭەسى مۇشەلەرىنىڭ ەۋرازيالىق ەكونوميكالىق وداق جونىندەگى كەلىسىمگە قول قويىلۋىنىڭ 5 جىلدىعىنا وراي بىرلەسكەن مالىمدەمەسى قابىلدانادى, سونداي-اق, بىرقاتار حالىقارالىق قۇجاتتارعا قول قويىلادى دەپ جوسپارلانۋدا.
