وتىرىسقا قاتىسۋشىلار كوپتەگەن ماسەلەنى تالقىلادى. ونىڭ ىشىندە, ۇوكق-نىڭ قازىرگى مىندەتى مەن ۇوك-تەر ءۇشىن وزەكتى سانالاتىن وليمپيادا الەمىندەگى ماڭىزدى وقيعالار بار.
ۇوكق اتقارۋشى كوميتەتىنىڭ جيىنى بارىسىندا جارىس كەزىندە سپورتشىلاردىڭ جەكە دەمەۋشىسىن جارنامالاۋعا تىيىم سالاتىن حالىقارالىق وليمپيادالىق كوميتەتتىڭ (حوك) وليمپيادالىق حارتياسىنىڭ 40-ەرەجەسى تالقىلاندى. اتقارۋشى كوميتەت اتالعان سۇراققا قاتىستى تۇسىنىكتەمە بەرىپ, ەرەجەنىڭ وزگەرىسكە ۇشىرامايتىنىن جانە تەك قانا وليمپيادا ويىندارىنا قاتىستى ەكەنىن ەسكەرتتى. سونىمەن قاتار, وليمپيادادان تىس ۋاقىتتا سپورتشىلار ماركەتينگتىك كەلىسىم-شارتتارىن پايدالانا الادى, بۇعان حوك-تىڭ قانداي دا ءبىر قاتىسى جوق.
بوكستىڭ وليمپيادا ويىندارىنداعى تاعدىرى دا تالقىلاۋدان تىس قالمادى. بەلگىلى بولعانداي, حالىقارالىق وليمپيادالىق كوميتەتىنىڭ اتقارۋشى كوميتەتى ماۋسىم ايىندا لوزاننادا وتەتىن حوك سەسسياسى كەزىندە حالىقارالىق اۋەسقوي بوكس قاۋىمداستىعىن ء(اىۆا) تانۋدى ۋاقىتشا توقتاتۋ تۋرالى ۇسىنىس جاسادى. ۇوكق اتقارۋشى كوميتەتىنىڭ وتىرىسىندا اتالعان وقيعا بوكستان ۇلتتىق فەدەراتسيالار مەن ءار ەلدەگى ۇوك-تەرگە كەرى اسەرىن تيگىزبەيتىنىنە باسا نازار اۋدارىلدى. ۇلتتىق فەدەراتسيالار قۇرلىقتىق جارىستارعا قاتىسۋدى توقتاتپايدى, الايدا, وليمپيادا ويىندارىنا قاتىستى جاعدايلار, اسىرەسە, 2020 جىلعى توكيو وليمپياداسىنا ىرىكتەۋ سىنى مەن وليمپيادالىق تۋرنير تەك قانا ۇوك-تەر ءوتىنىمى بويىنشا وتكىزىلەدى.
ۇوكق اتقارۋشى كوميتەتىنىڭ كەلەسى وتىرىسى مەن باس اسسامبلەياسىنىڭ جيىنى بيىل كۇزدە بۇكىلالەمدىك جاعاجاي ويىندارى كەزىندە ۇيىمداستىرىلادى دەپ كۇتىلۋدە.
