25 مامىر كۇنى «ۇركەر-2019» ۇلتتىق سىيلىعىنا قاتىسۋ ءۇشىن ءوتىنىم قابىلداۋ باستالدى. وتىنىمدەر 2019 جىلدىڭ 25 مامىرى مەن 20 ماۋسىمى ارالىعىندا www.urker-awards.kz رەسمي سايتىندا ورنالاستىرىلعان ۇلگىگە سايكەس قابىلدانادى.
ۇلتتىق سىيلىق باسپا, راديو, ينتەرنەت-جۋرناليستيكا سالاسىنداعى ۇزدىك جەتىستىكتەرى ءۇشىن بەرىلەدى. سونىمەن قاتار, اتالعان سىيلىق وڭىرلەردەگى مۋلتيمەديالىق جۋرناليستيكانى دامىتۋعا ىقپال ەتۋ, جۋرناليستيكا مارتەبەسىن كوتەرۋ, كاسىبي ستاندارتتار مەن كريتەريلەردى بەكىتۋ, قوعامنىڭ ازاماتتىق بەلسەندىلىگىن ارتتىرۋعا باعىتتالعان.
ۇلتتىق سىيلىقتىڭ نەگىزگى ماقساتى - تالانتتى جۋرناليستەر مەن شىعارماشىلىق ۇجىمداردى انىقتاۋ, ولاردىڭ كاسىبي جۋرناليستيكانى دامىتۋعا قوسقان ۇلەستەرىن تانۋ جانە شىعارماشىلىقتارىنا قوعامنىڭ نازارىن كەڭىنەن اۋدارۋ بولىپ تابىلادى. سىيلىقتىڭ قۇرىلتايشىسى جانە ۇيىمداستىرۋشىسى - قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى.
بيىلعى جىلى وتىنىشتەر كەلەسىدەي نوميناتسيالار بويىنشا قابىلدانادى:
1) جىل فوتوگرافياسى;
2) جىل رەپورتاجى;
3) جىل اناليتيكالىق ماتەريالى;
4) جىل جۋرناليستىك زەرتتەۋى;
5) جىل سۇحباتى;
6) قازاقستان تۋرالى جىلدىڭ تانىمدىق ماتەريالى;
7) جىل راديوستانتسياسى;
8) جىل اقپاراتتىق پورتالى;
9) جىل گازەتى;
10) جىل جۋرنالى;
11) جىل new media (telegram-كانال, الەۋمەتتىك جەلىلەردەگى ۇزدىك اقپاراتتىق پابليك).
بيىلعى جىلى ءداستۇرلى نوميناتسيالاردان بولەك, «جىل new media» نوميناتسياسى تاعايىندالىپ وتىر. بۇل نوميناتسياعا قاتىسۋ ءۇشىن ءوتىنىمدى تانىمال اقپاراتتىق telegram-كانالدار جانە الەۋمەتتىك جەلىلەردەگى بەلسەندى توپتار مەن پابليكتەر بەرە الادى.
ۇزدىكتەردى ارنايى قۇرىلعان كوميسسيا ايقىندايتىن بولادى. كوميسسيا قۇرامىنا ەلىمىزدىڭ مەديا سالاسىنىڭ دامۋىنا ەلەۋلى ۇلەس قوسقان تانىمال مەديا مەنەدجەرلەر, جۋرناليستەر, قوعام قايراتكەرلەرى كىرەدى. جەڭىمپازدارعا 1 000 000 تەڭگە جانە سىيلىقتىڭ ارنايى ەستەلىك مۇسىنشەسى تابىستالادى.
ەستەرىڭىزگە سالا كەتەيىك, باسپا, راديو جانە ينتەرنەت-جۋرناليستيكا سالاسىنداعى «ۇركەر» ۇلتتىق سىيلىعى 2017 جىلى تاعايىندالعان. ەكى جىل ىشىندە ەلىمىزدەگى بەلدى باسىلىمدار, ينتەرنەت-پورتالدار مەن جۋرناليستەرگە جالپى سانى 26 سىيلىق تابىستالعان, ولاردىڭ ىشىندە - اقپاراتتىق اگەنتتىكتەر, ءوز وقىرمانى قالىپتاسقان تاقىرىپتىق باسىلىمدار دا بولدى.
بارلىق سۇراقتار بويىنشا ۇيىمداستىرۋ كوميتەتىنىڭ تەلەفونى: +7 (7172) 79-82-15.
