قول قويۋ ءراسىمى كەزىندە وبلىس اكىمى ە.قوشانوۆ ەلباسىنىڭ «ءاربىر قازاقستاندىق وتباسى جۇرگىزىلىپ جاتقان رەفورمالاردىڭ ناتيجەلەرىن كۇنى ەرتەڭگى بولاشاقتا ەمەس, ءدال بۇگىنگى ۋاقىتتا سەزىنۋى ءتيىس», دەگەن ءسوزىن العا تارتتى.
– وبلىستا 12 مىڭنان استام كوپبالالى وتباسى تۇرادى. ءبىز ولاردىڭ پروبلەمالارىن بەلسەندى تۇردە شەشۋگە كىرىستىك. بۇل شارۋادان ءبىزدىڭ بيزنەس-قوعامداستىقتارىمىزدىڭ تىس قالماعانى قۋانتادى. الەۋمەتتىك بەلسەندى كومپانيالاردىڭ ءبىرى – «قازاقمىس» كورپوراتسياسى ەكەنىن باسا ايتقىم كەلەدى, – دەدى ءوڭىر باسشىسى.
مەموراندۋم جۇكتەگەن مىندەتتەر بويىنشا, «قازاقمىس» كومپانياسى ءوزىنىڭ كوپبالالى وتباسى بولىپ تابىلاتىن قىزمەتكەرلەرىن, سونداي-اق از قامتىلعان ەڭبەككەرلەرى مەن جاس ماماندارىن تۇرعىن ۇيمەن قامتاماسىز ەتەتىن بولدى. كومپانيا الەۋمەتتىك جاۋاپكەرشىلىك ءپرينتسيپىن قولداپ, ولار ءۇشىن 120 پاتەر ساتىپ الۋ مىندەتىن جوسپارلاپ وتىر. ونىڭ ىشىندە 46 وتباسى باسپاناعا بيىل يە بولادى.
ايتا كەتكەن ءجون, «قازاقمىس» كومپانياسى - ەلىمىز بويىنشا ەلباسى مەن مەملەكەت باسشىسىنىڭ كوپبالالى جانە الەۋمەتتىك از قامتىلعان وتباسىلارىنا كومەك قولىن سوزۋ جونىندەگى باستاماسىن العاشقىلاردىڭ ءبىرى بولىپ قولداپ, الەۋمەتتىك جاۋاپكەرشىلىك مىندەتتەرىن ناقتى ورىنداۋعا بەلسەندى تۇردە كىرىسكەن كاسىپورىن. قازىرگى تاڭدا كاسىپورىن ءوزىنىڭ قىزمەتكەرلەرىنە پاتەرلەر ساتىپ الىپ قانا قويماي, سونىمەن قاتار كوپبالالى جانە تۇرمىسى تومەن وتباسىلارعا باسقا دا قاجەتتى كومەك تۇرلەرىن كورسەتىپ جاتىر.
«قازاقمىس حولدينگى» جشس ديرەكتورلار كەڭەسىنىڭ توراعاسى ەدۋارد وگاي كومپانيا كورسەتىپ وتىرعان الەۋمەتتىك كومەكتىڭ اتاۋلى جانە جۇيەلى تۇردە بولاتىنىن جەتكىزدى. سونىمەن قاتار, ول كوپبالالى وتباسىلارعا كومەك كورسەتۋ – شەشىمى مىندەتتى تۇردە تابىلۋى ءتيىس باستى پروبلەما ەكەنىن ايتتى.
– جاڭا پاتەرلەردى تەك جەزقازعان قالاسىنىڭ تۇرعىندارى عانا ەمەس, سونىمەن قاتار ساتباەۆ, بالقاش قالالارى مەن باسقا دا ەلدى مەكەندەردەگى ءبىزدىڭ كاسىپورىنداردا جۇمىس ىستەيتىن قىزمەتكەرلەر دە الاتىن بولادى. سونىمەن قاتار, ءبىز قىزمەتكەرلەرىمىزدىڭ وتباسىلارىنا دەنساۋلىقتارىن قالپىنا كەلتىرۋگە, ولاردىڭ ءبىلىم الۋىنا كومەكتەسۋدى باستى مىندەتتەرىمىزدىڭ ءبىرى رەتىندە قاراستىرامىز, – دەدى ەدۋارد وگاي.
مينيستر بەردىبەك ساپارباەۆ حالىقتىڭ الەۋمەتتىك وسال توپتارىنىڭ ماسەلەلەرى, اسىرەسە, كوپ بالالى جانە از قامتىلعان وتباسىلاردى, جەتىم بالالاردى تۇرعىن ۇيمەن قامتاماسىز ەتۋ ىسىندە مەملەكەت پەن بيزنەستىڭ تىزە قوسا جۇمىس ىستەۋى كەرەكتىگىنە باسا ماڭىز بەردى.
– تۇڭعىش پرەزيدەنتىمىزدىڭ تاپسىرماسى بويىنشا مينيسترلىك بيزنەس-قوعامداستىقپەن جانە ءىرى كاسىپورىندارمەن بىرلەسىپ, الەۋمەتتىك جوبالاردى جۇزەگە اسىرۋ بويىنشا جۇمىس جۇرگىزۋدە. 2018 جىلى جالپى سوماسى 90 ملرد تەڭگەگە 700-دەن استام مەموراندۋم جاسالدى. جالپى, سوڭعى 10 جىلدا بيزنەس-قۇرىلىمدار الەۋمەتتىك جاۋاپكەرشىلىك اياسىندا الەۋمەتتىك جوبالارعا, دەمەۋشىلىك پەن قايىرىمدىلىققا 300 ملرد تەڭگەدەن استام قارجى ءبولدى, – دەپ اتاپ ءوتتى مينيستر.
مەموراندۋمعا قول قويىلعاننان كەيىن كوپبالالى 10 وتباسىعا سالتاناتتى تۇردە پاتەر كىلتتەرى تابىس ەتىلدى. سول كۇنى بەردىبەك ساپارباەۆ پەن ەرلان قوشانوۆ باسپانالى بولعان سالتانات نۇرلانوۆانىڭ ۇيىنە بارىپ, قۇتتى بولسىن ايتتى. شيەتتەي التى بالامەن جەسىر قالعان سالتانات ءىشى جيھازعا تولى, جوندەۋدەن وتكەن ءتورت بولمەلى پاتەرگە يە بولعان ەكەن.
– بۇعان دەيىن ءبىز پاتەر جالداپ تۇرۋعا ءماجبۇر بولدىق. قولداعى اقشام تەك ەكى بولمەلى پاتەرگە عانا جەتتى. ءوزىم كاسىپورىندا ۆاحتەر بولىپ جۇمىس ىستەيمىن, التى بالانى جالعىز تاربيەلەپ وتىرمىن, ونىڭ تورتەۋى كامەلەتكە تولماعان. ەلباسىنىڭ كوپبالالى انالارعا كومەك كورسەتۋ تۋرالى تاپسىرما بەرگەنى قانداي جاقسى بولدى. «قازاقمىس» كومپانياسىنا ايتار العىسىم شەكسىز, – دەيدى قۋانىشى قوينىنا سىيماعان سالتانات اعىنان جارىلىپ.
قاراعاندى وبلىسىندا كوپبالالى جانە از قامتىلعان وتباسىلارعا كومەك بەرۋ ءىسى الداعى ۋاقىتتا دا جالعاسىن تابادى. جالپى, جىل سوڭىنا دەيىن وڭىردە وسى ساناتتاعى 560 وتباسىن باسپانامەن قامتاماسىز ەتۋ جوسپاردا بار.
قاراعاندى وبلىسى
